UN Card tawite theihding: UKM zato mankhangta

Malaysia gamsung UN Card tawite theihding: UKM zato mankhangta

Cidamna lamtawh kisai “Health”
Malaysia gamsung aom UN Card tawi Refugee galtai te theihding in CLU (Community Liaison Unit) pan tangkona hongnei uhhi.

Abeisa hunsung in UKM ahih keileh HUKM ci’n atom in ihtheih ahi “Hospital University Kebangsaan Malaysia” ah UN Card tawite in zato vai buaina ihneih ciangin zuattak mahmah hi. Zatui zaha man te pen alang (50%) bang hongkhiamthei uh a, ei sumneilo te adingin noptuam mahmah hi.

Ahi zongin tukha 01 November 2016 ni akipan UN Card tawi khempeuh Foreigner’s Rate tawh hongla tading uh cihi. Foreigner’s Rate pen abeisa honglakzah uhtawh kikhai simtham a, zato bill pen tampi tungto hanhan khading hi.

Tua hi a, UKM zato ah zato lupsawm, Operation kibawlsawm, nau suahsawm cihbang vaikhatpeuh aomkhak zenzenleh asum lakzahpen nidang tawh kibangnawnlo ahih manin, aki gingsa phitphet in napaiding uh ihki theisakkhol hi.

Health Walk-In Counter honni kilaihding
Tuaban ah UNHCR huangsung aom cidamna lamtawh kisai dottheih kuptheihna Counter ahi “Health Walk-In Counter” zong 05 December 2016 ni akipan aki honni kilaihding hi. Abeisa hunsung ah Monday, Tuesday, Friday niteng in akihong ahihi. Tuapen hongtungding December 05 ni akipan Monday, Tuesday, Thursday ni in kilaihding cihzong na ciamtehkhol un. CLU iNFO

More: UNHCR leh Qualitas Clinic te’n thukimna bawlkhinta

UNHCR leh Qualitas Clinic te’nzong thukimna bawlkhinta uhhi. Atung a Link tungah nasim nopleh namek inla, nahawh in maw.