Australia gamsung ah gulut tangmai nekhial in asi mi 4 phakhinta

Australia gamsung ah gulut tangmai nekhial in asi mi 4 phakhinta

Australia ah tangmai namkhat ahi “Rockmelon” nekhial in asi mi 4 phakhinta hi ci’n Australian Authorities te’n Wednesday ni in genkhia uhhi. Tua Rockmelon tepen Listeria kici gu namkhat lutkha in, tua Rockmelon anekha akigawm in mi 17 bang cinatlawh khinta uhhi ci’n AFP te’nzong genkhia hi.

Hihvai pen Health Official te’n nungkha panin akankhiat uh hi a, aki patkhiatna pen New South Wales (NSW) State panin aki pankhia ci uhhi.

Hih Listeria gu alukkha Rockmelon anekha in asi pen Australia, New South Wales (NSW) State sungpanin mi 2 omkhinta a, Victoria State sungpan inzong mi 2 omkhinta hi ci’n NSW Health te’n genkhia uhhi. Tuaban ah hih Rockmelon anekha acinatlawh pen mi 2 kibehlap in, tuciangciang akigawm in mi 17 phakhinta cihi.

NSW Health panin Communicable Diseases ah Director panmun asemlaitak ahi Vicky Sheppeard in agenkhiatna ah tuabangin gu alutkha Rockmelon (Cantoloupe) tepen February 28 ni akipan Market te ah zuaknawnloh dingin kikhamcip in Recall kibawl hi ci’n genkhia hi.

Kumsim in Listeriosis gutawh acina te lakpan sehthumsuah sehkhatpen siden uhhi. Ahi zongin abeisa ah Listeria Outbreak aom ciangin Rockmelon tawh kizopkhakna omngeilo hi.

More: Tukumsung thokang natna “Dengue Fever” hangin Myanmar gambup ah misi 170 phakhin

Listeria cihpen Bacteria namkhat hi a, mi atamzaw in hih Listeria akihel nektheih te anekkhak uhciangin cinatlawhliang cihbang omlo hi. Ahi zongin akumtamsa khanghamsa te leh nupi naupaai te, Diabetes leh Cancer natna aneite adinginbel lauhuai theihi ci’n Director nu in genbeh hi. Sawltak #zomidaily