Tuunnu Itna ~ Dong Mung

Tuunnu Itna ~ Dong Mung

Thupatna: Hih i gelh ding tangthu pen a taktak maw; a taktak lo cih kitelcian lo-a, ahi zongin hi thu pen September- November 2011 Social Media tuamtuam ah kisuaksak Japan ziinliin hun lai a, thupiang kici hi.

A kisuahsakna tawh kimemat in encian ding hileng, March 2011 a Japan gam-a ziinliinna tungtanga thupiang hileh kilawm hi. Bangbang ahi zongin nute’ itna bangzah lian hiam, cih i kitheihsak nop luat manin hong suaksak ka hi hi.

A thu: Japan gam-ah ziin nakpi in liing-a, nasia mahmah ahih manin inn le lo kilim siat mahmah hi. Inn sangpipite kicim in kisia a, a si a liam le a mangthang zong tampi tak om hi.

Ziinliin khit ciangin cimawh huhte hong pai uh-a, a dam lai khawng a om kha hiam, ci-in hong ban et uh hi. Ban et kawikawi uh-a, a nungta mihing khat beek a mu kei uh hi.

Inn kicim in a siat mahmahna mun khat ah hong naih uh-a, hong et uh leh nupi khat a khukdin sa a om a mu uh hi.

Tua nupinu pen a khuk tawh dingin, a khut tegel in mun khat limtak in len hi. A nungta lai hiam ci-a, a khoih uh ciangin nungta nawnlo a, ama taksate khauh gemgam in a om hi.

Tua ciangin mundang zon beh dingin a pai khiat sawm laitak un, a makaipipa uh lungsim khat ah, “Hi nupinu om dan pen a nuailam ah selsim khat nei hileh kilawm,” cih khat a kilo keei hi.

Tua ciangin ama’n zong nupinu nuailam deuh panin a sawksuk leh banglo khat lawngkha kisa ahih manin, “A nuai ah na khat om hi, encian dih ni,” a ci hi.

Midangte in zong nupinu pumpi hepkhiat ding a lemtang theipen dingin sem uh-a, a lakhia uh hi.

Tualeh a nuai ah naungeek kha thum pha pan ding khat a na om hi.

A nau tuunna a lakkhiat uh ciangin phone(hand phone) khat na om a, a et uh leh message kigelh laitak khat a mu uh hi.

Tua message kigelh laitak in bang ahi hiam cih leh, “Na nuntak zenzen leh na NU’n hong it mahmah ka hihna mangngilh ngei kei in aw,” cih laimal ahi hi.

Tua ciangin naupang lakhia in a kem a khoi uh hi.

Thukhupna

I taangthu pen hiciang tawh tawp hi. Ahi zongin thu lianpi hong nusiat hi.

1). I nu hong itna i theihloh, i telloh hangin a luangkham zeen mah in hong it den i nu ahi hi.

2). Neih le lam, sum le pai, silh le teen tawh ama itna i thukkik zo kei phial zongin hong itna i telsiam sak ding a lunggulh i nu ahi hi.

3). Sihna ciau-gal a kai dongin ei ading mah deihsakna nei in, veina tawh a anglum ah hong kembit nuam den i nu ahi hi.

4). Leitung haksakna, gentheih liangvaihna le gilkial dangtaaknate ama liangko, ama luzang ah pua/thuak in ei lungmuang takin ama anglum ah hong lungtaisak i nu ahi hi.

Nute itna a telsiam kim dingin Topa’n thupha hong pia tahen. Lungdam, Dong Mung