Tuate bang ahi ua…? (Exo. 16:11-ff)

Tuate bang ahi ua…? (Exo. 16:11-ff)

Topa Pasian in Israelte a pii lai in, Elim mun a kipan in Sin gamdai a hong tungta uhi. Hih mun pen Israelte Aigupta apan a pawtkhiak nung uh kha nih leh ni sawm leh nga ni ahi hi. Hih munah sa duh in Israelte a hong phun uh a, Mosi leh Aron dem in thu a gen uhi. “Amaute tungah, “Kote, sabeel phungah tu-in ka kham takun an ka nek lai-un Egypt leitangah Topa in hong that khin hizaw ta leh maw! Bang hang hiam cih leh mihon buppi a puksisak dingin note in sehnel gamah nong paikhiatpih uh hi,” chi in a hong phun uhi.

Topa’n Mosi kiangah, “Israel’ suante phunna ka za a, a kiang uah thugen in, no a dingin van a kipan in tangho ka hong zusak dinga, tuate a lakhawm ding uh a, khamtak in na ne ding uhi, nitaklam tengin vengkeng/vamim honpi na nek ding un ka hong pia nalai ding a tuachi’n, kei Topa Pasian ka hi chih na thei ding uh,” achi hi.

Tua in, zingsang a hongthawh un daitui a giahphual kim uah a kia hi. Tuachi a daitui a bei nung in ngai in gamdai ah thilbem neu, leitunga gialtui khal ngo bangin gamdai a dimta hi. Tuapen Israelte’n “Manna” achi ua, tuapen, “Tuate bang ahi ua” chihna ahi. Israelte’n zingsang tengin a lakhawm ua, amau’ a ding chiat a zingin a zing adingin, tuachi bangin a lakhawm zel uh hi. Mite’n tampipi na la khawm mah le uh, a kham valte uh nektheih nawnlo in than/hiing gawp zel hi. Himahleh khawlni a ding a a lakkhawm chiang un bangmah a chi ngei kei hi. Tua tham loin Pasian in “na suante uh leh na suan sawnte uh kianga na gen theihna ding un hih “Manna” na khang na khang ua Aigupta apan Toap’n a hong piikhiat laia gamdai a a hongvakna tangho chi a na etsak theihna dingun omer khat thundim un”, achi hi. Tuate akhang akhang in a zong a muat kei hi.

Topa Pasian in a mite kul leh poimawhte a awlmawh mahmah a, Aigupta a sabeel lunggulh a a om ding uh phal loin sa a pia a, Aiguptate’ tangho a lunggulh lohna ding un Manna a pia hi. Topa’n a mite lungleng a Aigupta enen dingin a phal kei hi. Hih Manna pen ni a sat hun chiangin a zul mang zela, ni khat a koih chiang un a than/hiing zel hi. Himahleh Pasian thupiak a hih chiangin ni nih in zong than/hiing loin, a khang a khang a dingin than/hiing loin om thei hi. (Tutan in Pasian bawm muh theih in om lai leh a sung ah om lai ding hi).

Israelte’n Manna gamdai a ann a aneih bangun Hotdamtate’n Lai Siangtho(Bible) pen hih khovel gamdai a I om sung ua, niteng a sim a, hua thupite ngaihtuah a, I hinna(khalam hinna) bawldik zela, Pasian min thupina ding a pitu a I zat gige ding uh kisam hi. Manna niteng a kaihkhawm ahih bangin Lai Siangtho niteng a a hongchawmtu dingin sim gige ngai hi. Tuni a na hinna hong khoih mahmah na nek, na dawn, na muh pen in midang hinna zong a khoih ding a, tunia na hindan, nek leh dawn, silh leh ten, ham leh paute mi dangte a dingin limchi leh nek taak a hi na hiam? Ahih ke’h mi dangte muhna ah than/hiing gawp nekpha nawnlo gawp ahi kha ding hiam? Kivel chian zelzel poimawh hi. Topa Pasian, Israelte kul leh poimawhte piapa’n nang a dinga kiching gualzawlna(Manna)a hun-hun in nei hi. Tua Manna a huntak in na ne thei zel na hiam? Ahih keileh nektheih nawnloh ding khop a kholkhawm khawm na hi hiam? Velchian in, “Tuate bang ahi ua. . . .”?

Pastor laikung pan……
Zomi Christian Fellowship, Delhi