Tuni UNA Meeting Ah

Tuni UNA Meeting Ah

Gamsung mualtungmite’ kipawlna lakpan gamvai ah amuanhuaipen aa kingaihsun ahi UNA (United Nationalities Alliance) in tukha 27-29 dong ni 3 sung bawlding acih Consultative Meeting tuni in Zangkong aa sai minthang mahmah ahi Royal Rose ah kipanta hi.

Kipawlna tuamtuam 41 akisam lak ah tuni 32 pai hi. UNA intek lampan in Paper Presentation (Ngaihsutzia leh dinmun lai tawh simkhiatna) neihtek dingin gelna omkhin aa ZCD zong UNA inntek khat ahih manin Paper Presentation piading lak ah kihel hi.

UNA inntek party te’n palai 2 ta puakding acihna tawh kizui in ZCD pan CEC member ahi Pu Khup Mung leh Pu Hau Mun Khai te palai in pai uh hi. Observer mi 5 ciang bang kikah thei ci ahih man in keizong observer in kava kihel thei hi.

Amun katun uh ciangin Programme Sheet hong kihawm aa ka et leh ZCD pan Paper Presentation piakna cih programme sung ah akihel ka mu hi. ZCD in tuabang kiginna nei hetlo ahih lam thei ka hih man in ka lung himawh mahmah ahih manin Pu Khup Mung’ kiang ah “Bang leh bang leh lai ih puaklohna thupen khatpeuh paulamh mai inla na kamtawh hong gensuk ziau in” kacih leh “Nang ma’n genmai aw” hong cih ciangin meeting ngimna tawh akituak dingin anuai aa bangin ZCD tangin kagen hi.

“Party thahatna ding leh MP candidate puakding vaiteng tawh buaicip ka hih man un tuni lai bawlsa in hong puazolo ka hih man un ka kisuang mahmah uh hi. Tuaban ah UNA ah deih bangin hun kong piak zawhloh ban vuah deihbangin hong kihel zo nailo ka hih man un hehpihna tawh hong thuak teetaa laiphot un. Kitel khit ciangin tu aa sangin UNA ah hun le nai, tha le ngal te tam kongpiak zawhna ding un ka hanciam ding uh hi. Kawlgambup vai ah UNA ii panlak ziading tawh kisai in ZCD in ka ngaihsutnate uh hih dan hi.

1. 2015 kum kitelpi pen nawkloh phamawh khat ahih manin thuman tak aa kibawl kitelna (Free & fair election) ahih theihna dingin pankhop huai hi ci’n ko party in ka mu uh hi.
2. Democracy adeih taktak mipi’ tangmi/MP atam theithei parliament ah alutding hoih kasa uh hi.(Khasum iplah man, minthan nopman, vang deih man, leh atuamtuam hang tawh kitelna adem hilo ding cihna)
3. Kitelna amankhit ciangin zong 1990 kum kitel lai bangin azote’ tungah thuneihna hong ap nuamkei mawk le uh bangcih ding cih zong ngaihsut kholh huai hi ci’n ko ka ngaihsun uh hi.
4. 2008 thukhun khelna/gelhphatna ding in democracy deih taktak MP atam theithei parliament ah thunzo leng tampi nuamtuam dingin ka lam en uh aa, SNLD te’ paizia mah bangin parliament pualam ah zong tha ih neihding thupi mahmah dingin ka um uh hi.”

Cihteng atom thei pen ding in nagen ing. Nitak lam teh zong RFA (Radio Free Asia) te’n zong hong interview uh in ka dawn theih tawp in na dawng ing. A broadcast uh teh abangci khah uh hiam cih bel kei zong ngaiman nai keng.

Lungdam ing

Mung Lan Thang/ Thangboi
Zangkong