Kawlgam galkap vanleng mangcip “Y-8 Military Plane” kimuzonai tuanlo

Update:
Tuzingsang 8:18am hun in siluang pawlkhat leh vanleng themneng ki mukhiata cih Ministry of Defence in pulakkhia hi.

Myanmar, Tenasserim Region sungah amangcip Kawlgam galkap vanleng pen tudongmah kimuzonai tuanlo cih tuzingsang in VOA in genkhia hi. Zanni in DVB News te’n vanleng akiatna panin athemneng kimu cih apulak uhzong phiatkik uh hileh kilawm hi.

Hih galkap vanleng pen zanni Wednesday sunlam 1:35pm hunpawl in Myeik City panin Yangon City zuanin alen laitak amangcip cihi. Dawei City panin tai 20 na khawng atunkhit ciangin amangcip cihi.

Vandawn ah asanna Pi 18,000 asangin alen laitak in kizopna omtheinawnlo in, amangcip kici hi.

Tua galkap vanleng pen “Y-8F-200 Myanmar military plane” kici a, hih vanleng sungah galkap ulian pawlkhat zong tuang uhhi. Vanleng akia hiding in ki ummawh a, aki zonsan laitak hi ci’n Myanmar Tatmadaw in genkhia cihi.

Myanmar Department of Civil Aviation panin Deputy Director General Ye Htut Aung inzong zanni agenkhiatna ah amangcip galkap vanleng pen kizonsan ci a, ahi zongin kimuzo nailo cihi.

Commander in Chief Officer paninzong Statement akhahkhiatna ah hih vanleng bangci bangin mangcip cihpen genkhiat theihna omnailo chi.

Vanleng athemneng kimu cih thutawh kisai in Myanmar Ministry of Defence te’n nial uh cihi. Athemneng kimu cihpen khuasung mite genkhiatna hizaw ci a, tua akimu acihna lamzuan in Rescue Team te azongding in pai uh cihi.

Hih galkap vanleng pen March 2016 kum in Sengam panin akilei, “Made in China” ahihi. China panin galkap te’n alei khitzawh nai 809 lengkhin cihi.

Military Statement akhahkhiatna ah hih vanleng pen vanpuakna inzong akizang khat hi a, alenkhiat dingin vanleng tungah van akigawm in agihna 2.4 Tons pua cihi.

Hih galkap vanleng mangcip vaitawh kisai in thuthang tuamtuam ki khahkhia a, ahi zongin kumpi thunei te’n akician in muhkhiatna bangmah omnailo ci uhhi. Facebook tungah pawlkhat in vanleng akiatna Photo leh vanlengkia meikuanggawp khawng suahkhia uhhi.

Related: Kawlgam Journal Editor khat azumkhan sungah kithatlum ~ ZD

Nungkum February khasung in Naypyidaw vanlengkia ii Photo khawngtawh amelhzaugawp pawlkhatzong om ahih manin, thuman taktak kumpi thunei te’n agenkhiatma in up huai pahpah khollo hi. Amangcip vanleng pen atunga Photo sung ihmuhtheih galkap vanleng ahihi. ZD Sawltak #zomidaily