Upna leh Kammal (5)
Christian nuntakna i cih in, “Kanung hongzui in,” (Jn 1:43, Lk 14:27, 18: 22) ci in hongsam Christu Topa tawh nuntakkhawmna ahihi. Tua nuntakna in leitungah deihna libang cinna ding, leitungah min le vang lawibang athang nading, leitungah gualtung vabangtuangin, khutngakna khempeuhah sumlom asuak sakding leh, kham le ngun tawh kizemin, tuallen na mun le mual khempeuh ah, alimpen ne in, atuipenpen adawn dending; khuamual suak leh minlawh hanla sa in, sumlu tungah gualzawhna lukhu khu in, tuanna peuh ah asangpen mun ngahnang ahi kei hi. Tua bang nuntakna lunggulh in Topa nungzui Chritian mite in, Pasian vangliatna leh Pasian hoihna zonglo in, gilvahnading bek tawh Topa azong mite ahihi. Jesu Topa in, “A mantakin ci lehang: Ka nalamdang bawlte na muh uh ciangin kei hong umin ahongzong nahi kei uha, ann na khamtakun na nek uh manin ahongzong nahi bek uhhi” (Jn 6:26) ci in, taaina leh mawhsakna athuak mite cihna ahihi.
Christian nuntakna in, eima singlamteh pua in honggum Topa nungzui a nuntakna ahihi. Topa in, “Ama singlamteh pua in, kanung hongzui lo mi in, kanungzui asuak theikei dinghi,” (Lk 14:27) ci in hong vaikhak hi. Topa kammal umin, Topa thu sungah ihnuntakna kipiakna in Christian nuntakna man ahih manin, Topa honggen thu, hong vaikhak thute eideihthu tawh laihin, eideihbangin ihkhel thei kei hi. Christian thu ummi ihcih in, honggum Jesu Topa tawh vanah om Pa Pasian pen “Pa aw – Abba” (Rom 8:15, Gal 4:6 ) ci in, saptheihna khuan angah, hehpihna thupha hangin amah tawh unau sanggam leh innkuankhat asuak te ihihi. Topa in ama innkuanpih ding mite abangci mite hidinghiam cih thu honggen na-ah, “Ka thugen za a, azui te in, ka nu, kasanggam numei leh kasanggam pasal te ahi uhhi” (Lk 8: 21) ci in, siangtak in honghilh hi. Hihthu hangin, Topa nungzui Christian taktak te nuntakna in, Topa honggen thu te tungah kinga in, Topa honggen thu te zui in nuntakpihna ahihi.
Tu hun ciangin, honggum Topa’ thu za in, ngai in, athu amang mi ihsuak ding nakpi takin thupi hi. Mi tampi te in, Topa honggen thu tawh kikeelki in, ki langngat in Christian nuntak na lamin, thu hilh uha, Laisiangtho sim napi in, haklela khuamu lo te tawh akibang mitampi ki omta hi. Topa in, na singlamteh pua in kanung nongzuih kei leh, kanungzui nahi ngeikei dinghi, ci in honghilh hina pi in, tu hun Christian tampi tak in, Topa pen eima puakding 
singlamteh lehsuan in, ihpuasak nuamta hi. Topa in, Calvary mualah nangtang in sikhin hi, na singlamteh hongpuaksak khin hi, ci in genbelh in nei in, Laisiangtho sim ing aci mitampi te in, asim Topa kammal sangin, akigen khia mihing kammal umzaw in, paikhialhna in nei uhhi.
Laisiangtho sung munkhat beekah, Christu Topa in nangpuaktang ding singlamteh kongpuak sakkhin hi, ci in honghilhna ihmu khakei dinghi. Na singlamteh kisuan tawmin, nang le nang in pua inla, keipai na Calvary mualah hongzui in, ci in hongsam ahizaw hi. Tua hi na pi in, tuhun mitampi tak te in, Topa’ liangko ah, eima singlamteh suanin Calvary mual ah eite mai-ah pai in, ihsawl a, eite in anungpan in, bangmah pualo in, ihzui hiathiat nuammawk hi. Hi in Christian tampi te i anatlawh uh, cancer natna ahihi.
Topa kammal, Topa thugen te ngaihhak sa in, zakhak ihsa thei hi. Tua banah, zaksunsun zong telhak ihsalai hi. St Jerome (one of the first and greatest biblical scholars) in, Laisiangtho sungah Topa kammal, Topa thu azongsiam te ihhi ding hici in honghilh hi. Laisiangtho pen upna tawh simna hangin honggum Christu Topa thu leh ahonggen kammal te atheithei te ihihi. Tua thu hangin, Laisiangtho pen upna tawh simin, thungetna nasuaksak ding uhhi, ci hi. Banghanghiam cih leh mipawlkhat te in, Laisiangtho sungah Topa thu leh Topa kammal zonglo mulo in, amaute deihna leh amaute lungsim anuamsak dingbek zonguh ahih man ahihi. Hih thu hangin, Laisiangtho sungah Topa thu le Topa kammal thuman thutak zonglo mulo in, eima deihna leh eite lungkimna bek azong Christian te tampi tak ih omna thu aphawkhuai thukhat ahihi. Laisiangtho in eideihna zonnangmun hilo in, Pasian deihna leh Pasian thu zonnang mun, Pasian lungkimna banghiam ci in, ihmuh na dingmun leh, Pasian tawh kiho namun ahihi. Laisiangtho sunga om Topa thu le Topa kammal te pen eideihna nungzuisak lo in, eite in, Laisiangtho sungah Topa honggen thu leh, Topa kammal te zui in, anuntakpih te ihhihzawk na’ng, huhpa Khasiangtho in, Laisiangtho asim thei mimal khiatciat hong mapi tahen. Amen.
Rev. Fr. Damian Dal
Comment piaknop aomleh...