A thawnkik awging ~ Dong Mung

A thawnkik awging ~ Dong Mung

A thawnkik awging: Nuntakna pen a thawnkik Awging tawh kibang

Zingsang khat naupangno khat a nu tungah heh lua ahih manin, “Hong mudah lua ing… Hong mudah lua ing,” ci-in awng lualua hi. A nu’ hehin a sat khak ding lau kik leuleu ahih manin inn pan paikhia in gam sung kuampi khat ah, “Hong mudah lua ing… Hong mudah lua ing,” ci-in nakpitak a va awng gawp hi.

Tua leh ama aw mah in thawnkik a, “Hong mudah lua ing… Hong mudah lua ing,” cih aw a zakik hi. Kammal thawnkik cih thei ngei nailo ahih manin lau mahmah a, inn ah hong tai vingveng in a nu kiangah, “Nu aw, hong kem in. Gamlak ah mi gilo khat om in, ‘hong mudah lua ing… hong mudah lua ing,’ hong ci hi,” ci-in a gen hi.

A nu in theisiam mahmah ahih manin, “Lau kei in. Va paikik inla, hong it lua ing…hong it lua ing, va ci-in,” ci-in a sawlkik hi. Naupangno zong va paikik in, “Hong it lua ing… hong it lua ing,” a va cih ciangin a thawnkik kammal in zong, “Hong it lua ing… Hong it lua ing,” a ci hi. Tua panin naupang in sinna tampi a ngah lawh hi.

Lungngaih ding:

Mihing i nuntakna pen tu-a naupangno khat ii thu mah a bang ahi hi. I pau khiatna mah ei tungah hong tung kik ahi hi.

• I vawh bangin a ki-at ahi hi.
• I kammal zatte mah a kiza kik ahi hi.
• I piakkhiatte mah a kingah kik ahi hi.
• Itna khahkhiate in itna mah ngah uh hi.

Tua ahih manin

• Na khaicii vawh ding limtak ngaihsun masa in.
• Na kammal zat ding limtak ngaihsun masa in.
• Na gamtat nading limtak ngaihsun masa in.
• Na laigelh ding limtak ngaihsun masa in..

I zakkik nop kammalte mah pau ta ni..,
I at kik nop khaiciite mah tuh ni…
I ngahnop thuphate mah bawl ni…
I thuaknop thu le late mah semkhia ni…

Leitung pen i vawh bangin a ki at kikna gam hi…
Itna khahkhia ni…lainatna lungsim nei ni…

Lungdam, Dong Mung