Topa’ nitak ann

Topa’ nitak ann

‘Topa’ nitak-ann’, Amah theih gige nading a I Topa’n kilh-lup a a om ding ma deuh nitak a a thupiak (I Kor. 11:20-26) Paul in a minphuah ahi hi. A.D 57 lak khawng hi ding hi. Paul in hih Nitak ann thu a gen masapen ahi.

Hih thu ah ngaihdan nih piang thei hi- Paul kiang ah tho-kiksa Topa in hih thute a pia hi chih leh, Topa gen nungjui masa tua Nitak ann masapen a kihelte genna pan amuh hi ding kichi hi. Mit mahmah a mu Mathai leh Nitak annkuang a kihel Peter’ lawmpa Marka in hih thute a gen uh hi. Tua mah bangin Paul’ lawmpa Luka in zong a gen hi.

I Topa Jesu Christ in saptuamte kaingah a zeknei mahmah thupiak zuih ding thu nih (two ordinances) na pia hi. Tuate-

1. Tuiphum(Baptism-unrepeated) hih pen khatvei bek bawl Christ sunga khalam hinna kipatna-pualam lahna gingtute tui a kiphumlut a kaihthawh kikna in Christ sunga hinkhua thak lahna hi.

2. Topa’ nitak ann-siangtho(The Lord’s supper-repeated) hihpen a sihna geldokna/theihgigena, Christ a kipawlkhawmna, hotdamna ziaka kipahna ann-kuang umkhawmna, lametna ann-kuang bek-bek hi loin, a hong kileh kikna (His return) ding a hong kileh kik chiangin tangho (bread) leh lenggahtui (wine) a poimawh nawnloh dingdan. Christ leh a mite gualzo a Messiah lenggam a I omkhawm dingdan lungsim a I muh khawlh ding deihna in hihte a nabawl zel un chi ahi. (I Kor.11:26; Lk.22:16,18; Matt.26:29). A sihna ziaka hamphatna I tan leh I ngahte phuanzakna ahi hi.(I Kor.10:16; Jn.6:48-51).

Diktatna khempeuh zokim nuam leh tan-leh zek dante a omlai teng zahtakin, Jesu’n a nungzuite tawh Paikan/paisan ann-kuang a umkhawm nading uh a ngaihtuah hi (Matt. 26:17-19). Paikan Belamno pen nitaka gawh ahi a, tuamah bangin Paikan ann-kuang zong nitak a lui a kul hi.(Matt. 26:20). Tuabang hun in uain(wine) leh tui hel a kizang hi. Topa’ Nitak-ann umkhawmna a neih dingun uain(wine) leh tui hel dawhkan tungah a om a, tuabang mahin silngo sawhloh tangho zong a om hi. Amah leh a nungzuite a to ua (Matt.26:20) Paikan ann kuang a umkhawm khit un, Jesu’n tangho a la a, gual a zawl a, kipahthu a gena, nungzuite’ kiangah a pia a, “Hih ka pumpi ahi note a dinga piak, nong theih gige nading un na bawl zel un,” a chi hi. Nitak ann nek khit in no/hai a la a, “Hih ka sisan a thukhun note a dinga buakkhiat (Lk.22:19,20) leh khialh ngaihdamna dinga mitampi a dinga pawt(Matt.26:28) ahi,” achi hi.

Topa nitak ann-kuang luina san pen hih ahi:
Amah theih gigena/phawk tawntungna (Lk.22:19; I Kor.11:24,25), a hong pai kik mateng, a sihna etsakna theih gigena leh Christ pumpi a kipawlkhawmna (I Kor.11:18; 21:25,26), Christ sunga mahni ki etchianna/kivelchianna ann-kuang (I Kor.11:28), Hotkhiak I hihna ziaka kipahna ann-kuang(I Kor.11:24), Christ sihna theihpihna (I Kor.11:26), Lametna annkuang (I Kor.11:26) ahi hi.

Hih ann-kuang luina nungzuite leh Judate ading bek ahi keia, Jentelte ading zong ahi. Korin khua ah zong a bawl uhi (I Kor.10:15-21). Saptuam a dingin tantuan hamphatna ahi gige hi. Ann-kuang luina dawhkan pen Topa’ Dawhkan a kichi hi (I Kor.10:21), No/Hai zong gualzawlna no/hai a kichi a, Topa’ no/hai zong a kichi hi (I Kor.10:21; 11:27).

Pastor laikung pan……
Fellowship News