Lai Siangtho sung nambat tentuahna

Lai Siangtho sung nambat tentuahna

Tuma kum 100 huam panin, Jew-mite sung mah pan, a diakin Lai Siangtho bu masa 5te (Torah) teng, nambat tawh siksehna, tentuahna neih hong kipan uh hi. Mr. Yacov Rambsel a cih pa in ELSS kici, “Equidistant Language Skip Squence” cih hong mukhia masa hi. Laimal tua zahna ta-ateng gawmtuah lehang, word khat suak thei cih ahi hi. Tua leh Dotna khat:

“Hih Bible Code vai, Gematria, Malsimna Nambat tawh, Pasian’ kammal siksehin tentuahna pen ahi ding mah ahi tam?” A diakin, Hebrew lai leh kam in vantung panin, Pasian’ hong khiat suk, lai siangtho
(sacred writ & language) hi ci-in hih thului atpa in na ngaihsunin, na pom semsem ta ing. Tua ka cih ngamna a’ thu a late, tomkimin en suk pah ni!

A. Hebrew lai pen tuampian lua mahmah hi. (i) Pictographic language kici, lailim; laimal (letter) veve, lim khat peuhmah na kawk den hi. gtn. “Alef” kici, a 1na laimal a piancilna pen “Bawng lu leh a ki nih” lim pan hi a, thahat, makai, lutang ( cihna leh ama’ nambat in 1 hi pah den keii hi). Topa Jesuh suah ma, 700 B.C. lai pekin Gematria kici, laimalte in nambat na nei na kibulh, na kivawh ta uh hi.

(ii) Hebrew lai pen Numeric language hi-in, ka gensa mah bangin laimal 1na ii nambat pen 1 hi pahin, a tawpna 22na ii nambat pen 400 cih dan ahi hi.

(iii) Hebrew lai pen Phonic language hi a, tua bel gen kul lo ci ni, aw suak thei hi.

B. Hebrew alphabet laimal 22 (letters) na pha-in, a tawpna pen “Tav” kici hi. Mangmuhna 1:8, :11, 22:13nate ah “Keimah in Alpha leh Omega ka hihi,”

ih Topa Jesuh in a cih pen Thuciam Lui Hebrew kampau hi leh “Keimah in “Alef” leh “Tav” ka hi hi,” a cih kul ding ahihna pen siat dang ding mahmah om kilkel lo hi. Tua banah, Genesis 1:1 ah Hebrew Bible ih et ciangin kammal/word 7 na om a, a 4na kammal pen laimal 1na “Alef” leh laimal 22 a tawpna “Tav” kigawm (Et or Eth- את ) pen kiletkhia thei lo hi.

“Direct object” hi, cih ciang hi a, hih kammal ii taklam ah word 3, veilam ah word 3 cih bangin na om linlian hi. Tom gen ni ci leng, “Alef” leh “Tav” hi a, A leh Z, Alpha (Αλφα) leh Omega ( Ωμέγα ), Burmese bang hi leh “က” leh “အ” ahi hi.

C. Theologian-te in “Tetragrammaton” a cih uh thu khat bek gen suk ni. “Laimal Li” cihna hi a:

• Y (10)
• H (5)
• W (6)
• H (5) = 26 ahi hi. Na NIV Lai Siangtho sung sim masakna Ding sungah na om gige hi.

Hih laimalte a’ awsuah pen [Yod-Heh-Vav-Heh ] kici a, thulian mahmah hi. Min Siangtho a cihcih ahi hi. Ama’ Bible Code nambat pen a tunga “26” ahi hi. Hih ( יהוה ) pen Torah Genesis 1:1~9 sung, sittelna panin thulianpi khat kimukhia thei hi. Genesis 1:7~9 ah Hebrew LST tawh en le hang, “ELOHIM – אלהים ” (Pasian) cih kammal na kizep khinkhian mawk hi. Verse :7na pan laimal 26na sial ah “Elohim” ii spelling ding na kizep suksuk lian hi. Hih kammal ii Bible code #26 hi lianse lailai mawk zen hi.

Genesis 1:7na, kammal 1na pan a 7na ah 1. Alef (א -E or A) laimal na om lian sese zen mawk hi.

2. Tua Alef pan, a 26na laimal/letter pen a nuai laigual nihna sungah Lamed ( ל -L) laimal na om lian sese leuleu hi.

3. Tua pan laimal 26na mah pen, ih tuah khak dongin sim suksuk mah lehang, laigual 2na sung mah ah Heh ( ה -H) kici, laimal/letter na om leuleu diudeu zen mai hi.

4. A tawpna laimal ahih leh, a mal 26na mah hi-in, 1:9na sung, a patna verse 7 pan laigual 4na sungah, Mem ( ם -M) na kizep khikhe leuleu veh aw!

Hih laimal 4 ih gawm ciangin, ELOHIM ( אלהים ) word khat hong suak thei mawk a, Pasian cihna hi-in ama’ numeric value in 26 ahi hi. Hih 26 tak ciangin, YAHWEH, Jahovah, Jehovah, Yahshua, Jesuh, Jesu, Zeisu ii numeric value (Bible code #26) hong hi leuleu ahih ma’nin, na kisungzop dimdiam uh ahi hi.

More: 1998 kum a khatveina Pi leh Pu Bible Camp, Tedim ~ Khup Khan Thang

Thukhu’pna – Laigelhpa in hih dan ELSS leh Bible Number lamsang, nam 100 kan na theikhia nai lo hi mah tale’ng, Thuciam Lui Lai Siangtho mipilte in a 1,000 val-a sim ding bang na mukhia khin ta uh a, ih Topa Jesuh bekbek kawk den keii hi. Pasian’ humop a Kammal Lai Siangtho ih cih ni lohloh, hih bang dan ahi hi!!! Ka Lungdam, Pau Gin Mang (Thomas Pau) Creation Family (Ref: Ka thuciamtehna pan, Tulai kisungzopna www pan)