United Airlines te’n Leggings pheituam tawh zuihding phallo ahih manin kiphun ngeingai

United Airlines te’n Leggings pheituam tawh zuihding phallo ahih manin kiphun ngeingai

USA gamsung azinding Domestic Flight tungah azuihsawm Passengers numei nihtepen Leggings akici numei te pheituam apan delhdalh, akimatcip dikdek, azingzing in akidawk zingzeng te teeng uh ahih manin vanleng tungah ki tuangsaklo cih Reuters News te’n genkhia uhhi.

Sunday ni in United Airlines tungah thupiang hi a, hihvai pen Online Social Media tuamtuam ah kiphun ngeingai hi. Hihvai tawh kisai in United Airlines panin agenkhiatna ah tua vanleng tuanding akinawlh te pen “Special Pass Travelers” hi uh a, tuabang in Special Pass tawh azuiding te in vanleng sungah akilawm in silhding Dress Code thukhun azuih kul uhhi ci’n Twitter tungtawn in genkhia uhhi.

“Special Pass Travelers” acihte uhpen United Airlines Company sungah nasem te ahih keileh nasem te ii innkuanpih te acihna uh hi a, vanleng tuanmanding Ticket zong midangte zah piakkullo uhhi. Company ah asepkhak manun vanlengtuanman akimap Company Benefit angahkhia, hamphatna akipia ahih manin, tuabangin atuangte pen Company ii Dress Code thukhun azuih kul uhhi ci’n Company in gencianna nei uhhi.

Sumpia in azui Ticketed Passengers te ahihleh amau utbangbang “Casual Attire” tawh vanleng atuang uh zongin phamawhlo a, Special Pass Travelers te ahihleh Dress Code zuihkulbek hi ci uhhi.

United Airlines Flight pen Sunday ni in Denver pan Minneapolis khua zuanin alengding hi a, Leggings pheituam ateengkha Company nasem or nasemte meltheih te hangin buaina apiang hidihdih hi.

Company nasem te tungtawn in hamphatna tawh azui ahihlam athei khalo pawlkhat in United Airlines pen mawhsak mahmah uhhi.

Adiakdiak in Celebrities ihcihcih Hollywood Actor, Actress, Singers, Models cihbang mi minthang te’n mawhsak phadiak uhhi. Banghanghiam cihleh amaupen adawk theithei asilhnuam te ahih manun, United Airlines pen mawhsak phadiak uhhi.

Model Chrissy Teigen akicinu bangin “Abeisa in United Airlines ka tuangngei a, tualai in bombi zong teengbekkeng. Atungsilh khatbek silhziau ing. Nidangciang United Airlines katuanleh Jeans bek teengziau in atungah bangmahzong silhsawmkeng” cimawk hi.

US gam phadiak pen aki Democracy sak mahmah gamkhat hi a, a utut un silhin, asilhlo inzong utlel uhhi. Tuabang gamsung ah United Airlines te’n Leggings aphalloh pen lamdang akisavat ahihi. Ahi zongin United Airlines in aphallo pen khualzinmi Ticketed Passengers te hizenzenlo a, Company sungah asem leh asemte innkuanpih midangte zah sumpialo in azui te bek hi a, tuabang Special Pass Travelers te’n Company thukhun zuihkul cih ahihi.

More: Guak tang a om mawhna ahi zen tam? ~ Pau Tun Thang

Gam khatpeuh, Company khatpeuh, Pawlpi khatpeuh, kipawlna khatpeuh ah zuihding in akibawl thukhun omcitciat a, zuihzawh ngapkeileh tua thukhun aomna sungah kihellohding hipah lel hi. Hamphatna aomcianglah ngahnuam, thukhunlah zuizolo in aphunphun tepen mi hehpihhuai mahmah te hizaw khading hi. ZD Sawltak #zomidaily