Ih Tembawpi kua’n hawl ding? (Who should be our ship captain?)
“Hih Tembaw hawlding kei kalawm nawn kei hi.” UKgam EU referendum (mipi ngaihsut piakna) a kitheih June 24, 2016 ni in, David Cameron in Prime Minister dinmun pan a khawlna kammal a hihi. Mipi a tamzaw te’ deihna a zahtaakna hi aa, dinkhawl bengbang samlo in, makai thak kingah madong’ ka hihtheihzah in maa ka pang ding, ci-in lungduaitak in, UKgam mipi te tung’ kamciam zong a pia hi.
Gamthupi ah, makai gina aa’ kiciamteh te in, a mau deihna hoihmah taleh ‘mipi-deihna mah masak zaw’ cih hong kilang sak a hihi. Mipi te tang’mi a hih mahbang un, ‘Keithu bek’ ci samlo uh hi. Hihpen gam khangto sa te, mi picing te kalsuan zia hi aa, naupang te pheng ciakna, kimawlna hi dih lo hi.
Noah leh Moses te bang in, a masa, ahamsapi a nawk leh a phungiat ding in, Pasian teeltuam a om keibuang leh tu hun ciang’ mipite teelsa makai ki hi ta hi. Mipi in zong a maudeihna a phuzo ding, tuipi laizang aa pai I tembaw pen bittak in, lungtup tuang hong tunpih ding’ captain kisam hi.
Tua leh, I tupna munlehgam koi teng hi aa, bang tembaw zang in, tua tembaw kua in, hawlzo taktak ding hiam? cih ngaihsut ding hong om hi. Tupna kibang lopi, tembaw khat tung’ tuankhop huailo hi. A sawtlo in tuipi laizang ah I mangthang kha ding hi. Tupna kibang zong, a muanhuai tembaw zatding thupi aa, tua tembaw a hawlnuam pong hi loin, a hawlsiam taktak ding captain gina kisam pha mahmah hi.
Tupna kibang, tembaw kibang in, captain siam hi leh huihpi tuihual in hong suknawk hong tonawk zong in, mual I suak khawm pelmawh ding hi.
Zomi sung ah zong, Zogam leitang ngah mateng a ci om aa, mipang mah beelkhiukhau heuh leng a ci ki om tuak hi. Ni khat niciang khawlmun ah I kingak ding aa, Canaan Zogam mitsuan in I manawt khawm ding hi. Bangbang hi leh, I tembaw tek tuipi tungah omkhin zo hi. Tua I tembaw zat te’ a hoihding bek hilo in, a hawl thei taktak, a hawlzo taktak ding te’n saklehkhang nawkselo, lampial lo in, hawlhuai hi.
UKgam EU tawh kipawl nawtlohna-ma a tut ding Tembawpi a hawlding UK PM thak Theresa May neita uh aa, Kawlgamzong Democracy diktak ah hong puak ding NLD tembawpi kithawi liamliam ta hi. Zosuan lungtup hong tunpih ding GZA, ZCD, Zomi Council, ZYA.. cihbang I tembawte a hawlsiam ding kisam pha mahmah hi.
Mihing te’n pianpih leh sintheih siamna thupha tuamtek kinei aa, uut khempeuh leh uuk khempeuh kisiam zo samlo hi. Tembaw hoih pen I neih nang leh a puah a zuunding, a hawlding in I siamna muntek ah mun kipia, kizangsiam leh mapang khawm zo tek leeng.
Europe masuan in gunkuang(dingy) peuh tawh tuipi a kan African leh MiddleEast te’ tukum sung bek in tultampi tuikia in, sikhin zo hi.
Zosuan te, tuipi galkan ding kisasa tawh tuipi tung omlai leh tuipi galkai khin cihbang in leitung muntuamtuam ah sii leh naang in, kithehthang ta hi. Nang deihna bek na cih kikal in, tua Zosuan te kahna aw leh sisan in hong siik ta ding hi.
Zosuan te lungtup hong tunpih ding’ I tembawpi hawlding kua taktak hi ding hiam? Nantal’suan (https://www.theguardian.com David Cameron full speech na ngaihnop leh)
Comment piaknop aomleh...