Kenya gam College thau kikapna hangin mi 70 sikhin

Kenya gam College thau kikapna hangin mi 70 sikhin

Kenya gam aom College khatah Thursday ni in Al Qaeda tetawh akipawlkhawm Terror Group khat ahi Al-Shabaab te in sangnaupang te thautawh kapgawp uh a, tuni ciangciang akizakna ah mi 70 sikhin cih Fox News in pulakkhia hi.

Al-Shabaab thautawi migilo te’n agenkhiatna ah “ka khutsung uh ah anungtalai Christian tampi neilai hi ung” ci’n genkhia hi. Christian te hong bawlsia in hong thatlum mangnuam uh himawk hi.

Al-Shabaab thautawi te ii Spokesman Sheikh Abdiasis Abu Musab in Sky News te kiangah agenkhiatna ah sanginn sung ahzong misiluang tampi omlai cimawk hi. Asi khempeuhphial pen Christian vive cisawnsawn hi. Tuaban ah akhutsung uhah Christian honkhat anungtalai in kem uh a, sanginn sungahzong thau kikapna khawlnailo hi cihi.

Kenya kumpi lampan inzong lehdokik uh a, Al-Shabaab thautawi migilo tezong mi 2 sikhin hi. Kenyan TV te genkhiatna ah kikapna Operation manta a, ahi zongin asi aliam pen tampi omding in ki ummawh cihi.

Hih Kenyan College ah Student Union Vice Chairman asem laitak ahi Collins Wetangula in agenkhiatna ah hih thautawi migilo te sanghuangsung ah honglut uh a, sangnaupang te Christian nahiam? Muslim nahiam? ci’n bandot ngekngek cihi. Christian hi ing aci peuhmah tuamun mahah kaplum pahpah uhhi.

Sanginn sungah a awkciplai atawmzaw pen numei kum 20 gual vive hihtuak a, Christian vive hihtuak sawnsawn hi.

Amau adingin thungetna ah ih phawkkawm in leitung mawhna pan hong tankhia ihbiak Topa’ Zeisu Thawhkik Pawi, Easter Pawi nuamtak azangthei dingin Topa’n Zomi te mimal khatciat thupha hongpia tahen! ZD Sawltak