Tualniam lungsim neite pianzia ~ Lian Tuang

Tualniam lungsim neite pianzia ~ Lian Tuang

Minam sung, pawlpi sung, kipawlna sung, innkuan sung, nasep silbawlna, kim le pam tawh kizopnate khempeuh ah buaina nawngkaina apiangsak zelzel thu tampi lakah a tamzaw pen mihingte lungsim tualniam luatna zong a thupi pawl na hi gige hi.

Lungsim tualniamna pen pilna siamna, neih le lamte kicinna, khuapi sung le khuata pan khankhiatna cih thu tuamtuamte tungah kinga lo hi. Lungsim tualniam mite pianzia tawm en dih ni.

1. Mi tawh kitot kinial ding hamsa sa lo hi

Mi tualniamte in midang tawh kitot ding hamsa sa lo uh hi. Innkuanpihte, naseppihte banah a theih ngeilohte nangawn tawh kitawng thei uhi. Midangte lungsim le ngaihsutziate thupi loin a ut bangin pau ziauziau uh hi. Ama upmawh thu khat len tentan in hangsan takin hang ziahziah ngam lel hi. Mi thu gen ngai nuam in a ut teng gengen lel hi. A kammalte in midangte bangzah ciang sukha ding cih ngaihsun se loin pau phial gawp ziauziaiu hi.

2. Midangte muhna le ngaihsutnate thupi sa lo hi.

Mi tualniamte pen amah le amah pil kisa siam kisa mahmah uhi. Midangte thu genna le ngaihsutnate hoih sa loin thupi sa thei lo hi. Thu khempeuh a theikhin kisa hi. Thu khat peuhpeuh a pian ciangin a hoih lo lam in la pahpah hi. Midangte lungkhamna le lunglen khuangaihnate nopnehna le gensiatna in nei thei hi.

3. Midangte mawhsak pahpah

Mi tualniamte in amau lungsim picinloh manin buaina piang tawntung ahih lam phawk kha thei se lo uhi. Thusia thu ngawngkai khat peuh a om ciangin amah le amah ki en masa loin mi dangte mawh sak in kawk ziauziau hi. Paulap ding mu pahpah hi. Ama thanemte amah le amah kisangsiam mahmah vet se hi. Hih bel ahi ding mah kici tawm lel hi. Midangte thanemna pen sang thei vet loin a ginalo a citak lo hi ci gawpgawp hi.

4. Thakhat thu in heh vat thei

Mi picingte in a lungsim kikem uhi. Mi tualniamte in ahih leh hehna thangpaihna khasiatna khat peuh a neih uh ciangin a lungsim uh kikem loin pusuah pahpah uhi. Heh bakbak uhi. Naupang genhakte bangin kim le pam khual loin heh gawp thei, pau gawp thei, hang gawp thei mang thei lel uhi. Khat veivei ciangin ahang ding om mello nangawnin lungtom gawp thei lai uhi.

5. Mi tawh sawt vei kikhawl theilo

A kikholhpitte tawh sawt vei kikhawl suak theilo uhi. Midangte le a kikholhpite hamsatna le nuntakzia theisiamin amaute a hehpih thei mahmah danin amah le amah a kingaihsut hangin a kikholhpihte lungsim le ngaihsutnate telpih zo loin amaute lungsim vangikte puakpih theilo uhi. Ama vai khempeuh midangte in a theisiam tawntung dingin deih hi.

6. Guptuam paihtuam nei den

Lungsim tualniamte in kim le pam mite tawh kizopna ah midangte sangin guptuam paihtuam nei tentan den hi. A khua a tui a beh a phung le a theih ngei a zak ngei thu khat peuh siksan in mi khat pakta gawp thei a, mudah gawp thei lel hi. Tua banah Mi hoih hi ci in a ciapteh mi khat in mawhna khialhna siatna nei ta le mi hoih hi ci tentan a, a et theihloh mi khat pen mi hoih mahmah mi gina mahmah khat ahi phial zongin hoih sa thei tuan lo hi. Mi khempeuh in hoihna kinei ciat in thanemna zong kinei ciat a, khat veivei ciangin ki gamta khial thei zel ciat hi cih pen sang thei vet lo hi.

Tua hi a, Mihing khat a pil mahmah hangin a lungsim tualniamleh mi nawngkai mi dongtang mi lauhuai khat suak lel hi. Pilna le picinna a kigawm ciang bekin midangte in kiphattuampih thei pan hi. Tua mah bangin hauhna le siamnate zong tualniam mite khutsungah a om ciangin kithuaklah mahmah in mi picingte khut sungah a om ciang bek in kinoptuampih hi.

Midangte kawkna ding hi loin ei le ei kiphuah tawm theihna dingin hoih sa ka hih manin “EQ (Emotional intelligence) thanemte pianzia” cih NALONETAR DIRARY a kigelh kawllai pan I letkik ahi hi. Lian Tuang