Upna leh Kammal (4) ~ Rev. Fr. Damian Dal

Upna leh Kammal (4)

Kammal in kizopna ahihi. Kammal in apiang, a om, ahi khatpeuhpeuh teltheihna hongpia a- akizang, mihing le Pasian, mihing le mihing, mihingte le nate kikal ah palai a kizang tawntung, a omloh a phamawh kizopna bulpi khat ahihi.Kammal in THU ahihi. Thu pen kammal zangin kigen hi. Khanglui te in: Thu in la hi in, La in zong thu hi, ci in, paunak nanei uhhi. Tua hi in, Thu in nate hongthei sakin, tau thupen kammal tawh kigelhkhia, ka paukhia hi.

Hihthu hangin, Pasian thu le Pasian kammal theihna in, pilna sangpen leh theihna sangpen ahihi. Banghanghiam cih leh Pasian in nakhempeuh abawlpa leh apiangsakpa hi in, amah in akipat cil akipan a om THU ahihi. Pasian’ thu teltak le siangtak a theihna in, akipiangsak nate tungah asia le apha khentel theihna pilna leh cimna hongpia hi. Christu Jesu in nakhempeuhte pianma in piangin, akipiangsak nakhempeuhte zong amahhangin kipiangsak ahih manin (Cf. Col 1:17), amah in akimu thei, akizathei asangpen anungta Pasian’ thu, Pasian Kammal (the Word made flesh) ahihi. Hihthu hangin, tua anungta tawntung Pasian’ thu, Pasian Kammal mahmah ahi, Christu tungah upna tawh kilam na, amasungah zungkhak na in (Col 2:6-7), eite nuntakna mahmah pen anungta Pasian kammal, anungta Pasian’ thu asuah mite ihihi.

Banghanghiam cih leh, Pasian kammal (Dei verbum) in eite ngaihsutzia, muhzia, zakzia, telzia, phawkzia leh pauzia kammal te hongkikhel sak in, thu akici khempeuh tungah ama Thu tawh, kammal akikhempeuh tungah ama Kammal tawh gualzawhna honglasak hi. Thu tawh nakhempeuh kipiangsak ahih manin (Jn 1:1-3), nakhempeuh te thu atheinuam mite in, nakhempeuh te piansakna Thuman pha kanin, zonga, theihding leh telding ahihi. Ih nuntakna te ihlamna ding, amuanhuai leh abelhhuai thu in, nakhempeuh te apiangsak THU ahih ding kisam hi. Mihing te utthu, deihthu leh vangliatna leh, kicinna aneilo thu tuamtuam te tungah ihnuntakna te lamin, zungkha in, bulmat ding pen sehnel tunga inn lampa ihsuak nathu hongthei sak hi (Mt 7:26).

Mihing te nuntakna apicin nading leh thupha tawh akhangcing nuntakna aneihna ding in, lemetna, geelna, sepding bawldingte khempeuh ah, nungzuipi Peter bangmah in, “Topa aw, na hongsawl bangin, kangen kakhia ding hi – At your word, I will let down the nets” (Lk 5:5) cih upna kammal tawh nakhempeuh ihkipat ding ahihi. Tua hi leh “suang tungah inn alam mipilpa tawh ih kibang dinghi” (Mt 7: 24). Tua takciangin, Topa tungah, “Nang pen keima bukna mun leh kei hong hupa nahihi. Na thuciamna kamuang hi (Late 119: 114) aci mite ihsuak taktak dinghi. (Cf. Verbum Domini, 10).

Tua bang lungsim leh gamtat na in, anungta tawntung Pasian’ thu tungah upna tawh kingakna (obedience of faith) hi in, Pasian hongsapna aw za-in, ama thu ihzuihna ahihi (Rom 16:26; cf. Rom 1: 5, 2Cor 10: 5-6). Tua bang upna bek in, upna kammal hongpaukhia sak thei in, upna thugui hongsut sakthei hi. Atomin gen leng, tua bang upna bek in Pasian hongsapna ihdawnkikna ahihi (Verbum Domini, 14). Paul in Rome mite tungah alaikhakna ah: Upna in zakna pan hongpiangkhia ahihi, tua ihzak dingthu in Christu thu leh kammal ahihi – faith comes from what is heard, and what is heard comes from the word of Christ (Rom 10:17), ci in nahilh hi.

Mihing te kammal (human language) in Pasian kammal maimialsak in, mihing le Pasian kikal leh, mihing le Pasian piansak nate kikal ah, meiipi bangin kaai in, ihmuh na tomsak in, ihtheihna zingsak thei hi. Mihing kammal in Pasian kammal hi lo in, Pasian in mihing kammal zangin nasem hizaw hi. Hih thu hangin, mihing te in, Pasian kammal pen mihing kamsungah koih in, mihing deihbang semsak nuam uha, mihing sila suaksak nuam uhhi. Mihing kammal in, Pasian’ nasem in, Pasian kammal leh Pasian thuhoih thupha te genkhiat hawmkhiat nading hina pi in, Pasian kammal pen, mihing te deihna, mihing te geelna te asem abawlding bek in ihdeih hi. Pasian pen eideihna bang semsak nuam in, eite in Pasian deihna ihsepding ihmangngilh thei hi. Ihgen, ihsak, ihsepna khempeuh ah Topa kampan hongpai khia thu in, eite nuntakna hita hen.

Christu Topa in honggen inah: “Mite in, an le tui bektawh nungta hilo in, Pasian kampan ahongpai khia Thu tawh nungta zaw hi” (Mt 4: 4), ci in siangtakin hong hilhhi.

Rev. Fr. Damian Dal