· Syria gam Idlib Khuapi May 31, 2016 ni in Russia Gaalvanleeng ten nasiatak in sim uha, abu amang kuamah khuallo in banzial ahihman in mipi 50 saang atamzaw si hi ci in Syaria gamsung encik pawl in taangkokhia uhhi.CNN
· IS migilo te ukcipna Iraq gam Fallujah khuapi Iraq gaalkaap ten lakik ding in abeisa kaalkhat pan nasiatak in gaalkaap athuangthuang tawh sim uha, May 31, 2016 ni hialbawlding in akithawi laaitak un IS lampan nasiatak in nalehdo uh ahihman in lazonaai paklo in kikaapna nasiatak in piang hi. Numei naupang tamsimsim si ahihman in UN zong patau mahmah uhhi.VOA
· 21 Century Panglong khawmpi dingtawh kisai in Vaaihawmpawl NLD kumpi in May 31, 2016 ni in phutta a, Kumpi lui a dollar a million asim anetum MPC peen NRPC tawh laih uhhi. Mualtungmi thautawi kumpi tawh kilemna aneinailo te zong tawh kimu in Thautawipawl, Hlutdaw leh Kumpi thuvaaihawmpawl, Agualzo Party te cihbang in adeidei in bawlding ci in gen uhhi. Chin State ai awh in Minam party gualzawhna angah ZCD ongding ding hita a, Thautawi pawlpan CNF kilam en mahmah himah leh Gaalkaap Maangpipa Min Aung Hliang in CNF peen thautawi hikilkel kei cimawk ahihman in CNF peen CSO Lam ah ZYA tepawl tawh ongdingkhawm theibek ding suak hi. Tua ahihman Chin State ai awh thautawi ding in ZRA omlaai a Pu Thang Lian Pau in Lamka kuam ongnusia ngam taktak a ongdin ngam leh Zomi te ading in lam etna omlaai hi. Ahizong in Lamka kuam mah nuam ongsakzawk leh bel Meitei te maw, Naga maw ongkigolh khading uhhi. VOA
· Philippine gam te I Parliament dawl nih te in May 31, 2016 ni in Philippine gam President thak liklek ding Rodrigo Duterte kipsakna neita uhhi. Amah peen Philippine gam te I A 18 na President a hihi. VOA
· Leitung ah Asau peen leh Athuuk peenpeen Leisung hawm Meileeng lampi Switzerland gam te in June 1,2016 ni in honna neita uhhi. Meileeng lampi minpeen Gotthard Base Tunnel kici a Erstfeld khua pan Bodio khua kikaal vutlet in 57.5km sau hi. Kum 17 sung lam uha, $12,500 million bei in mimal 2,600 in lam ciatciat uhhi. Leitung ah asaupeen nihna Japan gam ah om in Seikan Tunnel kici a 53.0 km sau in 1988 kum in kihong hi. Athumna peen Eurotunnel kici in French-UK kikaal ah om in 1994 kum in kihong a 50.5km sau hi.
· North Korea ten Ballistic missile kici thaupi namkhat May 31, 2016 ni in South lam ngatsa in lawnsin uha, adeihna mun uh atuk ma in leengthei nawnlo in kia ci in South Korea kumpi thunei te in genkhia uhhi. Tua banah Party Vice President a ateelthak uh ahi Ri Sung-yong China gam ah mawhsuutna bawlding in May 31, 2016 ni in vakuan khai thelthal ci hi.BBC
· Afghanistan gam Kunduz khuapi leh Kabul kikaal ah ataai Bus pi nih June 1,2016 ni in Taliban migilo te in khawlsak in khuazin mi 185 vaal mancip in 10 thatlum uhhi. Adang acianlaai teng hotkhiatzawh nading Afghanistan kumpi ten ahanciam laaitak uh ahihi.CNN
· Kawlgam Suang manpha zuak kipawlna ten sum neihkhop ding a akidon uh Euro sum 90m atun aban na ongsit sak un ci in NLD tetung leh Hlutdaw ah May 29,2016 ni in laai puak uhhi. Hih sum te peen President luui Thein Sein leh Minister pawlkhat in zong nathoh sim ciin genbeh uhhi.VOA
Lungdam mahmah
Thang Khawm Pau ZOMi
Bowling Green , Kentucky
USA
Comment piaknop aomleh...