Tungzang Global Association in MTI & TID te huhna pia

Tungzang Global Association (TGA) in MTI & TID te huhna pia

Huhngetna Kipankhia: I theihsa ciat mah bangin leitungbup pulnatna (Covid-19, Pandemic) hangin, leitung mun tuamtuam ah Kumpite’ thuneihna tawh kikhumcipna (Lockdown)kibawlin nasep maban zom thei nawn loin, nek le dawn cimawh tampi om hihang.

MTI & TID:

Tua bang kawmkal ah Malaysia le India (Delhi) a om Tungzang khua mite zong haksatna tuak tampi om hi. Hih Malaysia Tungzang Innkuan (MTI) te leh Tungzang Innkuan Delhi (TID)te’ a haksatna uh Leitungbup Tungzang Kipawlna (Tungzang Global Association -TGA) tungah huhna ngen uh hi.

Sum US$ 13611.25 Kingah:

Hih MTI leh TID te’ huhngetna tawh kizui-in, Leitungbup Tungzang Kipawlna (Tungzang Global Association-TGA) makaite’ vaihawmna tawh gamthumna a om Tungzang mite khempeuh tungah atawm atam cilo in, huhna kaikhawm uh hi. A munmun ah sumdong Palaiten akaihkhop uh sum le paii kingah vekpi US$ 13611.25 kingah hi.

Sum Piakkhiatna Nei:

TGA min tawh sum kingahte April 25,2020 (Sunday- 9:00am) Malaysia hunin Malaysia Tungzang Innkuan (MTI) leh Tungzang Innkuan Delhi (TID) makaite’ tungah Zoom Online tungtawn in sum ki-apna / piakkhiatna (money handover ceremony) thupitak nei in, leitung mun tuamtuam pan mipi 60 kim kihelthei uh hi.

Sum Hawmzia:

Malaysia Tungzang Innkuan (MTI) – Member 427 te’ tungah panpihna Rm. 35,949.00 piakhia hi. Sum hawmzia tawh kisai in, kumcingsa mi 328 te RM 90 ngah uh a, kum cing nailo naupang 97 te khat ciangin Rm.60 ngah uh hi.
Sum tam ngah Innkuanten RM650 ciang ngah thei uhhi.

Tua bang mahin Tungzang Innkuan Delhi (TID)te’ tungah panpihna sum Rs. 48460.98 kipiakhia uh hi. TID sungah member 74 pha uh hi. Innkuan 13 pha in, innkuan khatin Rs. 3000 ciat ngah uh a, Single kum cingsa khatin Rs.2000 ciat ngah uhhi. Naupang kum 5 nuai siahte zong akumzui-in satan ngah sak uh hi.

Pasian Nasemte Kihel:

Sum piakkhiatna hun (Money Handover Ceremony) ah gam tuamtuam pan Pasian nasem Dr. Cin Lian Sum (Kawlpi), Rev. Phung Lam Mang (Kawlpi), Dr. Gin Suan Lal (Australia ), Dr. Thang Sian Kham (Norway), Rev. Pau Cin Thang (USA), Rev. Niangh Sum Cing (USA) le agamgam pan makai khempeuh kihel thei uh hi.

Tungzang Global Association (TGA) pen abeisa 2009 kumin kiphuankhia a, leitung gam 10 val a om Tungzang mite kipawlna lianpen ahi hi. Pa Kam Lian Mung – President of TGA