Hong ngaihsut huai sim pian ta hi

Hong ngaihsut huai sim pian ta hi

1. Nang hong it a hong hopihna kammalte pen ciamnuihna na sak a na nuihsan ziauziau lel leh a naupang na hi nawn kei a, lamet nei a hong kikholhpihte lawm hoih khat bangin na ngaihsut ziau leh nang pen a kum tam sim pian ta na hihi.

2. Na sanggamte ta te lakah it deuh na neih a, khuasung na vaak ciangin nang bulh ding khedap lei lo in na sanggamte ta te ading muamkhum na leisak zawk leh na kum tawm nawn lo cihna hi. Lungsim picing nei ta, thukhual ta cihna hi.

3. Pil kisa pian ta in, innkuan sung sum lut leh pusuak khempeuh na telpih ni ciangin nang pen uhaam ta cihna na hi a, nang thu lo tawh na innkuanpihte in thu bangmah khentat ngam nawn loh ahih leh nang pen na kum tam ta cihna hi pah hi. Zi/Pasal nei lo kum 40 phial pha ta cihna hi teh!

4. Na zun gim mahmah zong hong namsiat mahmah ni ciangin, phun na hat mahmah hun leh nang hong lungkimsaklote nasia takin na tot theih ni ciangin na kum pen 40 val ta cihna hi.

5. Zan khawng vengsung khuasungah tonpih nei lo a nang bek na vaak khiat ngam ni, zingsang zong na ut tanvei lum ta lecin kuamah in hong tot nawn loh ni leh na kikholpih teng a tamzaw khangote vive hong hih ni ciangin nang pen na kum tawm nawn lo cihna hi.

6. Lum baih ning na cih ni in na ihmu thei kei a, lum hak ning na cih ni in na ihmut a suak pahpah leh hoih tak kisit pha in. Na kum tam mahmah ta cihna hi. Zi or Pasal neih hun mahmah ta cihna hi!

Hong ngaihsut huai sim pian ta hi.

Zomi Quavadis