Twitter tungtawn in Malaysia gammakai agensiapa in RM9500 liautuak

Twitter tungtawn in Malaysia gammakai agensiapa in RM9500 liautuak

Malaysia gammi khatin Twitter tungtawn in agam makaipipa uh gensiatna kammal hoihlo zangkha ahih manin, Malaysia sum RM9500 liautuak cih NST pan kiza hi. Tua agensiapa pen nasep kician neilokhat cisawnsawn a, zanni Tuesday ni in Sessions Court in thukhenna atuak ahihi.

Malaysia Prime Minister Datuk Seri Najib Razak tungah zahkona kammal hoihlo azatkhakman in thusit atuak hi a, nungkum December 2015 in Twitter tungtawn in gensiatna kammal hoihlo azatman in avawhbang a at ahihi.

Tuapa minpen Mohamad Ariff Fadila Arbain kici Malaysia gammi khat hi a, thusitna akibawlna ah kamawh mahhi, kammal hoihlo tawh ka zahko khamah hi ci’n genkhia hi.

Malaysia thukhun “Section 233(1)(a) of the Communications and Multimedia Act 1998 (Act 588)” tawh kituak in tuabangdan in kisialkona pen liausum RM50,000 ki liausakthei a, thongzong kum 1 bang ki kiasakthei hi. Tuaban ah anih inzong thongkiat leh liausum piak ki thuahsakthei hi.

Gammakai amindaisakpa ii Twitter zatpen @SangAlgojoe Account tawh hi a, nungkum December 01, 2015 nitak 9:32pm hun in agelhkhiat Twitter laigual tungtawn in thukhenna atuak ahihi.

Twitter, Facebook leh Online Social Media tuamtuam tungtawn in midangte kobawl giapgiaptheih hisamlo hi. Malaysia gamsung ah hihtawh kisai thukhun “Malaysian Communications and Multimedia Commission (MCMC)” nei uh a, tua ihpalsak khakleh athu om bangin thukhenna kituakthei hi.

Kawlgamsung ahzong Online Social Media tungtawn in kigensiatna hangin thong akiatlawh omzelzel hi. Na laigelh ahih keileh na Comment piakin bang ngimna neihiam cih ngaihsut zelzelding kisam hi. ZD Sawltak #zomidaily