Tulaai Leitung Thuthang Tuamtuam Updates Jan 2,2015

Tulaai Leitung Thuthang Tuamtuam Updates Jan 2,2015

· Australia ah Zomi Siavuan (Doctor) suakthak – Tedim khua, tuun, Sydney khuapi aa ateng, Dr James Suan Za Dong ( Dr Dong No) leh Dr Maisie Dong-te nupa’ tanu Lia Cing San Niang ( Sandy Dong) in, December 18, 2014 ni-in University of Western Sydney panin MB,BS Lukhuneelkaai ong ngah khia aa, Australia gam Zomite sungpan pilna saang Lukhuneelkai ngah ong ki thuap toto ahih manin ong deihsak i biak Pasian’ min lungdamna tawh kipaakin i phat hi.

Mailam ah Zomi khangno tampi-in hi bangin pilna sang lam ah i gualzawh nadingin i tu i tate tha i piak ding kihanthawn ciat ni.

Tu hun ciangin khangno tampi tak in a nu leh apa ban cihthadah in, a ban zolo tampitak ki om kawmkal ah Dr. Cing San Niang ( Sandy Dong )in a Nu leh a Pa tawh ki zakim in pilna ongngah ciangin et teh taak leh khangthak khangno te in a mah bang mah in mi i kheng zokei zongin i Nu leh i Pa ciat beek i batzawh nang hanciam ni.

· December 28 ni a Indonesia leh Singapore kikaal a kia Air Asia 8501 tung tuang mihing 162 lak pan January 2,2014 ni in Mizongpawl in misi luang 20 muhbeh uha, tu in misi akitawmsa luang 30 cingta hi. Vanleeng banghang in tuahsia cih akitheitheih nading in vanleng I black box ahahzon mahmah laaitak uha hihi. US, Australia, Indonesia, Malaysia leh Thailand pan ahuhpawlkhat in na aseemkhawm uh ahihi. bbcnews.com

· Saudi Arabia gam te in kumpipa King ahi Abdullah Pneumonia ( Tuapnatna ) tawh December 31 ni in zato ah kipuaka, anatna huaisia semsem ahihman in January 2 in Siavuan ten limkep mahmah ci in Suadi theunei te in agen kawmkawm un ama zalaihding kua kivaangkhuam leh hoihding cih zong buai mahmah uhhi.bbcnews.com

· Brazil gam Workers Party makaai leh President aseemlaaitak ahi Ms Dilma Rousseff kum 67 in 2014 kiteelpi na ah zomawk ahihman in a Term nihna nasep kipanding in Brasillia khuapi President Innpi ah Jan 2,2014 ni in kiciamna leh mipi atul athen maai ah kamciamna thungenna te nei soisoi mai hi.

· Syria gamsung tualgaal kipat 2010-2014 kum 4 sung in mi 76,000 si a, 17,790 te peen mipi mawhna neilo hi in 3,501 te peen naupang meelmawl bangmah theinaailo cikzeet huai mahmah te hi ci in UK bulphuh Syria gam sung omzia encik pawl in January 2,2014 ni in thu taangkokhiatna nei uhhi.

· Israel Prime Minister Benjamin Netanyahu te party ahi Conservative Likud party makaai kiteelna ah makaaipiding in Netanyahu mah January 1,2014 ni in kiteelkik hi. Ongtungding March kha kiteelpi na ah Benjamin Netanyahu in Prime Minister demkik thei bektham lo in ngahkik maikhading in akilam etna thu Tel Aviv khuapipan Jan 2,2014 ni n genkhia hi. voanews.com

· Pakistan gamte neihsa ngabeng tembaw neukhat apuakkham thei van pawlkhat puakawm in mi 4 tawh India gamsung Jan 2 ni in luutsimsawm a India Border Force ten nazandelh pah in aphak lian leh puakkham in atung a tuang mi 4 si ci in Indian Border Force thunei te in genkhia uhhi. December 31 nipan tuni dong India leh Pakistan gamgidung ah Meikuang kikheekna leh misi kidemna nasiatak in bawl uhhi.voanews.com

· South Korea gamte in North tawh Ulian te kihoding cih December 30, 2014 ni a athusun natawh kimeizom in North Korea Leikha Maangpi Kim Jong Un in South makaaipi te tawh akisap leh kiho tohtoh ding in geelna kanei a akuulphial leh zong South President Pak tawh zong kaki homaiding ci in Jan 1 kumthak thupha puaktawh kizom in genkhia hi.

· USA gam sung state 20 ah khasum naitha 2015 kumpan khangta hi. US gambup ah Mikhat I naithak aniampeen $7.25 ding a kumpite ciangtan hi a mitampi tak hihtawh nungtazolo ahihman in Nungkumsung deihna lah nasiatak akibawlna hang in US gamsung a tualniam mipi 2.4 million te naitha aniampeen $8 ah 2015 pan kikhangsakding hi. President Obama in aniampeen $10.10 hileh ci a athusun napeen Republican Party ten na suihkhiat sak ahihman in kisangzolo suak hi.

· Japan gammi nungakcing kum 22 apha Buddhist biakna tawh kisai thutelkan khat December 26 ,2014 ni in India gam Bihar state sung ah India gammi Pasal 5 in lam hilh kineih in nakeemcip uha, tuabek hilo avangtuamtuam te nahuhksak kawikawi uh ahihman tua migilo 5 te lak ah 3 January 2 ni in India palik te man uha, 2 zongzong laai tak uhhi. abcnews.com Lungdam, Thang Khawm Pauzomi