Tuihual leh Hun in kuamah ngak lo hi ~ Dr. Sian Za Kham

Tuihual leh Hun in kuamah ngak lo hi ~ Dr. Sian Za Kham

Hih thulu pen Mangpau in, “Tide and time wait for no one” ci hi. Hih paunak pen a ciapteh huai khat hi, cih gen nuam masa ing. Tuipi kianga teng mite in tuipi huai tawh kizomin limtakin tel phadiak ding uh hi. Tua mah bangin hun i cih bang hiam cih pen leitung mihing a kua mapeuh in limtakin thei tek ding uh cih zong gen kul lo ding hi. Ahi zongin, hun manphatna pen limtakin theih huai lua ahih manin, hih thulu tungtawnin kikup dingin kong telkhia hi.

1. Hun pen mihing khempeuh in lei kul lo a, i neih na khat hi.

Leitung ah, kumpi lian pen pa a kipan mihing a zawng a mang in, “hun” kinei ciat hi. Dangka tawh kilei thei lo, a man tuat le hang tuat zawh loh zah a, na manpha in, “hun” ahi hi. Israelte prime minister a sem ngei, a minthang mahmah khat ahi, Simon Peres in hun manphatna hi bangin na gen hi. “Time is the most precious commodity in the world. Not a minute should be wasted”. Hun i cih in i neihsa na khempeuh lakah manpha pen hi. Minute khat zong mawkbeisak ding hi lo hi, na ci hi.

2. Hun khintoh nilohna in hun guuta ahi hi.

Hih tawh kizomin, tu mahmah a i sep theih na khat pen khinto to lehang i hun manpha pi a taan hi hang a, zan ihmut kaal a, guta khat in i van manpha ong guksak tawh kibang hi. Van khat peuh i mansuah teh kizong kik thei a, hun zat siam lo a, i mawk beisak leh cikmah hunin kingah kik thei lo hi.

3. Leitungah hun maan ding thupi lua hi.

Mangpau in, punctuality kici hi. Hun maanna pen thupi mahmah hi. Hun maan i cih ciangin, nasep silbawlna ah minute khat zong zekai lo a, a hun maan lianlian a sepna, zongsatna neihna ahi hi, Gentehna in, sangnaupang khat sangkah hun lap lianlianin ni simin a khan sungah zekai hetlo in tung lianlian leh, a sia te’n pakta bek thamlo in, a lai zong vuanzo in, a gol ciangin mi pil leh mi lianpi suakto thei ding hi.

Kumpi nasem u lian khat in hun manmanin zumkah leh a tungsiahte pahtaak ngahin, za khangto in minphatna zong ngahto thei pah hi. Tua hi lo in ah ut hunhunin zumkah, zumtuak cih bangin om leh minsiat leh zakhan loh thuah ding hi. Sumbuk zuakpa khat zong ni simin a kong a hun manin hong leh van limtakin khawng ding a, a ut hunhunin a sumbuk hong leh a vanlei mite zong nakpi takin tawm tuam pah ding hi.

4. Hun hoih hun pha i ngah nop leh zingsang tho baih mahmah ding kisam hi.

Leitung mi minthang, mi pil mi liante a tangthu uh va kan leng, zingsang a thobaih vive na hi uh hi. Mangkangte paunak khat ah, “Early to bed and early to rise is the way to be healthy, wealthy and wise,” ci hi. Cihnopna ah, nitak lum baih, zingsang tho baih leng cidam ding, hau ding, pil ding; hi teng leitung ah, kuan deih lo ding hiam? I pu i pa te’n zong, hi bang paunak na nei uh hi, “Zingsang lol lo, zumei tuan lo, khangual ban lo” na ci uh hi.

Hih kampau pen ka neu lai-in ka pa in, thuhilhna in ong nei den hi. Zumei tuan a cihna pen kithei kim khol lo kha ding hi. Nidang hun lai-in, i Zogam ah, lo khawh lo buang nasep dang om khol lo hi. Tua hi a, zingsang khuavak ma in lo kikuan, zusa te’n zan niloh an zong, khuavak madeuhin a kua sung lut, sun niloh a kua sungah tawlnga, zingsang khuavak ma-a lokuan te’n zusa a kua lut ma-in lo lampi a vaak zusate a mei va siikkha uh hi, cihna hi.

I khanglui mi (papi) te a kizen vanglakte zumei tuan kha hel in lokuan uh a, tuabang mite mah in midangte sangin an hauzaw pah uh hi. Tuabang hi lo a, vaihamsan khit khawng a lo lam a zuan diaidiai te’n an hau lo pah uh hi.

5. Leitungah Pasian piaksak na khempeuh in hun nei ciat hi.

Lai Siangtho Lui, Thuhilhna 3:1 ah, “Hih leitungah a piang thu khempeuh, Pasian in ama pian hun dinga a sehsa hunin a piansak ahi hi” ci hi. Hih tawh kizom in, i khuahunte ngaihsun leng: ei gamah, tuuk, phalbi leh khuakhal ci-in kum khatin khuahun thum i nei hi. I zo la (khuado la) a ei Tedim mi te’n i neih khat en pak leng: “(a) Lummei ong kaai ciiciai e khua vannuai ah, tuuk leh khal kidan nading aw e. (b) Tuuk leh khal kidan nading luum mei ong kai, khua van theng leh khua dai lawm aw e.”

Akhiatna in, i kim i pam ah mei kaai, tua in tuuk hun leh khuakhal hun ong kikhen nading hi. Tua bang a mei ong kaai a bei ciangin khuadam hun in ong zom hi, cihna ahi hi. Hih la pen khuado la taktak hi. “Do na lingling, do na lingling e, gualin kum khua do na lingling e. Gual in kum khua do na lingling e, do han ah nau bang ka kap tah e,” i cih la pen, dah la hi-a khuado la, hi lo zaw hi ci leng kikhial lo ding hi.

Hih leitungah mihingte nuntak hun pen kum 70 bang hi a, cidam leng kum 80 bang hi thei hi (Late 90:10). Mipilte’ lai-atnate ah, leitung mihingte khualzinmi tawh kibang hi. Tua hi-in, a tun nading inn a tun mateng tawlngak hun ding nei lo hi. Vantung gam a tun ciang bekin tawlnga thei pan ding hi. I sih matengin bangmah sem loin mawk om ding hi lo hi. Mihing khat in a nuntak nadingin thasanin hanciamna a neih kei leh a sisa tawh kibang lel hi, ci uh hi.

Leitung ah pilna siamna pen bang zah takin sang hiam cih leh, pilna sang penpen, Ph.D. thuap bangzah i neih hangin i khantawnin pilna i sin tohtoh hangin ah a vekin kithei khin zo ngei lo ding hi, ci-in mi pil te’n gen hi. Leitung ah Mangkangte, pilna lam a nakpi tak a minthang pen pa khat ahi, Newton in hih bang na ci hi, “I am gathering pebbles on the seashore, while the vast ocean of knowledge lies before me unexplored.” Tuipi gei ah suangtang kaikhawm a ka om laitak in, tuipi zah a lian pilna a kimu khin nailo in om hi, ci hi.

Ei Zomite a kua cih ka gen nopna hi lo in, College degree khat peuh i ngah ciang, pilna a sang tung khin lua ta kisa in, zu nekna lam hanciamin, hun kimawkbeisak thei hi. Tua mah bangin nidang hun lai a, eimite sum hau masa pawl khat te’n, zu mah nek ding na bulphuh uh a, hi bang la na sa uh hi, (a) Ning zune a thei sen lawmgual tawh, hauta mang pian e, khua ka ngailo e. (b) Hauta mang pian e khua ka ngailo e, sesum phungcing e, zolei lawm tang thot ka ngai lo e.

A cihnopna ah, ka lawm ka gual tawh zu ne in ka om laitakin, mi hau, mi liante mah bangin khuatang phawk lo in ka om hi. Kuamah awlmawh lo, sum zong hau lua in, lokho in lawm thot ding bang ka ngaihsun kha vet kei hi, ci-in la na sa uh a, khuatang phawk lo in gualnopna lam bekmah na bul phuh uh hi. Dr. Sian Za Kham (M.B.,B.S., D.A., M.A.)