Tungzang Times pan Ngalbual leh Thalmual lampi vai genkhiatna

Tungzang Times pan Ngalbual leh Thalmual lampi vai genkhiatna

Lampi vai thuman thutak – Abeisa May 14, 2020 ni in Tungsiah thuneite’n Ngalbual leh Thalmual kikal lampi pi 4′ azai miles 2/2 a ngetsakna tungtawn in May 22 ni in phalna ngah uh a, June 2 ni in nasep kipan uhhi. A gam sung anawk ding Tungzang Hausate kiangah Lai bangmah tunglo hi.

Thalmual manawh lo-in Tuithang manawh in lamsial a, Tungzang gam nawk in Logam leh Singkung tampi in sihlawh ahih manin June 2, 2020 ni in thumantak Ngalbual – Thalmual kikal a sep ding lunggulh pulakna Tungzang khuami pawlkhat in va kinei in khawlpah bilbel uhhi. ‘Tungzang in phallo’ cih tawh zum lam ah hong khia kik uh a, June 3 ni in zumlam pan Tungzang hausa makaite kiangah zaksakna lai tung pan hi.

Hih thumanlo nasep pen Tungzang khuabup kilungkimlo ahih manin tungsiah ah khawlsak kik ding ngetna lai kiphah a, June 10 ni in lamsial makaite leh Tungzang hausa makaite, tungsiah in zum ah sam uhhi. Khawlsak kik ding ngetna tungsiah lampan hong sang siam thei uh a, June 11, 2020 ni in tungsiah zum lampan khawlsakkikna Lai kingah hi. Phalna angah kik phial zong un amau thu tawh sem theilo ding a, zumlam pan gam vai thutheite in lamsial nading zawi zonsak ding” cih thu ahihi.

Tungsiah pan khawlsakkikna thupiakna Lai om himah leh lamsial zom veve in guuk sep veve uh ahih manin Khuasung pan mi pawlkhat in etcianna va kinei in kihawlkhia mang mah hi. Lamsialte lau in a Cycle te, Tuzum Tupeek te honkhat nusia in taimang mah uh a, mi 10 khawngbek na omlai uhhi.

Tungzang te’n Ngalbual lamzik te thusitna video clip

Ahizongin Khutlum molhtum tawh kisu ding cih bangin kikuan hi peuhmah lo a, tungsiahte thupiakna bangin a gamtat ding uh a kideih leh gencianna a kinei nuam ahihi. Phalna kician omlo in a sial ding lampi uh zo phial ta uh ahih manin Tungzang’ lo gam leitang leh singkung tampi in sihlawh hi. A kiphal lopi thatang suang a sep teiteina pen kithusimlohna khat ahihi.

A nih veina himawk ahih manin, khangno pawlkhat lungtomta in kamkhauh leh kammal hoihlo pawlkhat zangkhial in awng zaizai kha mah uhhi. Kammal hoihlo ahihlam zong athei khanailo khangmoino te ahih manin hong telsiam dingin kong lamen uhhi. Thagum thatang suangin khutlum kinga’k sawm peuhmah lo hi/kinga ngiat lo hi.

Gam le lei vei Khuasungmi kipawl cing ahih manin a awng zaizai pong uh hilel hi. A guuksep lam amau le amau kithei in kisuang uh ahih manin ataimang uh ahihi. A nusiat uh Cycle 7 leh Tuzum Tupeek pawlkhat kikepsak mah hi. A kiman hilo zaw hi. Bangmah kisuksiat sak lo-in hoihtak kikepsak hi.

“Ko tangpi thukimna tawh a sem hipeuhmah kei ung, ni tha 8000ks thalawh a sem hi ung” ci-in lamsialte in gen uhhi. “A nusiat uh a kikem Cycle 7 leh Tuzum Tupeekte pen Lamsial makaite in hong la henla, thudamtak in kihosiangna nei ni, ci in Khuasung makai khat in gen hi.

More: Ngalbual leh Thalmual lampi hilhcianna ~ Lianno Milun

“Kithudonlohna leh kimawlbawlna in Khua khat le Khua khat ki-it kilemna kiamsak ahih manin mailam ah hibangin gamta phialphial nawnlo in tungsiahte’ thu mang in Khua khat le Khua khat ki it diamdiam in i kizahtak diamdiam ding thupi hi, tutung bel thuma’n tawh a guallel himai hangh, lampi lah zo dek ta uhhi, ci-in lamsialna en cian Khangno khat in gen beh hi.

Kimuhdahna leh kigaal bawlna hipeuhmah lo-in ki-it ding leh kizahtak diamdiam ding deihna hizaw hi. By: Tungzang Youth Association makaite