Thuthak tomkim ~ The Tedim Post (05 July)

News In Brief Thuthak tomkim ~ The Tedim Post (05 July)

ZCD in 2020 kiteelna ah Chin State leh Sagaing Division pan mun 12 ah dem ding uh a, mun 12 ading mi 17 in form khia khin uh ci hi.

Hpakan khua suangkhuk ah mencipna hangin mi 170 val bangin hong nusiatna uh hangin mualtungmi thautawi kipawlna a hi KIO/KIA, TNLA, MNDAA leh AA te in dahpihna laisuahna nei uh hi.

An leh lo tampi tak asia sak Million 80 val apha Kauphe lompi India gamah atun laitak hi a, Myanmar gamah Khuapi 13 ah zong hong nawk kha thei ding ci hi. Chin State pan Tonzang, Thangtlang leh Paletwa te kihel uh hi.

Laisinna sanginnte kihong kik ciangin sangnaupangte COVID-19 natna kidal nang leh akilawh khakloh zawk nadingin sangkhante sitna ah zuihding thu 23 tawh kituak maw kituaklo cihte sitna neih dingin Education Department ten geelna nei cih genkhia uh hi.

Rakhine State ah Myanmar Army leh AA te ki dona hangin galtai mi Tein 2 val ta a, nek leh dawn ki tasam mahmah uh ahihman in Rakhine Ethnics Congress (REC)in kumpi tungah huhna ngen hi.

Pakistan gamah Meileng leh Sikh Biakna pawi simte tuanna mawtaw kitaihna hangin mi atawm pen 21 si ci hi. 2009 kumin Paskitan gam sungah meileng tawh kitaihna 100 vei bang piang a, mi atawmpen 200 kim bangin sihlawh uh hi.

India in Russian tung pan US Dollar 2.4 Billion aman Gal vanleng 33 lei dingin kipsak hi.

India gam, Naga Land State ah Ui-sa zuakloh dingin State kumpi in thupia ci hi. Naga land ah kum simin Ui gawh dingin tul 30 val bang kizuak den hi.

A beisa June kha sung India leh China(sen) gamgi buaina mun ahi Ladakh ah India Prime Minister Narendra Modi va hawh a gamgi cing India galkapte thapiakna va nei hi.

2020 November 3 ni akibawl ding USA kiteelna dingah Rap lasiam minthang mahmah khat ahi Kanye West in ka dem ding hi ci-in a twitter tungah gelh hi.

More: Sialtaang Tuinak leh Saizang ~ Tedim Municipal

July 5, 2020 ni Leitung bupah Covid-19 natna ngah Tein 110 val(11,299,667), asi Tein 5 val (531,515) leh adam kik Tein 60 val (6,085,054) phata hi. Source : 7day news, Eleven Media, BBC, Myanmar Times, Chin World.