Topa Zeisu bang hun a suak? ~ Zam Khat Kham

Topa Zeisu bang hun a suak? ~ Zam Khat Kham

Zan nitak (December 12, 2021) MYC in Facebook pana live-a a khah Christmas la kisakna program khat ka ngaih leh Saya Chit in guitar tumin khangno pawlkhat in lasa uh hi. A lasate bel siam lua kei; a guitar tumpa ka pahtak manin dawng 3, 4 tham ding ka ngai hi. Christmas la vive hi-in i Topa’ hong suahna thu sangin “phalbi khuadam,” “vuk kiat khuadam” khawng ki bulphuh zaw tham cih ka mu hi. Kawlkam-a Christmas la kiphuak peuhmah tuaci nuam lua keiimawk hi.

Nitumna lam gamte khuadam gam hi-a, tua pana i zak sawn thu leh late in i lungsim ngaihsutna hong zo maw, ahih kei leh ei khualumna gamte in tua vukkia peuh, phalbi khuadam peuh a pakta maw, cih khat ahi tam ci-in ka ngaihsun hi. Tua kawmkal ah Christmas i cih December 25 ni ngena kibawl ahih manin leitung khunglam peuhmah ah phalbi khuadam hun hi a (leitung tawlam ah bel summer a cih hun uh hi a, khuadam lo, lum lua, 100’F a val velvel hi), tua hanga Christmas hun ah khuadam leh vumkiat peuh a ki-uanggen hi kha ding hi, ci-in ka ngaihsun hi. Hih thu tawh kizom-in i Topa’ suah ni bang ni lian ahi tam? ci-in ka lungngai kha hi.

Bang Kumin Topa Zeisu Suak Hiam?

Topa Zeisu a suah ni lian a kitheih loh hangin Matthew leh Luke sunga kigen thute tawh saikaakin tangthu theite in 4-6 BC kikal hi ding hi, ci uh hi. A hang? Zeisu a suah hun lai-in Herod the Great in Judaea a uk lai hi a (Matthew 2:1), tua Herod 4 BC in si hi cih tangthute ah kician takin kiciamteh hi. Tua ban-ah, Jewish historian Josephus in a genna ah Topa Zeisu’ suah hun lai-a mi kisimna “Census of Quinarius” pen 6 BC hi, ci ahih manin Zeisu’ suah hun pen 6-7 BC hi ding hi, ci-a ngaihsun zong om hi. Ahih hangin Luke sunga kigen mi kisimna pen “Quiranius Syria governor suah ma-a kisimna” cih ding hi zaw a, Zeisu’ suah pen 6-4 BC hi dinga, Herod a sih kum 4 BC hi zaw ding hi, ci-in mi tampi in um uh hi.

John 2:20 ah Herod in a lam biakinn a kilam zawh kum 46 pha ta cih khat na kigen kiau hi. Tua biakinn pen 20 BC kum-a Herod in a pat ahih manin kum 46 a phak kum pen AD 26, 27 ahih kul hi. Tua hun-in Topa Zeisu a nasep kipan khin a, Luke 3:23 ah Zeisu nasep a kipat-in kum 30 pha ci ahih manin hih thuteng khuaigipmek lehang 6-4 BC sung hun khat teiiteii-a suak ahihna bel kilang mahmah hi.

Science lam pang ah, Cambridge University a Professor Collin J. Humphrey in “Quarterly Journal of the Royal Astronomical Society” Vol. 32, No. 4/December, 1991, p. 389 ah 5 BC kima aksi comet kilang pen “Star of Bethlehem” hi kha ding hi ci-in Topa Zeisu April 5, 5 BC ni-a suak hi, ci-in science pilna lam pan na gen ngei hi.

A taktakin BC, AD i cihte Topa Zeisu’ suah kum pana kisim hi a, Topa Zeisu 0 BC, AD 0 a suak hi leh kilawm mahmah ding hi napi-in ni ciamtehna calendar i cih a nidang pek cianga kibawl hi a, a ni simna, a kim simna uh na khial uh ahih manin AD 0 kum-a suak ding Topa Zeisu pen a taktakin 6-4 BC a suak hong suak kik zaw hi.

Bang Ni-in Zeisu Suak Hiam?

Topa Zeisu a suah kum lian a kitel loh mahbangin December 25 ni lianin Zeisu a suak mah ahi hiam? cih dotna om leuleu hi.

“History Today” kici laibu sung ah Alexander Murray in December 25 ni Christmas ci-a a kizat pen Zeisu’ suah ni hi lo-in dawibiakna (pagan) pawi “Saturnalia” tawh kizom hi zaw hi, ci-in gen hi. Hih pawi pen phalbi ni tom pen ni (winter solstice ) tawh kizomin Roman feast of Saturn cih min tawh a kibawl hi a, December 17 pan 23 ni dong kibawl hi. Temple of Saturn ah biakna pia uh hi.

A dang khat ah, Roman-te’ pawi “Natali Solis Invicti” kici khat om a, December 25 ni-a kibawl ahi hi. Roman emperors minthang tampi tawh kizom-a kibawl ahi hi. Tua bang dawibiakna pawi pen Christian upna in zo dikdek hi a cihna-a December 25 ni-in Christmas a kibawl hi, a ci pawl zong om hi. Yale University a Adrew McGowen in a tunga i gen dawibiakna pawi a ki-Christian suah hi, cih pen kum zalom 12 lai-a Christian propaganda hi a, thutak hi lo hi, ci-in na lak ngei hi.

Pawlkhat leuleu in December 20 khit deuh a ni tom pen solstice tawh kizom-a Christmas kibawl hi a, Tuiphum John in “amah khang semsemin kei ka kiam semsem ding hi” a cihna tawh kizui-in ama’ suah pawi “Nativity of St. John the Baptist” pen December 25 tawh kilehbulh lian dingin June 25 ni-in kibawl hi, ci-in kigen hi.

December 25 ni Christmas ci-a a kibawlna tawh kisai-in tangthu ah a kiciapteh masakna penpen bel kum zalom 3 lai a Hippolytus of Rome kici pa’ laigelhna sung ahi hi. Tua pa’ genna ah, March 25 ni pen December kha-a ni tom pen ni pan June kha-a ni a sau pen ni-a a kiheii ni Spring Aquinox ni hi a, Topa Zeisu zong tua ni-in a nu in a sung ah a pai (conceived) kipat ni hi. A sih ni zong tua ni lian mah ahi hi. Mi thupite a suah ni mah-in si hamtang uh ahih manin Zeisi zong a sih ni mah-in naungekin kipai-a December 25 ni-in suak hi, ci hi.

Pawlpi pate ((church fathers) lak ah thugen siam-a minthang John Chrysostom in zong kum zalom 4 lai-in December 25 ni-in Zeisu suak hi, ci-in na gena, Luke 1:8-11 sunga siampipa in paknamtui a halna pen Biakpiak Ni (Day of Atonement; Heb. Yom Kippur) hi dinga October kha bul lam hi ding ahih manin Zeisu’ suah pen tua hun pan kha 15 na, December hi, ci-in seh hi. Ama’ sehna zui-a Christmas kibawl hi lo-a a omsa Christmas a kip nadinga a seh hi zaw hi.
Bang Kha Pawl Hi Ding?

Pawlpi masate’ hun lai-a kipan-in Roman Empire Nitumna lam ah December 25 ni leh Nisuahna lam ah January 6, hih ni nihte Christmas ni dingin kiciamteh tuaka kidemna nasia takin om hi.

Laisiangtho tungtawnin en lehang, a masa-in Luke 1:26-27 ah Tuiphum John’ nu Elizabeth in John a pai zawh a kha guk kha-in i Topa’ nu Mary va hawh hi, ci hi. John a suah khit kha 5, kha 6 ciangin i Topa suak pan cih kitel hi.

A nihna ah, John’ pa Zechariah in biakinn ah siampi a sepna ah Abijah khen sunga om ahi hi (Luke 1:5). Kumpi David in siampite a nasepna vuah khen 24 suah-in kician takin na khen sitset hi. 1 Khangtangthu 24:7-9 ah: a masa Jehoiarib, a nihna Jedaiah, a thumna Harim, a lina Seorim, a ngana Malkijah, a gukna Mijamin, a sagihna Hakkoz, a giatna Abijah, a kuana Jeshua, a sawmna Shecaniah… cih bangin om hi.

Hih khen 24 te khen khat in nipikal khat ta sem uh a, pawi thupite ah a vekun sem khawm uh hi. Jew-te’ calendar nam nih om a, leitung vai civil calendar pen September kha bei-in “Rosh Hashannah” kici “kum lutang” ahih kei leh kum thak tawh kipan hi. A dang khat pen biakna religious calendar hi a, March kha bei pawl ahi Nisan kha-in kipan hi. Vantunga kha zui-in kha khat ni 30 hi-a, kum 6 simin kha 13 pha hi. Solomon biakinn a kisuksiat ciangin biakna tawlkhat a kikhawl hangin Jew-te saltaanna pan a ciah kik uh ciangin hih siampi nasep kizom kik hi.

Siampi khen masate March kha bei-in nasep kipan le uh, a khen giatna Abijah pawlte’ laka siampi ahi Zechariah in nipikal kuana, kha thumna Sivan kha kal masa-in nasep kipan ding hi. A hang? nisan kha kal thumna pen Paisan Pawi (Passover) ahih manin siampi khempeuh in na sem khawm ding uh hi. Zechariah a nasep hun sungin vantungmi in a ta neih nading thu gen dinga, tua nipikal a bei ciangin a inn ah ciah thei nai lo leuleu hi. A hang? Shavuot ahih kei leh Pentecost tawh kituaka nipikal khat siampi dangte tawh sem khawm ding hi. A kal kik ah inn ciah-in a zi tawh lum khawm uh a, a zi Elizabeth naupai kipan ding hi. Sivan kha bei kuan lam hi ding hi.

Tua zawh kha 6 ciangin i Topa’ nu Mary va hawh hi. I Topa sangin John kha 6 in upa zaw hi. Tua hi leh i Topa’ suah pen a kum kik September kha laizang pawl hi ding hi. December 25 ni bel hih tuak lo mawk hi.

Tuucingte E Leh?

Tua hi mawk leh tuucingte September kha sungin gamlak ah tuucinga a giah uh kul ding hi (Luke 2:8). Khuahun tawh kituak lua hi. Palestine gam ah phalbi sung vot mahmah veve a, vuk zong kia thei ahih manin December kha sungin kuamah in a tuute uh gam lak ah giahpih lo zaw uh a, September kha-in vot lua nai lo ahih manin tuucingte’ kiang ah vantungmi in i Topa’ suahna thu a tangko ni zan-in tuucingte gam lak ah giak thei lai uh hi. Tua ban-ah, Palestine a kikhawi tuute pen tuu nam tampi lak ah Awassi kici Syro-Arabian sehnel gam pan hi a, Autumn hun ahi September kha kiim-in a nu a pa-in kicing khawm leh tam gai phadeuh se uh a, December kha-in bel kibah nawn lo-in a gai dingteng gai khin ta uh-a kikhumcip zaw ta hi. Khua zong dam lua hi.

Tua ban-ah, September kha-in Zeisu a suak hi leh, tua kha pen “Buk Pawi” (Feast of Tabernacle or Booths) hun hi a, John 1:14 ah John in “Tua Thu ci leh sa hong suaka mite’ lak ah hong teng hi” a cihna a kizang Greek kammal pen “skenoo” hi a, a khiatna “buk sung ah teng,” “teng” (to live in a tent, to dwell) a cihna a hih manin John in i Topa’ suah kha leh “Buk Pawi” a kituah man-a hih kammal a zang ahi tam maw ci-in kingaihsun hi.

Thu dang khat ah, Jew-te’ adinga a thupi mahmah pawi thupi thum om hi: Paisan, Pentecost leh Buk Pawite ahi hi. Pasal peuhmah Jerusalem ah pawi siim-a a pai loh uh a phamawh pawite ahi hi. Topa’ nuntakna leh hih pawite kipaikaan den hi. Succoth kici Buk Pawi sungin suaka, Pesach kici Paisan Pawi hun-in kikhailumin sihna pan thokika, Petecost ni-in Khasiangtho hong kibua hi.

A peuhmah-in bel, Zechariah’ tunga vantungmi a kilat pen Sivan kha sunga a nasep hun hi lo-in a nihveina a nasep hun zong hi thei lah lo hi. Kha guk khit ciang hi ding hi. I Topa’ nu Mary’ tung ah Gabriel a kilat June kha khawng hi dinga i Topa’ suah March kha khawng hi ding hi. Tua banga a kigenna lah ka mu ngei kei zel kawikawi hi.

December 25 Ni-a Christmas A Kibawl Kikhial Maw?

Khialh luatna om lo hi. Ahi thei ding nite khate a gen hi bek hanga a kician liana thei om lo bek tham lo-in a ni a kha a thupi hi lo-a i Topa mihinga hong suahna a thupi hi lel hi. Pasian in kulsa hi leh a ni a kha a kicianin hong theisak dinga kulsa lo ahih manin hong theisak lo ahi hi. Hong theihsak loh nangawn pawlkhat bangin a kul lo zah-in buaipih khin ahih manin thei lai zen lehang buai huai kha ngel ding hi. Moses in gamlaka a khai dal gul nangawn a nidang teh “Nehushtan” min kipia-in milim biakna suak mawk ahih manin (2 Kumpite 18:4) Kumpi Hezekiah in haltumin susia hi. I Topa’ suah ni khawmg thei-in a vanzat khatpeuh kem kha hi leng a Topa bia lo-a tua nate peuh a bia zanzan ding mi nak om lua ding hi. Eite’ adingin Honpa hong suak zo ahih manin lungdam takin muakin dawn ni. Rev. Zam Khat Kham