Trump in a Team teminding pulak, kilemnading deihin kampau kidawm mahmahta

Trump in a Team teminding pulak, kilemnading deihin kampau kidawm mahmahta

Nov. 15, 2016: Donald Trump in kiteel ma-in kampau kilawm lo (rhetoric) a zatte leh politics a kituah theihna (balance) dingin a cin’ khit nungin TV interview ah kampau kidawm mahmah leuleu ta a, a seppih ding ulian lubawk nih – Washington insider sawtpi leh Republican National Committee (RNC) chairman len Reince Priebus pen White House adingin panmun hoih mahmah pawl a kingaihsun chief of staff ding leh a campaign chief Stephen Bannon (far-right activist) pen chief strategist and senior counsellor ding hi ci-in pulak ta hi.

Bannon in kei leh Priebus ka kipawlna hangun vote zonna (campaign) ah lawhcin’na tampi ka ngah thei uh a, mai hun ciangin a kibangin na nasem khawm in, zaa kikim mah ka len ding uh hi a cih hangin White House ah thuneihna tuam tuak len kha ding uh cihna suak ta hi. Trump in Presidential tuh theihna dingin a min kiguan lutna (nomination) a ngah khit in Republican ulian tampi ten a taisiat san lai tak un Priebus in a lungsim khempeuh tawh Trump’ vote zonna ah hanciampih den a, tua hun mah in Bannon in America mite khut sungah i gam la kik ni – (to) “take back the country,” cih a tangkopihna hangin Trump in gualzawhna hong ngah thei hi kici liang hi.

Trump in TV interview a tuah masakna pen ah mite thuzawh theihna dingin leh up theihna dingin thu khauh tak leh kilawm lo zah liangin genna (rhetoric) pen ka kidek ding a, ahih hangin kineih tawm a pau laih daldal (nice monotone character) cihte pen ka siam lam hilo a, khatveivei kamgum leh kamkhauh zong zat ding kisam a, i thugen mi’ up theihna dingin tua bangin kampau zel zong kisam hi ci-in CBS Newste kiangah gen hi. Nau suksiat vai a kidotna ah Supreme Court in hih pen thukham/upadi in bawl khin ta ahih manin tua thu pen gengen huai lo a, ahi bang hi lel hen ci-in khanglui ngeina kepbit (conservative) nopna leh Christian thukham khauh tak tawh laih ding a cih a gial khek pian a, Hillary’ vai-ah zong Special Prosecutor thukansak a, gilbeem a khum ding leh Mexico gamgi ah kulhbang lam ding a cih zong kidau koih ta hi.

Nau suksiat thukham (abortion law) tawh kisai-ah bel Supreme Court ah pro-life justices kici kiseh ding a, tua in “abortion laws” deih State tengin a zat theihna ding un deih teel theihna kipia ding hi ci-in gen hi. Ahih hangin nau suksiat ding deih lo state sung panin nau susia nuam numei ten tua a omna state uh a nusiat ua, a kiphalna state-te a zuat uh kul ding hi ci hi. CBS news in nang nau suksiat ding na thukim hiam ci-in a dot leh tua dingin lampi saupi pai kul lai hi, nang zong na tel khin hi ci-in a deih lohna thu gen hi (“It’s got a long way to go, just so you understand. That has a long, long way to go.”)

African Americans, Latinos leh Muslimte a kituam bawlna leh minam kideidanna thukham palsat a gamtatna – hate crimes piang hi cih dotna a dawnna ah tua thu hangin ka dah mahmah a, tua bangin gamta nawn kei un, mulkimhuai lua hi..tawp san un ka ci ding hi. Bang hang hiam cih leh America gam kipumkhatna dingin ka bawl nuam a, na kasem ding hi ci-in gen hi. Washington khuapi sunga sum zanga mi thuzawhte (lobbyist) thuneihna ka beisak ding hi ci-in gen hi. Clintonte nupa thu vai-ah zong hihte nupa pen mi hoih hi uh a, amau’ gim thuakna dingin bangmah ka bawl nuam kei hi ci-in gen hi. Obama a kinial/deih loh manin President dingin a cing ka hi kei a, politician khat peuh in a mite sawtpi nuai kiat suksak thei zel mah uh a, tua pen a ngeina hi ci-in Obama vai tawh kisai dotna dawng hi. -The Hindu/ Thang Khan Lian