Um Ken … ~ Lang Khan Khai

Um Ken … ~ Lang Khan Khai

Chin kihi lo hi cih tel napi, agen ngam lo, agen nuam lo, azahpih, aneubawl, amangthang dingin ZOMI pen Chin leh Tedim tawh avuknelh sawm, Biakna makaipi ahi a, sumbawl hau ahi zongin kumpi nasem ulian ahi a, galkap talpi ahi zongin tuate sangin tan 10 zo ta kei leh ZOMI HING aci linlen pa thupizaw hi.

Banghanghiam cih leh ZOMI ihi hi. Ihihna agen nuam lo, agen ngam lo mipil mihau miliante inawlkhin pak theih loh hangin tuban kum 5 ciangin tuate Zomi makai hinawn lo ding hi. Ut tale uh makai hinawn lo ding uhi. Mosi bangin aminam aa ding ahihnak leh apanmun atutna ahamphatnate nusia ngam a, amipite tawn genthei khawm ding ateelte bek makai hong hi ding hi.

Tu laitakin Chin leh Tedim kikhah thei nai lo hi. Ahi zongin Chin leh Tedim pen minampi min ahihlohna thu, tu-in igen kei leh zekai mahmah ta a, Mosi bangin ahen ngam, ahangsan, ka mite hong suaktasak in acingam ding mi khat hong om lel ding a, alangpang adodo mite maizum lel ding uhi. Ahi zongin Faro bangin bawlsiat ding asawm akiging makai mihau mipil ulian ginalo pawlkhat kithawithawi niloh ding a, amipih Zomite in tuate hangin gentheih thuaklawh pelmawh ding cih bel kitel muhsa hi. Tua hunte aven ciangin Faro lungsim neite hong bei ding a, Zomi Kanan gam iluah dingin Pasian in Israel mite aa dingin Palestine gam laizang abawlsak bangin hong bawlsak lel ding hi.

Kumpite tung ah akingate eng kei un. Zomi beisak dingte hi. Zomi zahuam kineih a, Zomi aseelmang sawmte um kei un, hong zuak mang ding hi. Zomi deihlote Zomi mah hi acicite peuhmah um kei un. A paulap bek uh hi a, tua paulap tawh ZOMI adaisak nuam uh hilel hi.

Abeh apau kibatpihte Rohinya hi ci-in ahawlkhiatmang sawm, amaan akisa a kumpi thumang hi ung acicite, ZOMI pen Kawlgam minam sung ah om kei, minam dang hi acicite peuhmah zui kha kei un. Asanggam abeh na hih hangin abeh lah hilo, asanggam lah hilo, pau kibatpih lah hilo, Zomi hi ci a, Kawlpau tawh kihopih lelte thupi asate in asanggam alaiguizom na hih hangin hong zah lo ding uh a, hong bawlsia dingte hi.

Zomite aw, Pasian mah muang ni. Tulai Zomi makai ulian mipilte pen ZOMITE aa dingin muan ngam nawn ding hilo hi.

Sunlezan thungetna nei ni. Pasian in mihingte in piang thei ding a a up loh, piang thei ngei dingin zong angaihsut loh, kumpi ngeina tawh zong kituak lo, hitaleh ama lungtuakte tung ah piangsak lel hi. Israel gam zong mi gam laizang abawlsak thei pa hi a, Zomite up Pasian ahi hi.

Ahun acin ciangin hong piang lel ding hi. Lang Khan Khai