Upna leh Kammal (2) ~ Rev. Fr. Damian Dal

Upna leh Kammal (2)

Upna in mite ngaihsut tawmthu (philosophical thinking) pan in, ahongpaikhia theihna ahi kei hi. Ngaihsut theihtheihna (philosophical thought) ihcih in, khatkia vaipuak leh khatkia ngaihsut na hi in, tangkia thuzonsiamna pilna ahihi. Lamkhat panin genleng, ngaihsut theihtheihna in, mikhempeuh tungah ama dinmun, leh ama nuntakna ziatawh kituak in, a om tangkia thu zonsiamna ahihi. Hicibang thungaihsut theihna in, leitungvai leh, vaituamtuam, thutuamtuam te ah, akilawm ding, akicingzaw ding, kammal te gingkhiasak hi. Lamkhatpan in genleng, ngaihsut theitheihna pilna in, ihgending kammal, ihsakding lamal, ih atding lai mammal cihte akilawmzaw, ahoihzaw, asangzaw, a zaknopzaw hongtheisak hi.

Ahizongin Upna in tua kammal te tungah kinga lo in, tuakammal te tungah hoihna leh, etlawmna zonglo hi. Banghanghiam cih leh, Upna kammal in, mihingte ngaihsutna pan hongpiangkhia tawm ahi kammal te tungah, vangliatna aneihman ahihi. Tua thu hangin, upna kammal in eiphuaktawm, ei ngaihsuttawm thu leh kammal te tungah gualzawhna ala tawntungding ahihi.

Banghanghiam ihcih ciangin, upna ihcih in ihngaihsut theihman, ihtelman in apiangkhia theihtheihna pilna hongpiak gah le vui hilo in, “Kei mahin tawntung nuntakna lampi ka hihi,”(Jn 14: 6), “Kei hong ummi te tawntung nuntakna ngahding hi,” (Jn 11: 25). Kei nongup leh nasi kei dinghi (Cf. Jn 11: 24-26) cihbangin, tunglampan in, ihtelloh, ihtheihloh thuthukpi pen, upin ci in, hongkisawl ahihi. Tua thuman thutak honggen pa kiangah, “Ka Topa leh ka Pasian,” (Jn 20: 28) ci in, kiniamkhiatna tawh ihngaihsutna khempeuh, ihtheihtheihna khempeuh, ihmuh ihzaktheihna khempeuh, akipan, ihnuntakna khempeuh avek in ih apna pen upna hihi. Tua thu hangin, upna pen, mihingte kammal nuai-ah sila ahi ngeikei hi.

Upna kammal ihcih in mite tawh ihneihkhawm kammal ahihi. Upna ngeina ihcih in mite tawh ihneihkhawm ngeina ahihi. Upna kaneihman in, midangtawh kipawlthei lo, Jesu honpa leh gumpa a kasan manin, kazi kata, ka u kanau, kabeh kaphung tawh kakihkhen lawh leh, kei san, kei up honpa gumpa pen, upna hongpia pa hi lo, eideihbawl, eingaihsutna pan a, hongpiangkhia deihbawl gumpa hi dinghi. “Kei hong umin,” ci a, hongsawlpa ka up manin, midang upna nei mite khempeuh tawh, kammal neikhawm, ngeina neikhawm mikhat kasuak hi. Hihthu hangin, upna kammal in mikhempeuh Christu Topa sungah akaikhawm, pumkhat asuaksak kammal ahihi. Upna kammal in, minamkhat, gamkhat ii neih tuamtheih ngeina van ahi kei hi. Banghanghiam cihleh, upna ihcih in hongkipia hi in, Pasian in, ama Tapa neihsun a ummi khempeuh ahongpiak kammal in, upna kammal ahihi. Tua thuhangin, Babel tausang kicim in, Pencost pawi hongtung ahihi.

Tua hina pi in, banghangin Upna khat anei mihingte kitawngin, kilemlo in, kitel khial in, upnakhat nei in, biakpiakna khat anei khawm mite, banghangin pumkhat suakthei lo uhhiam? Amau te upna aneilo ahi dinghiam? Ahih kei leh, bangthu hidinghiam? Hidotna te dongin, ihdawntheih dingpen Christian thu ummi khiatciat ii mawhpuak, vaipuak ahihi.

Banghanghiam ihcihciangin, tu hunsemsem ciangin, upna kammal kizangnawn lo, upna kammal kipau nawnlo, upna kammal kigen nawnlo in, leitung ci le sa khantohna ding lunggulh natawh ahi a, leitung pilna lamah khantohna ding kidemna tuamtuam te hangin, mihingte ngaihsut theihtheihna pan apiangkhia, kammal leh thute bek nisim in kigen, kigelh, kisim, kisin, kiza ahih manin, Christian akici mitampi takin, tuathu, tua kammal te sungah sakmel, khangmel theilo in, aisa pheibangin, maikin theilo, nungkin theituanlo in, ihphei paita mawk hi.

Hih atunga ihgen thute akitel theihnading in thukhupna no khat ihgenlai dinghi. Topa Jesu in keinong up uhleh, Hi nacih te uh, hi mah hi ci unla; Hilo hi nacih te uh, hilo hi mah naci un (Mt 5: 37) ci in, hongvai khak hi. Cihnopna ah lamka laiah dingkei in cihna hi. Ahizongin, tuhun ciang, Pasian nasem minpua, Lungdamna thu atangko dingte mahmah zong, pulpit tungah agen thuleh, thukikupna agen thu kibang nawnlo ta hi. Thukikupna agen thuleh, mihonlak ah agenthu kibangnawnlo ta hi. Pasian sangin mimai, summai kizahtaak zaw ahih manin, biakinnsung tunciangin, Pasian tungah – hi mah hi – acih thu pen, biakinn pua atunciangin atheilo mahki bangpah lel hi. Upna kammal in biakinn sung, kikhopna inn te beka zatding hilo in, ihnuntakna khempeuh ah ihzatding leh ihnuntakpih ding ahihi.

Rev. Fr. Damian Dal