UNHCR Card thak bawl ding kikupna om

UNHCR Card thak bawl ding kikupna om

Zandiak a Malaysia gam sungah Rohingya a honlutna uh hangin Malaysia kumpi lungkham sim pian ta hi. Tua thu hang mah in UNHCR in zong innteek kumpi tawh pang khawm in Win Win Policy tawh amau mite ciat a sumhzaw kuamah om lo a huut theihna ding lampi kikum khawm uh hi. Tu ciangciang Malaysia ah Refugee pen 153,004 val om ta a, tua lakah 93% pen Kawlgam pan hi geu mawk hi. Agency te genna ah tulaitakin Malaysia khuasung te ah laibu nei lo Asylum-seekers a honhon in vaak ziahziah uh a, khuasungah buaina piangsak banah puaisate mahmah in zong tampi bawlsia in meetbawl uh hi cih thu mukhia uh hi. UNHCR thuneipa Richard Towle zong lungkham ahih manin “Malaysia kumpi in Refugee teng i gamtatna akisam banga kan ziauziau theih dingin Biometric Card Refugee khempeuh bawlsak ding geelna kinei hi” ci hi.

Tua banah hi bangin gen lai hi “Refugee minkhumna vai tawh kisaiin Malaysia kumpi tawh kinai takin na kisem khawm ding hi. Bangh hang hiam cih leh Malaysia kumpi tawh pang khawm in sem khawm le hang mai-lamah haksatna buaina tampi om lo tuam ding hi” ci hi. “Tulaitak a kizangh UN Card pen manpha manpha mahmah hi. Bang hang hiam cih leh hih Card tawi Refugee tampi takin Klang Valley leh mundangte ah nasep kician neih lawh zo uh a, hih hangin Malaysia gam sung sum lut kibehlap tuam hi.

Ahi zongin hih Card pen Malaysia kumpi in man neilo khat bangin hong ngaihsut sak phial mah taleh hih Card tawite a tamzaw in mat leh hen tuak lo tuam uh ahihman in phattuamna bel om veve cih ding hi” cilai hi. Tua UN Card kibawl thak ding pen Biometric Card hi ta ding hi. Biometric Card cih ciangin mihing pumpi sung leh pua a om khutme mai, meel puakzia, aw suah cihte tawh a sit thei setset Technology nam khat tawh a ki thuah a sensang mahmah Card ahi hi. Geelna om bangin Biometric Card UN in Refugee te zat dingin hong bawlsak thei hileh Malaysia kumpi in zong a gamsung vua om Refugee teng kician taka theihpihna hong nei ding uh hi. Hih geelna atangtun theihna dingin UNHCR leh Malaysia kumpi a kiholim saan laitak uh ahi hi.

Hih Biometric documentation bawl ding vai kumpi in hong thukimpih leh phattuamna nam thum kingah ding hi:

⦁ Refugee te’n gamthumna a ngak sung un nasep kician leh muanhuai ngah thei ding uh a, nungta thei tuam ding uh hi.
⦁ Refugee sungpan amau siamna tawh kituak deih teel thei dinga nasep zong guan thei ding uh hi.
⦁ Refugee khat pen ama Card tawi Biometric ahihman in a omna mun kithei pah setset ding hi. Thusia lasia bawl in buaina piang sak hi zenzen leh zong olno takin kikan pah thei ding hi.

Malaysia in 1951 UN Convention ah min lah thuhlo cileng, tua nagen teng a piang thei ding mah maw leh ci a dotna kidong pen Richard Towle in hi bangin dawngkik hi “Hih thu teng pen national level a ki vaihawm ding ahih manin 1951 UN Convention ah min thuh sese ta kei leh a piang thei lua hi” cihsan ziau hi. Source : www.bernama.com