Tulaai Leitung Thuthang Tuamtuam Updates September 29, 2014
· Hongkong gam ah kumpi vaaihawmna deihlo leh Democracy diktak lunggulhna tawh mipi tampi tak in September 28,2014 ni in Lungphona nei uha, Palik te khitui luansak thaute tawh kaapgawp ahihman palik leh mipikikaal sona kiliamsuahna dong nasiatak in piang hi. Mipi te in September 29,2014 nizong nasiatak in lungphona zomto suakding in geelna nei uhhi.
· Iraq gam IS migilo te phualpi lian zawdeuh ahi Falluja, Amariya al-Falluja khuapi teng US leh Apawl te in September 28-29 ni sun le zaan tatsatko in kaap uha, Iraq gaalkaap te in zong Leilampan atha neihzah mah un nanawk gawp uh ahihman tamsimsim kikgo zo hi ci in Iraq kumpilam thunei te in taangkokhia uhhi.
· Kumpi kiteelna abawlzawh uh sawtkhop khat sung mee tang vaai a abuai Afghanistan gam sung Kumpi ding a teelcing makaai ahi Dr Abdullah leh Mr Ghani kikal thukimna hoih mahmah khat ongnei uha, tukithukim na dungzui in Mr Ashraf Ghani Afghanistan gam I President ding in September 29 ni in kiciamna la taktak ta hi.
· 2014 kum sung bekbek in Mediterranean tuipi tung ah gambelh ding zong peemta mi 3,072 Europe gamlam zuanding te in anuntaakna uh beilawhkhin ta hi ci in Gambeel vaaisai International Organization for Migration ( IOM) te in September 29 ni in thusuah taangkokhiatna bawlkhia uhhi.
· Belgium gamte in IS migilo tawh kizom hiding a upmawh Belgium gammi 46 te September 29 ni in Court ah sam uha, mi 8 bel court ah kah in adang mi 38 te Syria gam ah pai a si maw ahihkei leh bu mang maw cih Belgium kumpi theunei ten telcian tak a akan laaitak uh ahihi. Europe gambup pi pan IS migilo te huhding mi 3,000 kuankhia ci in Prime Minister David Cameron in nungkaal in genkhia khin hi.
· Ukraine gam Donetsk khuapi sung a om International vanleeng tual naaihuai teng ah Ukraine gaalkaap te leh Russia deih migilo te September 29 ni in nasiatak in kikaap uha, Ukraine gaalkaap 7 in nuntaakna beilawh ci in kumpi thuneite in genkhia uhhi. Hihthu hang in gaalkidona kikhan semsem ding ci in Ukraine ten gen uhhi.
Lungdam
Thang Khawm Pauzomi
Comment piaknop aomleh...