Nisim in mat hong kila ~ Tdkhen

Nisim in mat hong kila ~ Tdkhen

Kenya gam, Nairobi khuapi-a gamukpa’ nuai-a ulianpa’zi in nungakno khat a nasem dingin a ompih hi. Kha thum sung a sawt ciangin a pi’kiangah, “Pi aw, Moslim kumpipa’ zi meltheih hilo na hia mataw, ama’ kiangah zong kha thum sung ka omtheih nadingin lai hong gelhsak in” ci-in a gen hi. A pi in, “Ka kiangah hong om lai ve, na khasum zong hong khang sak ning maw” a cihleh nungakno in, “Pi aw, khasum khan ding deiha paikhiat a sawm hikei ing.

Bang biakna zui ding ka hiam cih khensat theilo ing a, na kiangah Khristiante’ om dan kha thum kong sinkhin a, Muslimte’ om dan sin dingin kha thum mah om’ ka ut hi. Tua ciangin ka zuih pen ding biakna ka thei tading hi” a cihleh a pi in, “Aw tua himawk maw; nong om’tuung’in na tupna hong thei hizen leng maw” ci-in a kiphawk mahmah hi.

KHUTNIH NEITE HAMPHA LUA

Galpi 2 na hun lai-in galkap hon lakah ciamnuih bawl dingin Jimmy Durante kicial hi. Jimmy in hun tam a ngahloh thu, minute 10 sung bek hun a zattheih ding a zasak hi. Ciamnuih khatbek nong gen zongin, ci-in a cial veve uh hi.

Jimmy zong hong tungin Stage ah hong kahto a, ciamnuih khatbekmah hong gen takpi hi. Ahi zongin paikhia lo-in a maigual lam munkhat a en niloh hi.

Tua tengleh a ciamnuih hong zom kik a, minute 15-20-30 dongin thangah takin hong zom to hi. Tha kinak ngah pha mahmah ahih manin, a paisuakin khut kibeng himai hi. Hun man ciangin Stage nung lam panin mikhat hong pai a, Jimmy angpom’ in, “Hun tawmno bek ngah ing cinapi bangci dan hiam” a cihleh Jimmy in, “Hun tawmno bek ngah mah ing.

Ahi zongin a hang’ na theinopleh hong musak ning, endih in” ci-in a maigual-a pasal nih tukhawmte a lak hi. Tuate nih pen gal sungah a khut langkhat tuak a kitansuah uh ahi hi. Khat pen a veilam kitanin, khat pen a taklam kitan hi. A tutkhop uh ciangin a khut neihlai sun uh kipawlin a bengkhawm thei a nahi hi. (Sound of One Hand clapping, a cih, Tim Hansel’ gelh sung aa kila hi). Tdkhen