Tuzawh kum 50 khitteh Gamdang tung Zomi te bangci om ding?

Thu masa : March 30,2015.

Pasian in lam hong honsakna tawh Zomi te gam tuamtuam kitung ziahziah ta hi. Khat khat in ipai hun om a, nihnih thum thum in ipai hun om a, tu in alomlom in itung ziahziah ta hi. Ahoih lohna leh asiatna pawlkhat aom sam hangin ahoihna tam zaw tham tham cih imu thei hi.

Zomi te kumpi hongsawl hilo in Pasian hongsap :

Pasian in Abraham pen Ur panin Canaan zuan dingin asap na pen amah tawh limtak in kiho kithuah ding cihna ahihi. Tua mah bangin Zomi te gamtuamtuam ah itunna zong vaituamtuam ommah ding hi, ahizongin Pasian in geelna kician nei in amahtawh kithuah in ama aw izakbaihna ding leh ama adingin na thupi tampi isep theihna dingin hong geelsak ahihi.

Zomi te dinmun lui en kikpak ni:

1. Tualthak ngeite hi hang.

2. Pausia leh hamsiat azang ngeite hihang.

3. Mawhna kimaisak lo in akithuk te hihang.

4. Mailam thu akih ta mahmah te hihang.

5. Muhna neu leh ngaihsutna vision aniam te hihang.

6. Kuam lungsim leh khua lungsim bek anei te hihang.

7. Anungta Pasian tawh aki gamla te hihang.

Tu laitak Zomi te dinmun omzia en ni:

1. Anungta Pasian tawh kizop ding ahan ciam mahmah te hihang.

2. Muntuam tuam leh gam tuam tuam ah akitheh thang te hihang.

3. Innleh gam kizop zia ding ahanciam te hihang.

4. Kuam lungsim , awkaih lungsim leh behleh phung lungsim pan Minam khat lungsim ah a kalsuan te hihang.

5. Midangte pilna , siamna leh hauhna te izon mahmah laitak ahihi.

6. I muh leh ituah tampi tak athak ahih manin akisinsin te hihang.

Tu zawh kum 50 khitteh Zomi te bangci ding?

1. Anungta Pasian sungah limtak leh kiptak in nungta ding.

2. Zomi ihihna pen angtan pih bek lo in thupha ngahlawh pih ding.

3. Zomi ten I lai leh ingeina te leitung bup theih in kizel sak ta ding.

4. Zomi mipil misiam ten ihihna kiptakin dinpih ngam ta ding.

5. Gamtuamtuam ah Zolai sinna muntampi tak ah om ding.

6. Gam tuamtuam ah ei lai leh eipau tawh Pasian thuthuk sinna nangawn om ding.

7. Zomi te biakinn khempeuh ah Zomi service leh English service om kim ding.

8. Zomi gamdang atung ten Zomi leh Zogam avei na zahzah in panpih zo ding.

9. Leitung bup theih pih kipawlna tuamtuam lianpi pi te hongpiang ding.

10. Mimal budget leh innkuan budget bek hilo in Kumpi budget leh kipawlna lianpipi budget te tawh igam leh iminam te huh thei ta ding.

11. Zomi ihihna gengen hongkul nawnlo dinga, Zomi ahi nuam hongtam mahmah ding hi.

12. Zomi Pasian nasem te tu a sangin kizahtak leh ki it zaw ding hi.

13. Pasian nasem te leh minam nasem te tu a sangin mapang khawm zaw ding hi.

14. Zomi te lungsim sungah kipahtawina leh kipattahna thupi takin om ding hi.

15. Mipil leh mihau te kizahtak dinga, thumuh siamna hong om ding hi.

16. Zomi mimal kim in taih inn leh mawtaw cihte neikim ding.

17. Thungen tawm a zing an zong te hilo in, lungdamkohna tawh ankuang umte hita ding.

18. Pawlpi khempeuh in biakinn neikim ciatdinga, gamdang inntek te tungah tokaaina cihte omnawnlo ding hi.

19. Khantohna sang mahmah ding ahih manin ikidop ding pawlkhat hongom dinghi.

20. Thupha hongpia Topa tawh kizopna limci ineih den hongkul ding hi.

21. Zomi airways International cihte hong om ding a gam tuamtuam pan Zogam dong vanleng tawh kiciah thei ta ding hi.

22. Zomi mintawh company lianpipi te hong omdinga, gamdang ten nasep hong ngenkik ding uhhi.

23. I gam leh iminam sungah Kha leh taksa cidamna bukim hongom ta ding hi.

Thukhupna :

Pasian in Zomi te pen tulaitak khaici bang in hongtuh laitak ahi a, ikhantoh nadingin hongdal leh hong nawk kha pawlkhat aom theiding mah ahihi. Ahizongin tuzawh kum 50 ciangin ingaihsutna leh idinmun te hongkilam dang mahmah dinga, apicing leh alawhcing ngaihsutna te hong tam mahmah ding hi.

Abraham bangin ituntunna ah biakna tau lamding mang ngilh kei ni; Joshua bangin hangsan tak leh lungsim khempeuh tawh mainawk ngam ni; David bangin Topa leh minam adingin nahoih semdingin kiging ciat ni; Daniel bangin pumpi siangtho natawh dinmun sang lam enni; Nehemiah leh Esther te bangin I om omna leh idin mun mun pan in imite adingin kiphal takin palai na sem ngam ni.

Lai gelh :
Rev. Pau Khan Khai
Zosiam Gospel Ministry.