Thuthak tomkim ~ The Tedim Post (21 Sep)

News In Brief: Thuthak tomkim ~ The Tedim Post (21 Sep)

Chin State, Paletwa Township ah AA mualmi thautawi te van puaksak ding a aki ummawh mi 41 te Myanmar Army in thu bawlin thusitna nei uh hi, cih thu kiza hi.

COVID-19 natna hangin 2020 kiteelpi pen kikhinlo ding hi, ci-in UEC thunei U Myint Naing in gen hi. 2020 kiteelpi adingin ah sep ding tuamtuam pawlkhat te zong zo khinta hi ung ci in zong gen behna nei lai hi.

Yangon Region bup Stay at Home thukhun zuih ding leh azuilo peuh mah thukhun tawh thu kibawl ding hi, ci-in Myanmar Covid-19 Central Committee in thusuah bawl hi. Natna ngah vekpi gawm 5541 lakah Yangon Region pan 3493 kihel uh hi.

Myanmar gam sungah COVID-19 natna hong nasia kik a nikhat sungin natna ngah mimal 500 val a omna tungtawn in Kumpi lam thunei ten kidal kikep na zia pawlkhat laihkul ding hi, ci-in Kumpi lam thunei Dr. Zaw Wai Soe in gen hi.

2020 kiteelpi hun sungah Quarantine lutte in zong mee a piak theih nading geelna ki neih sak hi, ci-in kiteelna lam tawh kisai Kumpi thunei U Myint Naing in genna nei hi.

Nay Pyi Taw ah Election Commission President U Than Htwe inn September 19, 2020 nitak lam nai 10:00 PM hun pawlin khutlawt bomb tawh kideng hi, cih thu kiza hi.

Cambodia, Boeung Thmouy khua ah september 18 ni nitak nai 6:15PM hunin kek khakna hangin mi 6 in sihlawh in mi 4 in liamna tuak uh hi.

Thailand gamah kha 2 val bang asawt khin lungphona a nini in nasia tektek a, Hih lungphonate ah Thai gam a khang kiluah suk Kumpi/ukpi thuneihna puah phat ding leh tulaitak Prime Minister pa akhawl nading cihte kihel ci hi.

France gamah Financial Minister pa in COVID-19 natna ngah cih thu ama twitter tung pan genkhia hi.

USA gamah Wechat application pen September 21 aki pan kizang thei nawnlo ding a, Tiktok Application pen November 12, 2020 ni dong kizang theilai ding ci hi.

September 20, 2020 ni Leitung bupah Covid-19 natna ngah Tein 300 val(30,859,069), asi Tein 9 val (958,314) leh adam kik Tein 200 val (21,099,095) phata hi.

More: Zogam Politics khuahun

Apple Company in 2020 Kumbei lamah 5G network akizang iphone mal million 80 kiim bawl khia ta ding hi, ci-in Nikkei Asian Review in gen hi. Source : 7day news, , Eleven Media, The Myanmar Times, The Combodia Daily. Thukai khawm: Lia Lu Lun, Lia Shang Shang.