Topa Jesuh Ong Paikik Ding

Topa Jesuh Ong Paikik Ding (James 5: 7- 12)

The important of the Lord’s return
Paikik ding cih ciangin a kisai lopi mi khat ong paikik ding cihna hi loin kisai lua kisa-in vantung leitung a piangsak Pa ong paikik ding cihna hi.

Hih thu tawh kisai thawhkikna pan ih pan ding hi. Sihna in len zo loin a thokik Jesuh Khrih in vantungah a kah toh ma-in nungzuite’ kiangah ahong paikik nading thu na lim gen mahmah hi. Thawhkikna om kei leh Christian upna (faith) a mawkna ahih mah bangin, Jesuh ong paikik lo ding hi leh Christian lametna (hope) a mawkna hi ding hi.

Jesuh Khrih pen leitung tawh kisai in ong pai kik loh phamawh hi. Leitung pen bangzahta in a lum hangin Jesuh ong paikik masiah kangtum cih bang om lo ding hi. Nuclear- atomic bomb tawh leitung bei lo ding hi. Huihpi guahpi, zinling, meimual puakkhapnate hangin leitung hun bei lo ding hi. Galpi khatna, nihna, thumna tawh leitung hun bei lo ding hi. Nalamdang thulamdang tuamtuam a pian hangin leitung hun bei lo ding hi. Hihte pen mawhna hangin a piangpiang hi a, tuhun ciangdong Pasian’ bawlsa khempeuh nupi nausuak ding bangin na sa-in a tauna uh ih thei hi. Pasian’ bawlsa nate bek hilo a, Pasian’ hong piak Kha Siangtho maleep a ngah eite mahmah nangawn in zong, Pasian in ama tate in hong bawlin ih buppi in ahong suahtak sak ding ih ngak kawmin thumin tau in ih om hi (Rom. 8: 22). Hih hun nunung ah leitung hun bei nading pen Jesuh ong paikik Ni tawh bei bek ding hi. Leitung a sawp siang masakin tui tawh sawp siang hi. A nihveina ah mei tawh sawp siang ding ci hi. Tui tawh a sawp siang khit zawh ciangin khang thak hong piang hi. Mei tawh sawp siang khit ciangin bel van thak le leithak, vantung gam ih cihcih pen ong piang ta ding hi (Romans. 8: 19-21; 2 Pet. 3: 10 – 13).

Thu-ummo Lawkite thukhen dingin ong pai ding hi (2Thess. 1: 7-10; Matt. 15: 31-32). Topa Jesuh ong paikikna pen thu-umlo mite thukhenna thuak sak ding le thu-ummite lakhia in ahong pai ding hi a, leitung thak vanthak pumpi thak le kha thak (a thokik pumpi le nuntakna thak) ong guan ding ahi hi. Nang le kei ih sih khit hangin Jesuh ong paikik ding thu kikhel lo ding hi. Laphuak pa in “Topa cik ciang ong pai ding hiam? Ka sih khit hi zaw diam? Vankim lai ah ka dawn zaw diam? Bangmah kei-in thei keng” na ci hi. TDM 185. Ih sih ciangin ih leitung hun a bei hi pahpah cih thu pen lamet neih loh vai, upna kiciat loh vai, uppa theih loh vai, uplah muan lah vai, thutak gen loh vai, cihmawh thugen vai hi a, Christian thu-ummite in tua bang gamtat kampaute kidop huai mahmah ta hi. Ih sih ciangin eimau hun zong a bei hi nai lo a, sihna a tuak hi pan hi hang. Pawlkhatte in sih khitteh bangmah kiphawk lo ding sa hi. Jesuh Khrih lo tawh na sih leh na sih phet in nakpi takin khua na phawk saan zaw lai ding hi. Ih sih ciangin eimau leitung hun a bei ahih tei hangin leitung hun taktak pen Jesuh’ ong pai ciang bekin bei pan ding hi. Bangthu lamdang piangta leh bang lauhuaina kigen ta leh eite pen Khrih ong paikik ding ngaka, lungmuang taka om thei dingte ih hih kul hi. Thusia lasia a lauhuai thupiangte in ih Topa’ ong paikik ding nai ta ahihna a kician sak thute ih beka, eite’ adingin khamuan nading hi zaw kan lai hi.

Vai tampi lakah Topa’ ong paikik nading thu pen Christiante vai tawh kisai hi pi pen ding hi. Christiante a langpang a bawlsia khempeuh kisusia ta ding hi (2Thess. 2: 8). Tua ni ciangin thu-ummite innkuan khat suak taktak ta ding uh hi (1 Thess. 4: 18). Minam vai tawh buaina om nawn lo ding hi. Tua ni ciangin naingngaanzi suangdalkigen nawn lo ding hi. Tua ni ciangin tulai taka ih leitung innkuan pihte tawh ih kimansuah loh ding thupi penpen hi. Tua ni ciangin kuateng innkuan taktak ih hiam cih thu hong kilang ding hi. Tua ni ciangin kua teng kua teng Zion mual ah na kinil uh? Pu Cil tawh, Nantal tawh, Neino tawh kinil ung e” a cih bangin ih mite a kim ding hiam? Tua ni pen thu-ummite kihotkhiat tawpna hun hi ding hi (Heb. 9: 28; 1 Cor. 15: 51-52; Phil. 3: 20-21). Ong pai ma sak lai-in Jesuh in lohkikna (atonement) tawh kisai a kisam tangmi nasep khempeuh hong sep sak khin hi. A tuah sia hi mawkmawk lo hi. Tua bang thuak ding mah in a hong pai ngam ahih leh, a nihveina pen ong pai kik lua mahmah ding hi cih thu kician mahmah zaw kanlai hi. Hih Khrih ong paikik nading thu in eite’ lametna le hehnepna lian pen ahi hi (John 14: 1-14; 1 Thess. 4: 10).

Khrih hangin ih lamet thu pen hih ih leitung nuntak sung thu bek hi takpi leh leitung midang khempeuhte sangin a hehpihhuai zaw ih hi ding hi. (1 Cor. 15: 19).

Evan. Suang Dal