Tuni in na pianthak kul hi ~ Zomi Quavadis

Tuni in na pianthak kul hi ~ Zomi Quavadis

Mikhat in “Patauh kul kei!” cih thulu tawh thu tomcing kim anuai abangin gelh hi. Patauh kul kei! – Na sih lezong bang patauh huai ahiam. Na nuntak sunga na gamtatna tawh Pasian in thu hong khen dinga, na kaam aphat leh vantunggam na tung ding hi. Vantunggam tung lecin patauhna ding om lo hi. Deih lohpen in Hell sung na lut khak zenzen lezong nang ading in bang patauh huai ahi hiam?

Hell sungah na lawm na gualte tampi na om khin ding uh a, amau tawh khut kilen in na manlah mahmah ding hi. Patauhna ding hun om lo liang ding hi. Tua ahih manin bang hangin patauhna leh lungkhamna tawh na hun mawk beisak ding na hi hiam!” cimawk hi.

Hi laigelhpa pen mihai hiding hiam mipil hizaw ding hiam ken thei keng, ahizongin patauhna anei het lo khat dingin mu ingh. A kha ading lungkham nawn lo ahihman in mi gina khat hi zawsop thei hi. Kei ngaihsutna ah bel Hell ih cih pen Laisiangtho inzong a uthuai lohzia agen ciangin Meikuangpi sung hi na ciliang hi.

Tua ahihman in Hell gam ih cih nilohna mun pen a nop het lohna mun hingel ding hi. Meikuang sung na hi mawk takpi zen leh ei pawl meiam sawk khak zong gen loh khualum bek zong nuamsa lo a pangka(fan) number 5 tawh a kipei sak valval pawlin bel nak thuaklah khia mahmah ding hihang.

Ahizongin tua meikuang sung sangin Pasian tawh cikmah huna kimu kha loding cihpen a ut huai lohnapi hipen in ummawh zaw ingh. Tua ahihman in Camp leh Crusade kibawlnate ah Pasian thugenten pulpit tungpan in “Na pianthak kul hi” hong cih ciangin thungai mipiten nakpi taka ih ngaihsut ding thu om hi cihna hi. Pastorten “Gup ngah kitel teng amai lam ah hong pai un” hong cih ciangin a paipai khinsate bek hilo in apai nai lo, ei a nunggual a ding pawl zong gupngah kitelte lakah lungsim takpi tawh ih va kihel theih ding thupi zaw hi.

Ahizongin kha mangthang avei diak deuh pawlkhat in kimuh pheta ” Na pianthak kul hi” hong cih uh ciangin lungsim khat nuam lo zawzen liang hi. Ih mel ih sa mahmah inzong “Zu Zu Zu….” ciden leh kilawm liang hiam, ahih kei leh a hoihlo mawhna thu bekbek ngaihsun den leh kilawm liang hiam ka cih hun om liang hi.

A piangthak lua ka lawmte khatin tuabang a kicihna tuak kha ngei ahi tam khatvei hong gen ka za kiau ngei hi. Amel asa enleng bel biakinn tawh aki nahvawh loh zawh kum tampi hikhin leh a kilawm dan hi, ahizongin hih ka lawmpa pen tuabang na hi lozaw a, pawlpi sungah a kipia zo pawl leh a kikhop ciangin sumpi zong tam pipi a khiaden pa a hihi.

Laisiangtho in ” Pasian in a pawtham hoihna tawh thukhen lo a, a sungtawng enzaw hi.” acih pen hoih kasak leh ka santheih thukhat a hihi. Tua ahih manin hoih in hoih takei lehang a piangthakte ih hih ding thupi hi. Ahizong in kei muhna ah thupha asang leh leitung nuntak nuam asa tepen Pasian thu sungah a piangthakte bek na hilo uh a, Pasian athei kha nai lo leh Pasian a phawk khaloten zong thupha na sang uh a leitung na nopzek mahmah uh hi.

Ahitazongin ei Christiante ih hamphat diakna pen piangthak in hi lehang hih leitungah bangbang ih thuak zongin Pasian tawh tonkhom ih hihna tawh nuam kisa lel a, ih si zongin tawntung nopsakna Pasian anglum in ei hong ngak gige ahihman in hampha phadeuh se hihang.

Ka mangngilh theih het loh thukhat pen hih a hihi. Nitak khat mitziim takin biakinn ah ka va kikhawm hi. Khikhinna leh thungetna teng a mankhit ciangin hunawng kihong a , tua sungah ka theihngei papi ham pian khin khat in hibang in thu hong gen hi. “Guai aw ih nuntakna kipuah pha in Pasian kiang zuan kik ni. Pasian hong sap ngak kei ni. Keipen nong theihtek mah bangun ka khangno laiin zulesa tawh kidiah in mawhna sungah a kibual tawntung pa ka hihi.

Tualai in Pasian lampan in sapna awnem ka zak zel hangin ka thusim kei vial hi. Pasian zong lungkim lo hiding hiven kong sapna awnem za nuam lo tak na hileh nazak tak dingin hong sam ning ei ciin ka lawmte tungtawn in thautang tang 2 tawh hong sam hi. Na mahmah hi. Tua ahihman in Pasian hong sap ngak se kon la, hong sapma in ama kiang zuan zaw un…” ci hi.

Hih thugenpa in tuni ciang dong khamtheih a kici limlim buhsih leh tuiminsa lobuang ne lo dawn lo hi. Pawlpi sungah makai sem in khuasung ah zong muanpen khat hong suak hi. Tua ahihman in nang zong sawltak Paulu banga sakol tung pan Pasian hong suihkhiat hun ngak sese kenla tuni mahmah in piangthak in. Pianthak hangin pawl dang phuan ding cihna zong ong hipah sam lo hi.

Paulu in a pianthak hangin pawldang phuan tuan lo a, amah a sampa phuatsa pawlpi sungah gupna thu tangko in asih dongin mun citeng phialah na vak kawikawi hi. Ahizongin a piangthak khempeuh vak hat pah ding cihna zong hi pah tuan kei leh kilawm sa ingh. Tuamah bangin biakinn a papi thugenpa zong a pianthak khit hangin Tuiphum pawlpi ah naklah dektak liangin na kituiphum pah tuan lo a, voksa zong na tang pah lo in, na Seidei pah tuan lo hi.

Azi zong dialkang khim dingin na zawhthawh sawl tuan sam lo hi. Ahizongin Pasian in zang veve hi. Bangbang hitaleh koikoi ah na om zongin na pianthak kul hi. Hong piangthak phot tapeuh in tua hileh na vaisah teng zong hong pan tuam dinga vai kihawm thei pan ding hi. Na pianthak kul hi. Zomi Quavadis