Tulai simlei buaina Kei’ muhna ~ Pu Thangboi

Tulai simlei buaina Kei’ muhna ~ Pu Thangboi

Tulai Russia leh Ukraine buaina in ih lungsim hong sukha mahmah a ih lung himawh tek hi. Kei’ muhna atom in hidan hi.

Buaina Bulpi

NATO kipawlna sung ah Ukraine lutsak ding avaihawm uh ciang in Russia tangtel sihtan bang in omkhong thei nawnlo in akap phei mai ahi hi.

Bang hang ?

Ukraine NATO kipawlna ah lut mawk leh Russia pen Muvanlai kim lai Vamim suak ding hi. Saipi kimlai cikpi asuak lian ding ahi hi. NATO cihmawk pen gam 30 kipawlna ahih man in Russia tading in lauhuai mahmah hi.

US te’ Thangsiahna

Tutung Russia in Ukraine abusim pen US leh apawlte’ thang ah a-awk lian ahi hi. US in NATO tawh aphin ahi hi. Tu a dan a abusim ding adeihna mah ahi hi. Akikal ah bel Ukraine pen thang-antah suak phot sam ven maw.

Deihna

Russia in Europe gam a namgim leh gas azuak teng tu’n zuak thei nawnlo hi. US in zuak phei ziahziah lel hi. US in zong namgim leh gas anak hauh lua ahi hi. Sumbawlna ah zong tu’n Russia te leitang akisatna hita hi. Kum tampi thuak lai ding uh hi

Leitungbup in Russia mawhsak in world cup nangawn ah akihel kha nawnlo phot ding uh ahi hi. Russia te’ vanleng himhim amau’ gam nawk ding aphal nawnlo gam tam mahmah ta hi. Leitung in Russia a lockdown hita hi

Koi Lam Manawh

Russia in bel khiam tuan nawnlo ding hi. Maizum selna in Ukraine khuapi nangawn hong la khathei ding hi. Ahizong in Ukraine tawh ong kiho veve ding uh a sabuai tung pan buaina hong veng veve sam ding hi.

Ahizong in:

Russia apanpih mahmah ding a kilawm Sen nangawn in Russia panpih ngamlo hi. “kilemna bawl un” cizaw hi. Babu te’n zong Russia panpih taktak ngamlo uh hi. Russia ahuh pen leitung ah Belarus bek om hi. Kawl galkap misok te’n zong Russia te’ gamgatna thukim pih bilbel uh hi Russia tading hunsawt ading in baih samlo ding hi.

Ukraine Maban

March ni 1 ni in Ukraine in EU kipawlna ah luttheihna ding ngetna neita hi. EU pen gam 27 te’ kipawlna thahat mahmah khat ahi hi. Ukraine te’ ngetna pen EU sung pan: Bulgaria, the Czech Republic, Estonia, Latvia, Lithuania, Poland, Slovakia leh Slovenia

Gam te’n nakpi in panpih pah ahih man in manlang tuam ding hi. Ahizong in kiallap het-hat samlo ding hi. EU ah alut nunung pen 2013 kum in Croatia te hi a alut theihna ding uh kum 10 sawt hi. Tutung Ukraine ta zong kum bang zah sawt ding hiam kitel nailo hi. Peello bel EU ah aluttheih ma in Russia gal vai man khin ding hi.

Ukraine pen NATO leh EU te’ galvan sinna phualpi hong suak ding hita hi. Agam uh vut leh vai suak khathei ding hi.

Atungtham en leng Russia te’n azo tawh kibang ding a ahizong in hunsawt ah Russia zawm tektek in kungkeu ding hi. Putin zong amipi in deih nawnlo tektek ta ahih man in amaban limci hetlo hi

EU ah Ukraine te lutkhuan hong ngah leh NATO ah zong ngah lel ding uh hi. Tua hun teh Russia pen kongkaw tading hi. Tutung a Russia te’ suksiat sak khempeuh EU leh NATO in hun tomno sung in baihtak in lamkik sak ziau ding uh hi. Ukraine te’ GDP tam samlo hi.

Gal Pianna Ding Taktak

Tutung Russia leh Ukraine vai pen kisinna (testing) hipan zaw a galpi pian theihna ding taktak pen South China Sea vai hizaw hi. Tua vai ah kawlgam zong peng hetlo hi

Azenzen in tutung Russia te agualzo bang hileh Sen zong hong tuaci gamtat thei mawk ding a kilawh zak thei ding hi. Ahizong Sen mahmah zong tua ding ut nai samlo hi.

Tutung buaina pen Kawl galkap misokte zong patau mahmah uh hi. Ukraine gam a Russia te’ Crimea dan Kawlgam ah zong Sen te’ Crimea om ahih man in patauh huai mah hi. (Wa, Kokang, Mongla).

More: Russia & Ukraine tuukpeng kidemna ~ Bob Tuangpi

Leitung kivai puak dan akilaih tading ong hikhong e mataw. Pasian’ gelna khat bel om hi ngel ven cin. Leitung adeih bang a ahei Pasian mah napom tinten leng khialh omkei pen in cia mateh. Lungdam, Mung Laan Thang (Yangon)