U.S Gam Sungah Om Zomi Pawlpi Tuamtuam Ta Ding Lung Himawhna
Amasa in Zomi te in Pawlpi cih leh Kipawlna I cih khen siam thei nailo hi. Pawlpi I cih ciangin Lai Siangtho kammal kizangh hi a, kipawlna I cih ciangin leitung vai hi zaw kha ding hi. Anih tuak un ngimna nei tuak ding uh a, thukhun, kipuakzia te zong nei tuak ding uh hi. Ahi zong a ki lamdana tam simsim ding hi. Kipawlna pen Pawlpi daan in ki pai theilo dinga, pawlpi pen (leitung) kipawlna dan in ki paipih thei lo ding hi.
Leitung kipawlna pen amakai te leh a phuankhia te deihna bangin hong paipih dinga, (biakna) pawlpi ahih leh anei leh a phuankhia pa (Khris Jesu) deihna bangin pai ding hi. Leitung kipawlna pen leitungah tawp dinga, pawlpi pen vantungah tawp ding hi. Pawlpi pen Jesu neihsa ahih manin Jesu zia leh daan bangin pai ding hi. Tua Jesu zia leh daan pen a kammal sung bek pan ki ngah ding hi.
Pawlpi a pian ciangin theih huai thu pawlkhat om ding hi. Anuai a dotna te kidot huai hi.
1. Pawlpi in bang ngimna (goal leh purpose) nei hiam? Lungdamna thu genna, mimal nungzui suahhna leh gammial nasepna ding ngimna a om kei leh hih pen Jesu I gen pawlpi hi theilo ding hi.
2. Nasepna (ministry). Pasian tungah nasepna leh mihing tunga sepna ci in kal nih, thupi nih om den hi. Pasian tunga sepna pen biakna, phatna hi a, mihing tunga sepna pen hilhna, donna (hehnepna- kam tawh, neihsa tawh), hi ding hi.
3. Leitung kipawlna ahih leh gamgi (boundary) nei ding hi. Gentehna- nam leh beh leh pawlmin leh kampau, duh leh deih ki bang teng bek kipawl thei hi kha ding a, tua dan te ki thupi sak ding hi
4. Pawlpi ahih leh gamgi neilo in, beh leh phung, kampau leh minam, zia kibat nate kisam lo hi. Pasian in sisan neilo ahihman in sisan tawh thu genlo, kampau ki bang teng bek cih tawh thu gen lo ding hi.
5. Leitung ki pawlna ahih leh maitang gol- sum piazo, a pau ngam, a pil te ki thupi sak dinga, Khris pawlpi ahih leh kiniam khiatna, itna, Kha Siangtho makaihna leh daihna (peace) ki thupi sak ding hi.
6. Leitung kipawlna ahih leh mihing, makaipa ki bulphuh (human centered, Leader centered) hi ding a, pawlpi ahih leh Jesu ki bulphuh (Christ-centered) hi ding hi. Cihnopna ah, leitung kipawlna ah Makai te in amau bek kibulphuh ding ut dinga, pawlpi ahih leh Jesu ki bulphuh ding ki gen ding hi.
7. Leitung kipawlna ahih leh sum leh paai vai tawh thu ki gen ding a, pawlpi ah ahih leh Upna tawh kalsuanna, lungkim a PS biakna cih te ki bulphuh ding hi. Leitung kipawlna kipawl mite in a Makai te tung pan, kipawlna pan huhna lamen dinga, pawlpi ahih leh Pasian tungah a upna uh ki nga ding hi.
8. Leitung kipawlna in nek leh dawn thupi sak dinga, a ngah sum te uh nek ding bek in ngaihsun ding uh hi. Bel leh kuang lian pipi lei ding uh hi.
9. Pawlpi ahih leh PS aw ngai in, a ngah sum te tawh, gammial nasepna, mizawng, tagah huhna cih bangin hogn zangh ding uh hi. PS gamin nek na dawnna hilo in, itna, vangletna leh daihna ahihi.
10. Leitung ki pawlna in meeting tam pipi nei ding uh-a, Kha kipawlna in Pasian tawh meeting (thungetna) tampipi nei ding uh hi.
John T Hum
Ethnic Church Development and Research Center
Comment piaknop aomleh...