Kim Tuang ~ Pu Thangboi

Kim Tuang ~ Pu Thangboi

Hong kimat madeuh ni 3 in asap November 26 ni hiveh e ih kiho tawpna. Minute 13 val tak kiho hang e mataw. Ih kithuah bel 2006 kum pawl pan hingel ven cin maw. Ih kithuah khaknate ah kaphawk deuhte:

1. 2006 kum in thautawi kipawlna khat phuat ding ki nakkup mahmah ve hang in maw. Ken lawmte ZRA camp dong va paipihto mah hiveng anung ah bang teng suak hiam thei nawn keng.

2. 2007 kum lutol buailai in nak pan mahmah ve hang in maw. Kei bel Zopuan silh in lungphona ah na kihel ing.

3. 2008 kum Vaphual Journal ih bawllai leh sticker campaign ih bawl lai phawk ing. Zogam ciahto khawm lai hang ma teh. “Vote No Campaign” (2008 thukhun akkeng piak ding mipi hanthotna)

4. 2009 kum Zomi Nam Ni dinner ah Rev. Khat ciahzo nawnlo in a hotel ah ih va kha ve leh ASSK’ huang ah John William Yettaw alutna vai tawh ASSK Insein gilbem ah thu kisit. Gilbem mai ah vapai zel ung.

Gilbem mai a tu U Win Tin leh Pu Cin Sian Thang photo lading in leitungbup ah lakkhia ding ih cih himah hiven mataw. A photo bel lamah hiveng ka phone pan computer zopna ding akhau neilo, zong manlo, kipelh suak hiau. Nak heh ngel teh mateh !

5. 2010 kum “Kalay Declaration” ah kei vakihel ing. Nang bel tualaitak Maesot ah om ngel veteh aw. Lai teng bel hong khak ing e.

6. 2011 kum kipat lam Philippines kazin sung Zomi te tawh va holim thei ung. Tua holimnate ZoNet ah ih khah ve leh. Kalai nong edit sak a na hoihsak zawzen ve leh

7. 2011 – 2014 Phillippines pan kaciah teh kei hong kiman ta. Nang lah asawtlo a saikel accedent. Asawtlo a Pu Cin Sian’ zi in hong nusia lai. Tua kum bel ih vek in tuahsia mai hang e. Gilbem kalut madeuh a Pu Cin Sian in “Ei pawl bang ih suak mawk tam maw” hong cih pen ka bilkha ah luai den e. Amang in kihil hi ngelngel in um ing e

8. 2015 February 26 ni gilbem pan ka suahtak ni aphual ah hong dawn cia mateh. Tua ni a hong dawn teng bel mangngilh thei het keng. Gilbem ka omsung zong ki thuzaza hang e

9. 2015 – 2019 hih Hun sung bel ki tam thuah kha khang e mateh. Kei lah gospel pai in thamang ing. Eh !!! ZRA in Tauleng ah Ong thuhilh khit deuh in Kawlpi ah ih kimu ve leh. Thu kong ngetsak ve leh. Hih kum 5 sung bel kiho zel kitawng zel hang e mateh. Nang bel nuak thei kei cin hampha cia. Na lungsim ah nainganzi bekbek a om himai veh aw

10. 2019 kum bei kuan teh Sayama Dim Lun Mang meitei te’n hong thahsakna vai tawh deihtak ih kithuah kik ve leh Tedim ah lungpho ding ih gelkhit teh ani ding nang’ thu in Sunday na nakipsak mawk a ih kitawng lai ve leh. “Sunday ahih leh kei hong paithei loding kahi. Ka khasum sanna ka zahtak kul ding” kong cih leh “Nong pailoh ding lam kuamah nagen sedah o” nong ci ve leh

Tedim lungphona khit teh Yangon ah ih paisuk khawm a Orchid Hotel ah Press Conference ih bawlkhawm ve leh. ASSK leh apawlte ICC ah thu akisit laitak tawh akituah khak sese hang ih thugente media te’n hoihtak hong suaksak veve sam uh e mateh. Dim Lun Mang’ Vai ah leitung lok zo gawp hang e.

11. 2020 kum sung bel kitelna hang tawh ki thuahkha khol khang e. Kiho zeuhzeuh zel cih bek hi. Eh !!! Kaphawk vat ve leh !!!

Kitelma khat vei Tedim ZCD zum ah ih kithuah kha ve leh. “ASSK te Van Thio tekhawng asawtlo in kiman lel in cei” kacih leh Pu Thang Tuan Mung bang aheh peuhmah ve leh. “Mawk ciakciak kei vo” ci’n hong paikhiat san ve leh

12. 2021 kum teh ami in ih kimuh loh hang online pan kimu zel sam hang e. Thu dangte ah ih muhzia akibanglo tampi a om hang tutung buaina vai ah ih mudan kibang bilbel mah hiven.

Ih kimuh tawpna

October kha kipat lam hi’n teh. Cikha ah Covid vaccine kisun na ciahsuk lam inn ah nong baang ve leh. U Pau Lun’ nau Kimnu tawh nai vevua leh. “No gel Ong zawltai maw?” Kong cih leh “Hai ciakciak kei o” nong cilai ve leh.

Ken tuani ih kimuh tawpna ding salo hiveng !!! Ih kiho tawpna bel November 26, 2021 ni nahi e mateh. Zogam Army vai kikum hang e mateh. Kua te hiding hiam cih ih upmawh kigen tuak hive hang. “Zogam Mungno nadong ning ei” naci ve leh. Na dong man hia?

Tua ih kiho khit teh Zogam Charter photo nong khak lai ve leh. Tua laibu tawh nong zintoh ding lam lah nong genkei mawk a. Ong genkha hile cin “Na laibute mawtaw tawh atuam in paisak o” Ong ci ngelmah ding hiveng.

Thukhat ah bel Ong kimatna mun ah khualzin mite alah uh laibu pen Zogam Charter himaw hilo cih kadot theihna ding in nong photo khak bel kizangh thei peuhmah bilbel e.

More: Tauleng thupiang ZRA leh Kim Tuang vaitawh kisai Siamsin kipawlna pan tangkona

Hong kimat ni in Tedim ah sun an naging un nacih sa himah hiven mateh. Nuam sakei sing e lawm. Vingveng mawk! Zogam Charter khuambulpi suak hiau naive maw. Khang sawnsawn te’n na khekhap hong zuizui ding uh hi. Ut takei leng Mangpha cihmai kulve maw. Nong-it, Mung Laan Thang (Tawmvei, Yangon)