Thuthak tomkim ~ The Tedim Post (20 July)

News In Brief: Thuthak tomkim ~ The Tedim Post (20 July)

Chin State, Mindat Township sunga khua pawlkhat te lo sungah cikmah hun a om ngei nailo kauphe pawlkhat kimu ci hi.

National Unity Party(NUP) in 2020 kiteelpi ah Township 177 ah ka dem ding uh hi, ci-in Party Vice President U Han Shwe in gen hi.

2020 kiteelpi ading in gampua lam a om Myanmar gammi te Vote(mee) apia khol nuamte adingin July 16, 2020 pan Embassy ah kisiau khol thei ding hi cih tangko uh a, tua ni mah in Singapore gamah siauhna lai a pia mi 1000 val pha pah hi, ci-in Embassy thunei te in gen hi.

Irrawaddy Division ah biakna lamtawh kisai Biakinn, Mosque leh Pagoda 130 val kumpi phalna tungtawn in kihong sak kikta ci hi. Hih mun ah Biakinn 46, Mosque 49 leh Pagoda 42 te kihel hi.

A 4 veina 21 Century Panlong khawmpi pen hong tung ding August 12-14, 2020 hun sung tengin kumpi thukhun Social Distancing zui in Nay Pyi Taw Khuapi ah kibawl ding hi, ci-in kumpi lam thunei U Zaw Htay in gen hi.

Wakhema khua a NLD Working Committe pan mimal 20 valte party pan a kikhawlsak na hang pen NLD CEC te thukhensatna a lungkim lohna hang hi, ci-in NLD pan Dr. Myo Thein Nyunt in gen hi.

Iran gamah tulaitak Covid-19 natna nei mimal 25 Million phata a, mimal 10 Million bang kibeh lap to kha thei ding hi, ci-in Iran Kumpipa Hassan Rouhani in gen hi. Milip 80 Million apha Iran gam pen Middle East gam teng lakah Covid-19 natna a suksia pen ci hi.

July 18, 2020 in Indonesia gam ah COVID-19 natna nei mimal 84,882 tawh Sen(China) te khengin East Asia ah natna ngah a tampen gam cih ciaptehna ngah thak uh hi. Indonesia gamah July 18, 2020 ni-in COVID-19 natna ngah thak mimal 1,752 leh a si 59 om cih cidamna lam thunei ten gen uh hi.

July 18, 2020 in Thai gamah mimal 1000 val in tulaitak a akumpi uh deihloh lungphona nei uh hi. Hih lungphona ah University sangnaupangte leh khangthak mipil tampi zong kihel uh ci hi.

More: Kawlpi hong hawh ve ~ Rev. Thang Van Lian

Australia gamah mipil ten minutes 20 sungin COVID-19 natna nei ngei, nei/neilo si tawh akisit theih nading setvan bawlkhia uh ci hi. Hih van pen leitungbup ah amasa pen zong hipah hi.

July 19, 2020 ni Leitung bupah Covid-19 natna ngah Tein 140 val(14,355,705), asi Tein 6 val (603,285) leh adam kik Tein 80 val (8,071,937) phata hi. Source : 7day news, Eleven Media, Myanmar Times.