Thusia tampi kisunsiah kha thei hi ~ Lian Tuang

Thusia tampi kisunsiah kha thei hi ~ Lian Tuang

Kum zalom 14 kim pawl in Europe gam ah zavat (Plague) kici pul natna hangin mi tampi si ngei hi. Hih natna hangin Europe gam mi a lang bang beilawh ahih manin Sihna khuamialpi (Black Death) ci in min kipia liang hi.

Tua hun in Europe gam pen Khristian gam vive hi khin ahih hangin bum le ai tawi na, dawi le kau thu le khuamial nasepnate kilim zat mahmah hi. Milim biakna zong kilim zat mahmah a tua sungah Zawhngeu milim biakna nangawn kihel hi. Dawite kaute heh leh mi tampi in kisihlawh thei hi ci in kihta mahmah uhi.

Ahi zongin mailam ding saupi ngaihsutna tawh mipite le biakna makaite kikop in, bum le ai tawite, dawi le kau tawh kizomte khuasung panin hemkhia uhi. Cikze het loin thah ziahziah uhi. Tua bang kawmkalah zawhngeu le dawi kizom hi cih thuleng khat om zenzen a, tua thuleng siksan in zawhngeu khawite man in a zawhngeu tawh hallum ziauziau uhi.

Tua bang thu a om ciangin zawhngeu kikhawi ngam nawnlo hi. Mihau le ulian pawl khat bek in kuama theihpih lohin khawi sim uhi.

Tua hun laitak in Sen gam le Mongol gam lam ah zusa tung pan a kilawh thei natna nam khat lang mahmah hi. Sumbawl khualzinte tembaw sungah tua zusate pawlkhat na om kha a, tua tembawte Europe gam a tun ciangin zusate khat le khat natna kilawh toto hi.

Zawhngeu om lo ahih manin zusa tam lua mahmah a, zusa natna zong tha khat thu in kizel pah hi.

Natna nei zusate le tua zusate tunga zusahikte ( a li ) in mi a pet khak ciangin zusa natna kilawh in zavat pul natna (Plague ) piang pah in mi si pah ziahziah hi. EU gambup mi 50% kim bangin sihlawh hi.

A lipkhaphuai a khasiathuai hih sihna khuamialpi thu hoihtak a ki et kik ciangin zawhngeute kithah mang keileh hizah in kisi lo limlim ding hi ci in kimu khia hi.

Gamvai minamvai le vai thupi khat peuhpeuh ah zong thuman thutak kan masa sese loin upmawh thu tawh gamta kampau ziauziau nuam mahmah hi hang. Tua banah pom ding le paih ding, thudon ding le nusiat lel ding, it bawl ding le tuambawl ding cihte nengneng I khen khial pahpah a, a kisai tawk kisailo tawh i nawk gawp kha thei lailai hi.

Tua bang gamtat khialhna nengnengte hangin buaina hamsatnate thakhat thu in ong tun zaizai pah sam loh hangin thusia tampite kisunsiah thei gige ahihna ong phawk sak ka sa mahmah hi. Lian Tuang