UN Card kizuak cih Al-Jazeera News in leitungbup theihding in pulak

UN Card kizuak cih Al-Jazeera News in leitungbup theihding in pulak

Malaysia gamsung a Refugee leh Asylum Seeker te nuntak khuasakzia pen leitungbup in ahiciangkhat lunglut mahmah uhhi. Tuakawmkal ah UNHCR Card pen sumtawh kileithei hi cih Al-Jazeera News te’n akantelna pan amuhkhiatna Report pulak khiata cih Malay Mail Online panin kiza hi.

Hih thu pen Al-Jazeera News ah Senior Presenter asemlaitak ahi Steve Chao in kancianna Investigation abawl hi a, UN Card pen RM1700 panin RM3500 ciangtawh kileithei cih mukhia hi. Hihbang in leitheih nading in akikal ah UNHCR Officials tezong kihel cih pulakkhia hi.

Hihvai tawh kisai Malaysia ah UNHCR makaipipa Richard Towle inzong hihbangdan thupiang cih kazakhin cihi. Tua ahih manin hihthu akancian kipawlna zong omkhin cihi.

UN Card zuakte leh azuak laitak zong anuai a Video Clip atawpna lamah ki enthei hi.

Malaysia’s unwanted

Adiakdiak in hihbang in UN Card kizuak kileina ah UNHCR Office sung a nasemte ngiatzong kihel cih makaipipa Richard Towle inzong thuzakna neikhin ahih manin hihvai kilimkan mahmah hi. Hihbang thunawngkai om ahih manin gamthumna alengding tezong ki khakcip a, thuman akankhiatlaitak ahihi. Gamthumna lending ziakai, ahih keileh ki Cancel cihte pen athu om cih theihding hipah hi.

Hihbang in thupiang kankhiattheih nading in Al-Jazeera News pan Senior Presenter asemlaitak ahi Steve Chao pen amahleh amah Phunggyi (Priest) kineih a, mi kimante kikepna Immigration Detention Center ah valut ngiat hi. Tuasung panin amuhkhiat thumanlo te tu’n apulak khiata ahihi. Hihvai tawh UNHCR huangsung ah khanlawhna khat hongpiang dingin ki lamen giugiau hi. ZD Sawltak