Upna leh Kammal (6)
Upna ihcih in mihing lungsim ngaihsutna pan ahong pokhia hilo in, mihingte lungtangsungah akivawh hizaw hi. Khaici vawhpa in upna khaici ahi nuntakna thuman thutak eite lungsim sungah hongvawh in, eite in tua khaici vawhna leihoih leipha te ihih ding akisam ahihi (cf. Mt 13:1ff). Eite sungah hongkivawh khaici pen eithu in ih khekthei kei a, zong ihnial thei kei hi. Tua khaici in tunglampan eite sungah hongkipia hi in, eite in asangsiam te ihhihding athupi ahihi. Hihthu hangin, Christian upna ihcih in, hongkipia hi a, eite zontawm, vaitawm thuthak theihna ahi kei hi (Efesa 2: 7-8). Mikhat in Pasian ka um hi acihciangin: Kei ma nuntakna sungah hongki vawh anungta thu ka um hi acihna ahihi. Banghanghiam cih leh akipat cil in, Thu om a, Thu in Pasian hi in, Thu hangin nakhempeuh kipiangsak a, Thu in nuntakna hi in, tua nuntakna Thu pen mihingte sungah khaicibangin kivawh ahihman ahihi (Cf Jn 1:1-3). Thu ahi Pasian in, eite sungah hongteng ahih manin amahtawh kizopna anei thei ihi a, tua thuhangin, upna in Pasian tawh hongkizomsak, pumkhat hongsuak sak Pasian letsong ahihlam teltak in hong phawksak hi.
Nuntakna hongpia ‘Thu’ in eite sungah kivawh in, eite sungpan pokhia ahih manin, tua ‘Thu’ ii gah agahsak dingin Topa in eite hongdeih ahihi. Topa in honggen in ah: Kei mah in leenggui kahi a, note in ahiangte nahi uhhi. Kei tawhlo in bangmah nasem theikei ding uhhi. Keitawh kizom in, note sungah keima thu anuntak leh, gahtampi nagah ding uhhi (cf. Jn 15: 5-8) ci in hongvai khak hi. Hih anungta Pasian thu hangin, eite in thuman thutak leh diktatna tawh Pasian gam alamdingte ihihi. Pasian thu leh akammal in diktatlohna, thuman lohna leh nenniamna namkim te tungah thuman na, diktatna leh khat le khat ki it na tawh gualzawhna ala ding ahihi. Lamkhat panin gen leng, Pasian thu le akammal eite sungah om ahih manin, Pasian thu um eite in khat le khat kilangneihna apiangsak thei, minam khat le khat, khua khat le khat kikal ah, thuman lohna, kilemlohna, kinenniam na apiangsak thei thute tungah Pasian thu le Pasian kammal hangin gualzawhna ala dingte ihihi (cf. Verbum Domini, 100).
Nuntakna hongpia ahi, avanglian Pasian kammal le Pasian thu siksan in, tuhun khang leh paizia te etsiam in, khaikaak siam a, galvil gina lote banglo in, khangthak khuahun te nuai-ah pilvangin, upna hangin hangsanna, cihtakna leh thuakzawhna tawh mainawt ding hunsungah ihlut ta hi. Pope Paul VI hongvai khak na ah:
Lungdamna thu tawh kituak in thukhen in, deihna leh ngaihsutna te puahpha in, mihing nuntakzia leh lungsim 
thutheihtheih na te ah Pasian kammal leh gupna thu tawh ihki lehbulh khakloh nading eite in nisim ihhiam ciamloh aphamawh thu ahihi (Apostolic Exhortation Evangelii Nuntiandi, 18).
Hih thu hangin, gamkhantohnang ahi a, minam khantoh nang ahizongin, hanciamna leh deihsakna tawh nasem khempeuh in, amaute gamtatna, thugenna, sepna bawlna khempeuh ah mite phattuamna ding ahih mahbangin, teltuam mipawlkhat ii phattuamna ding, teltuam mipawlkhat ii hauhna manna ding leh, teltuam mi pawlkhat bek ii nuntaknuam ding ngaihsun loin, Samaritan mihoihpa bangin, avengpa amusiam, atheisiam leh ahuhsiam mi ahihding thupi hi (Cf Verbum Domini, 100). Tua banga nasepna leh hanciamna te ah deklam tuktumzong galsuak thei in, singkuang le aikuangzong hongki kheksak thei hi. Ahizong in, tuate in Christian thu um mite nasepna khaktan zolo dinga, eite sungah om Pasian thu nungta in, leitung ading sangin, tawntungnuntak na dinghi cih thu, phawktawntung natawh nasep ding ahihi. Tua bangnuntak na in, leitungah Pasian thu leh Pasian kammal hangin agualzo te hongsuak sak ahih manin, laulo in, khutkilen a, ma ihpan khawm diamdiam theihding a thupi ahihi (cf Verbum Domini, 100). Tua bang nasepna in leitung maitang zemdinga, leitung puahpha in, gam leh minam puahpha thei bek dinghi. Hitler in amite adingbek phattuamna leh hoihna abawlnop man in, amah le amipih te in sihpih in, tuni dongciang, migilo pen khat in kiciamteh hi. Upna in Pasian thu le Pasiam kammal tawh nuntakna ahihmah bangin, eisunga a om anungta Pasian kammal le Pasian thu kimakaih sak in, khantohna ding ahi a, gamvai minam vai nasep nate ah ahizong in, deidan leh pampaih, neilo in, Samaritan mihoih pa bangin gah tampi agah dingin Topa in thupha hongpia ciatta hen. Amen.
Rev. Fr. Damian Dal
References:
Benedict XVI, Post Synodal Exhortation, Verbum Domini. Vatican: Libreria Editrice Vaticana, 30th September 2010.
Benedict XVI, Message for the 2009 World Day of Peace (8 December 2008): Insegnamenti IV, 2 (2008): 792-802.
Paul VI, Apostolic Exhortation Evangelii Nuntiandi. 8, December 1975.
Comment piaknop aomleh...