Tulaai Leitung Thuthang Tuamtuam Updates June 2, 2015

Tulaai Leitung Thuthang Tuamtuam Updates June 2, 2015

· Sengam tawlam Hubei Province sung a om Yangtze Guunpi sung Khualzinmi 458 apua Tembawpi khat June 2, 2015 ni in kibung a, Kumpi thunei te in mi 14 honkhia zo in mi 5 si in adangteng tuisung ah mangthang laai ahihman in kumpi thunei te in zongsaan uhhi. Mi 14 ahotkhiatna sung vuah Tembaw hawlpa zong kihel a kumpi thunei ten manphot uhhi. Tembaw kibutna ahang peen huihpi leh tuihual in nawkkha ci in Tembaw hawlpan gen a kumpi thunei ten kansaan laaitak uhhi.BBC

· US te Gaal Tembaw pi Vom Tuipi ( Black Sea ) tung ah acimvaak hialhial laaitak June 1,2015 ni in Russia te gaalvanleeng SU-24 tekhat in meter 500 bek kigamla in vaanlaai ah aleenkhawm in US Tembawpi vato a, Mitheem kipiazakzak uh in kikaaptaktak samlo uhhi. Nungdeuh mahamh inzong Sweden leh UK gamgi dung ah Russia gaalvanleeng te phalna lalo pi in leeng uhhi. BBC

· Asia gam tawlam teng akituhtuhna uh South China Sea tung ah Sen ten Gaalphualpi or khawlmun alamna hang in buaina lianpi piangtheiding hi ci in President Obama in June 1,2015 ni in Southeast Asian khangno makaaite tutkhopna White House ah genkhia hi. China tenbel US te ki sasiphum nading ahang omkei ee, hih kalam nahang un leitung in phattuamna tampi angahnading hi cihsan uhhi.Nungsung teng Galvantawh kingim uha, tun Kampau tawh kingim leuleu uhhi.VOA

· Thai kumpi thunei te in Gaalkaap Maangpi Lieutenant General Manas Kongpan kum 58 Thailand gamsung kantan in mipuasim, mizuaksim cih mawhmatna tawh matding in June 2, 2015 ni in taangkokhia uhhi. Malaysia khawng leilampan ipaitheihna, Kiman in Thailand pan Malaysia iluutkik theihna kheempeuh ama vaaihawm hihtuak hi.CNN

· US gamsung ah 2013 kum Census tungtawn in a et uhciang US gam onglal gambeel mi 41million phata a, gambup milip 316miliion I 13% phata ci in June 1,2015 ni in taangkokhia uhhi. Hih gambeel te lak ah Mexico tampeen in 41 million I 28% hi a,anihna ah China,India leh Hongkong hia, 5% pha in atamzaw nasem leh sangkah ci uhhi. Philippine te 4%, Veitnam,Cuba,Korea leh El Salvador te 3% pha uhhi. Kawlgam mi khawngbel kidawkpak nai khang ei.VOA

· Iraq gam Samarra khuapi pan KM28 kigamlaatna a om Iraq palik zumpi IS migilo te in June 1,2015 ni zankim pawl in buluh in Bomb puakkham sakgawp uh ahihman in Palik 34 si in 48 naakpi tak in liam uhhi. Kum khat sung bang IS te dialkhai vom akikhai diangduangna Falluja khuapi IS te khutsung pan lakhia kikding in June 2, 2015 nipan Iraq gaalkaap te nasiatak in kuan uha, asun azan in vikpahziahziah ding ci uhhi.CNN

· Singapore khuapi sung ah May 30,2015 ni a kibawl US Defense Secretary Ash Carter leh Leitung gamtuamtuam pan gaalkaap Maangpi te thukikupna ah ngongtatding a aluutsawm mikhat Singapore palikten kakap lum uhhi ci in taangkokhia uhhi. Hih mingongtat swampen mawtaw tawh apai hia, palik ten akhawlsak hang khawlnuamlo ahihman in kikaplum ci uhhi.CNN

· Nigeria gam tawlam Onitsha khuapi sung a om Namgimtui zuakna phualpi khat Namgimtui pua Mawtawpi khat in June 1,2015 ni in phugiap a, namgimtui peen kawlgam dan mah a gallon tawh aleiding ten angakdimdem ahihman in mitamsimsim lak ahihman in mi 69 si in 35 in liamna ngah uhhi.CNN

· US gamte in Cuba gam leitung migilo te ahuhgam ci in Minnin ciaptehna ( Black List) pan May 29 ni in kahemkhia taktak ta uhhi ci in taangkokhia uhhi. Ahizong in kiho nadung zui in avom pan akang ah kilaih taktak dingmaw vomlo kaanglo ah kikoih laaiding kithei naailo ci uhhi. CNN

· India gam sung ah khualum luatna hang in misi 2,200 vaal ta a sakhi in luitui luangsialsial alunggulh bangtek in khuavot alunggulh mahmah laaitak in munkhenkhat ah guahzu in huihpi bangtawh kithuahliang ahihman in lungdam mahmah uha, ahizong in alumphatdiakna Andhra Pradesh leh Telangana state te ah nikhat lum mahmah laaiding ci in India thunei te in June 2, 2015 ni in taangkokhia uhhi.VOA

Tusung teng buailua mahmah kahihman in thuthang onghawmzo denlo kahihman kisuangtaak mahmah ing.Ngaihdam bawm ah nakhiatsak unmaw onghanciam ning ei. Lungdam, Thang Khawm Pauzomi