Thuthak tomkim ~ The Tedim Post (21 July)

News In Brief: Thuthak tomkim ~ The Tedim Post (21 July)

Tedim Khuapi, Myoma (Khualai) veng a Sub B.E.H.S sangpi Tan 9, 10 te July 23 ni akipan kihong kik tading hi, ci-in Myoma Hausa Pu Peter Thawng Facebook tungtawn in kiza hi. July 21 ni-in Chin State bupah Tan 9, 10 sangpi 207 lakah sang 21 te kihong kik ta a, avek a akihon zawh nading cidamna lam zumin sitna aneih laitak ci hi.

Chin State, Falam Khuapi, Tlanglo veng leh Cinmual vengah innmun thak seh 247 zuak ding uh ci hi. Pi 80’x60’ munhoihte Tein 30, Tein 20, Tein 10 cihbang in kizuak ding ci hi.

Kachin gam, Hpakan Township, WaiKa khua ah July kha 2020 sungin mencipna 4 vei piang hi, ci-in thunei ten gen uh hi. July 2, 10, 19 & 20 ni ah mencipna piang ahi hi.

Yangon Khuapi ah July 21 ni akipan YBS Bus tuanman YPS (Yangon Payment Services) card tawh kipia theita ci hi. Tulaitak YPS card sai 100 val ki lei thei pan hi.

July 21,2020 ni akipan in Myanmar gam sungah Bogyoke Aung San limtuang Sum 500 dal te Myanmar Central Bank tungtawnin hawmkhiatna nei uh hi.

July 28, 2020 ni-in Yangon khuapi ah Kumpi lamte, NCA thukimpih suaikai kipawlna leh teelcing party 21 te kimu khawmin gamsung kilem nading vaite leh a 4 veina 21 Century Panlong khawmpi vai cihte kikupna om ding hi, ci-in kumpi lam thunei ten gen uh hi.

Myawaddy khuapi, Quarantine Center a om mimal 68 te in July 19, 2020 in an ne khial uh ahihman in zato kipuak pah uh a, ahang kikan san laitak ci hi.

July 19, 2020 in mawhna dan tuak mimal 54 leh inn lam ciah ding mimal 4 te Thachileik Khuapi, Myanmar gam lam thunei te tungah apna nei ung, ci-in Thai gam lam thunei ten gen uh hi. July 1-16,2020 ni kikal gamgi gate nawkin Thai gam pan Myanmar gam hong ciah mimal 10,985 phata ci hi.

European Union in Myanmar gam pilna lam tawh kisai panpihna MMK 59.693 Billion huh ding ci hi.

Myanmar gam bupah NLD party pan 2020 kiteelpi ah kuanglui dingteng pen July 23, 2020 ni-in NLD website pan tangkona ka nei ding uh hi, ci-in Daw Aung San Su Kyi in gen hi.

China(Sen) gamah Covid-19 natna hangin kha 6 val aki khakcip Cinema (Datsian) te natna hong veng zaw deuh ta ahihman in kihong kik ta ci hi. China (sen) gam pen Leitung bupah Cinema (Datsian) lam sumbawlna a nasia pen 2 na hi a, 2019 kumin Cinema (Datsian) sumbawlna US Dollar 9.2 Billion bang ngah uh ci hi.

Tusung tengin Thai gamah kumpi lam makai Vuanzi(Minister) guk in amau panmun pan khawlna nei uh ci hi.

UAE in Arab gam ading amasa pen Mars tungah Satellite khah khiatna nei ci hi. The Hope Probe akici Satellite in Mars tung atun nading kha 7 sawt thei ding a, Mars tung a om huih omzia te kantelna nei ding ci hi.

Syria gamah Hluttaw Elections kiteelna July 19 ni in bawl uh hi. Syria Hluttaw Palai mun 250 ading candidates 1656 in dem uh ci hi.

US Kumpipa Donald Trump deihna lahna in New York khuapi ah gunkuang hawlkawm in lahna nei uh hi. Hih pen New York khuapi ah aki bawl masa pen ci hi.

Brazil gam a Vuanzi(Minister)te lakah Onyx Lorenzoni leh Milton Ribeiro in COVID-19 natna ngah uh ci hi. Brazil gam kumpi makaipite lakah COVID-19 natna ngah mi 3 omta uh hi.

India gam, Assam State leh Nepal gamah tuikhanna hangin mimal 189 si uh a, Tein 40 (4Million) val in inn leh lo nusia in kihem uh ci hi.

More: Sialtaang Tuinak leh Saizang ~ Tedim Municipal

July 21, 2020 ni Leitung bupah Covid-19 natna ngah Tein 140 val(14,739,450), asi Tein 6 val (610,776) leh adam kik Tein 80 val (8,332,461) phata hi. Source : 7day news, Eleven Media, Myanmar Times, Chin World Media, RFA, VOA, Mizzima