Thuthak tomkim ~ The Tedim Post (02 July)

News In Brief Thuthak tomkim ~ The Tedim Post (02 July)

Chin State kumpi vaihawmna tawh Hakha Khuapi, Myothit veng ah a sanna Pi 75’, a zaina Pi 14’ apha Independence Statue Suangkhuam phuhna kinei hi. Chin State Municipal budget MMK 60 Million tawh akisep laitak ci hi.

Chin State, Hakha Khuapi ah inn mun thak Acres 676 hawn khiatna nei uh hi. Pi 100’x100’ mun hoih te Tein 150 tawh zuak uh ci hi.

Kachin State, Hpakan Township, Waika Khua a Suang manpha khuk tawhna leisaite kicipna hangin misi luang 125 bang kimu ta a, mi 200 kim bang si dingin ki ummawh hi.

Kha khat sungin Dollar sum 3% bang kiam suk a, July 1 ni-in sumkhek 1$ = 1360 Kyats dongah kia suk hi.

NLD party in 2020 kiteelpi ah kuanglui dingte a teel uh ciangin mimal enlo in party zumpi pan thukhun om bangin stage 3 kantan in teel ding ci-in gen uh hi.

2020 kiteelpi ah gampua a om Myanmar gammi ten vote a piak theihna dingin Union Election Commission (UEC) te lamlahna bangin hoihtak ka panpih ding uh hi ci-in Singapore leh Japan gam a Myanmar Embassy zum pan thunei ten genkhia uh hi.

2020 Kiteelpi hunah mipite in suakta tak a mee(vote) piak theih nang gal kikap/kidonate khawl bawl phot dingin Kachin State People’s Party in ngetna thusuah bawl hi.

China(Sen) gamah Leitung bup akilawh thei ding nattun pulnatna thak khat China(Sen)mipil ten mu khia uh hi. Hih natna pen vok tungpan akimu hi a mihing tungah zong kilawh kawikawi thei ding ahihman in mipilte patau mahmah uh ci hi.

Bangladesh Defence Minister Abdullah Al Mohsin Chowdhury Covid-19 natna hangin si hi. Tulaitak Bangladesh gamah Covid-19 natna nei 153,277, natna hangin a si 1926 phata uh hi.

Iran gam in USA te kumpi pa Donald Trump mattheihna dingin Leitung bup a Palik kipawlna lian pen ahi INTERPOL tungah huhna ngen a, INTERPOL in nial hi.

More: Tedim khuapi ah First Private Bank ki hongta ~ Tedim Post

Russia Kumpi Putin in 2036 kum dong kumpi sem ding ci hi. A sep theih nading thukhun kipsakna athukim mee(vote) khia 77.9%, athukimlo 21% pha hi. Prime minister leh President kum 20 val sem khin a, tulaitak Kum 67 pha in akum 83 dong kumpi semto suak ding ahi hi. Source : 7day news, Eleven Media, Myanmar Times, Taungzalat Times.