Thuthak Tomkimcing 23 Aug 2014

Thuthak Tomkimcing 23 Aug 2014

A. Tuhun sung Tahan khuapi dinmun

Zomi tampi khua sakna Tahan khuapi sung hawk lam hoihtak kibawl lo in guahtui tam leh Bazaar kiim uih litlit ahih ban ah kong zin lampi ah niin bu lom ahonhon om kawikawi hi. Tahan bazaar ah Bawngsa tawikhat K 8000/-, Aksa, akluisa, K 6000/-, Akpi khat teh K 8000-10000/-, Besan tawi khat 1200/-, Voksa tawikhat K 6000/-, Buh ciim leh Mohhingga cih te kuang khat K 300/- Uisa khaiikhat K 2000/-, IIyamin buhtang K 27000/-, Aktui, K 90-150, Kiallap annek, Takhapyin K 500/-, Ngasa Shwewa te, K 5000/- man hi. Tahan ah Uisa leh Zuman khangsak uh cihkiza hi.

B. Amah Britain pan hong pai ding

Britain gam pan in Khuavel buppi nun domsang ah nasem Mr.Desmond Swayne Myanmar gam sung ah nithum sung hong zin ding ahihi. Amah hong zin ding vai tawh kipawl in Mr.Gavin McGillivray in Khuavel thuthang ah gen khia khin zo hi. Hun lemtang ahih leh Kachin gam pai sawmsawm cih kiza hi. Tua zom ah hun om zia zui in zin ding ahihi.

C. Tedim sang in Siangsawn Khua ah Khualzin mi kipai zaw

Leitung khuazin minthang te Zogam hongzin uh ciang in Tedim pai ding acih hang in Tedim sang in Teeklui khua khung ah Khuathak kilam, kisat thak SIANGSAWN khua pai masa zawta uh hi. Siangsawn khua ah, Zomi te neihsa Inn kilam in asung ah Zomi te nuntakzia silh leh teen zia liim kikoih hi.

Tua ban ah vanzat namtuam tanglai Zomi vanzat muitung muiphei, Tu, Hei, Puum akici siksekna, ansukna, Zo an um/Zo an thawl, Tuithawl, Meisah bung, Kilong, Innnuai eksuang phah , Keel kong, Lup napi, Akgil/ Akgiakna, Tangval te lupna, cih te ban ah Zomi sung ah alamdang diak Biakna leh Lai Piangsak pa Laipian Pau Cin Hau liim leh anu apa liim te, hoihtak lah na om ahih man in Khualzin te in lung lut mahmah hi. Ahizong khual zin te ading in Tedim khuapi ah Hotel hoih leh Minam kim anneek theih muh hak lai mahmah cih kiza hi. Hau Thang