Sian Dal (Thian Khan Dal) mualliam

Sian Dal (Thian Khan Dal) mualliam

SIAN DAL (THIAN KHAN DAL) MUALLIAM – Zan nitakin phone ka set a, gim khin pian hita leh amah tektek mahin phone lenin ka thungetsak ding a lunggulhna thu hong gen hi, tawlkhat mah ka kiho thei uh hi. Ka phone in nitak 7:50 pm in tawp uh teh ci-in hong ciaptehsak hi. Zingsang ka khanlawh ciangin facebook ah “Sian Dal in hong nusia” cihte ka mu a, ka dah mahmah hi.

PASIAN NASEMTE IT MAHMAH

A Nu uh Nu Huai in Pasian nasemte it mahmah ahih manin amau unau in zong hong it mahmah uh hi. 1996 kum “LAINATNA AW” kici khui ka bawl lai-in ka sum cing lo ahih manin “Sia Khup kei a zang ni” ci-in Ks.60,000 hong pia hi. Tua hun leh tu hun innmun man tawh ka tuat ciangin tengh 1000 kim hong pia himawk hi. Nidangin gamdang pai ding haksa-in vai tam mahmah a, Bank account lah hamtang a kul hun khempeuh kei leh Pasian nasem tampi in ama a kilak den hi.

KINIAMKHIAT MAHMAH HI.

Zomi sungah khangno hau masa mahmah khat hi napi, mawtaw hoih, van zat hoih zang hetlo hi. “Bem pan a kipan hing Sia Khup aw” hong ci thei zel a, Tamu leh Kawlpi kikal lam sia mahmah, mi gilo (Damiah) tam mahmah hun lai a, sik sakol (bike) tawh van a nawn lai, a gim a tawl a launa thu hong sutpih zel hi. A haksa nuntakna pan kipan ahih manin mi simmawh hetlo hi.

MAI LAM DING GEL KHOL

Hong nusia khin sa a zi, Dim leh a tate, anau Thangte US paisak ding a gel lai-in hih lai ah nuamsa mahmah lel hi lo nahi uh hiam? ka ci sim hi. A innkuan sung thu ding vaihawm khol ahih manin tuni-in hihbang thu hong pian hangin a nungsang thu lungmuan huai mahmah hi. Pasian nasemte it lua ahih manin a nuntak zia ding Pasian in gelkholhsak hi, ka ci hi.

LEITUNG A ZAT DINGTE LEITUNG AH ZANG NGAM DING

Tuzingsang ka ngaihsut thu khat in, “Vantung ah i ken ding bangmah om lo ahih manin leitung i dam sungin Topa thupha a hoih penpente mah i zat sawm ding ahi hi” cih pen hong nusia sa ka lawmte, St.Paul Sang neipa Siapi Hau Khen, Kawlpi RTC ah inn hoih nei masa pen, U Dalmang, Tahan ah inn hoih leh mawtaw tampi a nei ka lawm Nangpi, tuni a hong nusia ka lawm Sian Dal cihte nai takin ka kithuahpih ahih manin a neihna zah un amau adingin a zang ngam hetlo ngen uh ahi hi.

Amau pumpi hamsia hi, ka ci mai hi. A om ahih nak leh leitung i dam sungin a nuam a nuntak sawm ding thupi ka sa hi. A nusiat innkuan sung leh u leh nau a kuamahpeuh Topa Kha Siangtho in hong hehnem ciat ta hen. Sia Do Khup