Na kisapbehte pan Thakhat-a na kisap thu-ah na lungsim ciah pih kik zelzel in.
Vanleng mawtaw Suaikhi neih loh awh loh hang kinungta zo lua. Puan hoih silh zawh loh hang zong kinung ta mawh lo. An ni 30 val bang ne kei lecin bel bang na ci diam? Tui ni thum dawn kei lecin bang na ci diam? Huih minit thum dik kha kei lecin e?
Nuntakna ah thakhat-a i kisap bulpite lei kul lo hi. Tam manh lua lo hi. I kisap beh tua mawtaw vanlengte nei lo suai-khi ok zo lo tudong nungta lai teh. Ahi zongin nuntak nadingin an ni 30 ngawl nai lo. Tui ni thum ahi-a huih minit thum ahi zongin ngawl ngei nai lo hiteh. Na suai-khi suah inla pai lecin thakhat thu-in nungta lah tuan lo ding cin-a hih huih le an le tuite ngawl ve tha khat thu-in si ding hi vecin. Tha khat-a i kisap bulpite le i kisapbehte khen tel lecin vai hong huam tuam mahmah ding hi. (Immediate need and felt need)
Hih ka ngawl ngei loh teng sum tawh lei kul hileh a tung-a ka neih zawh loh ka deihte’ manh zah in lei zo ngei lo ding hi. Huih minit thum dik kei leng a kisi ding hi phial-a pia tang khat zong piak kul lohin i dikdik hi.
Atam manh totote nuntakna bulpi adingin kimanna a nei lua hi lozaw-a nungtakna ading a kisam bulpite tua zahin a tam manh lua thei dingin Pasian in bawl lo hi. Tui zah in huih sum piak kul lo-a an nek khat zah-in tui dawn khat sum piak kul lo hi. An nek khat manh le mawtaw khat manh van le lei-in kikhai-a an nek khat lo tawh kinungta thei loin mawtaw khat neih loh sa-in kinungta lua khin zo hi.
Mawtaw vanleng kisam kei cihna hi loin na thupha sim dih in cihna hi. A kisam bulpite ah Pasian in mikhempeuh a kibangin hong koih hi.
Zi (bazaar) na pai ciang zong a kisam bulpite lei-in la a tam manh pongpong lei kei in. I deih sangin i kisap i nuntakpih ding Topa’n diksa zaw hi. Pasian’ minthan nadingin nang zong Pasian in hong pian sak ahih manin Pasian’ min na than sak nop leh tua Pasian hong sik na kisap bulpi (immediate need)te bulphuh lecin nang tungtawnin zong Topa minthang lah loh ding hi. Tua na deih (felt need) na bulphuh leh bel hong kitukalh den ding hi.
Hihte khempeuh tungah thakhat-in na kisap bulpi in na pianthak loh phamawh cih thu hi. A piang thak khin na hih leh mi khempeuh in tha khat thu-a a kisap uh Lungdamna thu (the urgency of the gospel preaching) maan tak-a na kin hilh ding kisam pen hi.
Thakhat thu-a kisam i cihte pen tam manh hi tawm manh hi cih namte hi lo hi. Sum le paii vai zong hi lo-a lei theih lei zawh nam tawh kisai zong ahih loh banah zingciang cih nam zong hilo hi. Tun ahi hi. Hehpihna hang-a upna bek tawh cih nam ahihi. Ki-ngakngak kenla tu mahmah in kin takin Jesuh Khrih le Singlamteh tungah a kikhai lup tua Lungdamna thu thakhat thu in um inla sang ta peuh in.
Hih in thakhat thu-in na kisap lian pen ahi hi. Zingciang ah sihna bek om a tu’n ahih leh Gupna ni hi.
Evan. Suangh Dal
Tawmvei
Yangon pan
Comment piaknop aomleh...