Traffic Green laitak akanphei himahleh mawtaw in nawkkha veve

Traffic Green laitak akanphei himahleh mawtaw in nawkveve

Singapore gamsung aom North Buona Vista Road kici lamzikpi tungah zanhalni Friday ni in mawtaw khatin numeino khat phukha hi. Aphukha mawtaw pen Mercedes namte hi a, aphutkhak laitak in agei aom mawtaw khat ii Dashcam panin Video Record kibawlkha citciat hi.

Numeikhat in khetawh Pedestrian  lampi akanding in Traffic Light angak hi a, Green akilaih ciangin lungmuangtak in akanphei leh Mercedes (SJF6519G) khatin nawkpheimawk hi. Video sungah aki etkik ciangin mutangpi mahin anawk hileh kilawm hi.

Traffic Green ta ahih manin numeinu khialhna omlo a, Mercedes hawlpa khialhna hizaw hi. Ahi zongin anawkkhak khitciangin khawlpahlo in paisuaksan sawnsawn hi.

Hih Accident apianlaitak akizaihkha Video Clip pen “Beh Chia Lor – Singapore Road” panin Facebook tungah ki khahkhia in, Comment bekbek dimsukpah zihziah hi.

Mercedes mawtaw in anawkkhak ciangin numeinu pen alu tawh kitatkha himahleh kamphatna tawh numeinu pen amathu in thokikzo a, avankia teng tawmin paikhiazolai hi.

Hih thupiang akigenna ah Mercedes mawtaw tawh aphukha Driver pen NUH (National University Hospital) ah asem cisawnsawn hi. Zato ah asem ahih hangin ama taihkhak, phuttukkhak numei khat nangawn awlmawhlo, Medical Assistance bang akisamdiam cih donlo kici hi.

Hih thupiang khempeuh Video Record omsitset ahih manin, hih Video aki khahkhiat ciangin tua Mercedes hawlpa’n Police Statement agenkhiatsa khelkik, athugen laihkik kici hi.

Video: Driver of Mercedes knocks down pedestrian at North Buona Vista Road

Phawkding:
Lamzikpi kantan dingciang kidop huai mahmah cih hih Video tungtawn in phawkthak huaihi. Traffic Green ahiphial zongin lungmuan luatding hilo hi. Khe tawh ihpai zongin, mawtaw ihhawl zongin Traffic Light ah khuadak in kidopding thupi hi.

Ih theihlohkal, ih lametloh laitak in ih gamtatna khempeuh Video Record hong kibawlthei cih phawk huaihi. (Zato ah asemkhat in ama phutkhak tektek atuahsia numeikhat donlo cihpen zumhuai mahmah hi.)

A nunung ah ih gamtatna khempeuh Video Record aomkei phialzong in Pasian in hongmu gige cih phawk huai hi. Tua phawkdenleng aginalo in ki gamta ngamloding hipah hi. Sawltak #zomidaily