Inndawl 25 Floor pan Lift kisia in aki hotkhiatsawm pasal khat kiasuk in si
China, Harbin khuasung aom innsung khatah akizang Lift pen inndawl 25th Floor atunglaitak sia in khawlcip hi. Tua inndawl 25 Floor panin pasal khat apusuahsawm laitak kiasuk in si cihi.
Hih thupiang pen abeisa Friday ni in China, Harbin khuasung ah nitaklam thupiang ahihi. Innsangdawn kahtohna Lift pen inndawl 25 leh 26 kikal ah awkcip, khawlcip citciat hi. Tua Lift sungah pasal papi khat, azi leh atate atuangkhawm uh ahihi.
Lift pen sia in, a awkcip ciangin apualam panin midang pawlkhat in hih Lift sungah a awkcip te innkuan huhding in kithawi uh cihi. Inndawl 25th leh 26th kikal ah a awkcip ahih manin, anuailam panin Lift hongkhia in asung ah a awkte hotkhiatding kipan uhhi. Inndawl 25 Floor pan Lift ii anuailam vangsak in, tua kongvangneu khatpan in nupa te’n atate uh pusuak khiasak masa uhhi.
A nunung ah papipa pen Lift sungpan in pusuakding in akithawi laitak akhutlet khahsuak in, anuai ah kiasuksuak vingveng in anuai zawlkikhung tawh kitatgawp cihi. Inndawl 25 Floor panin akiasuk himawk ahih manin, anuai atuk ciangin aphualzang mahah sipah hi ci’n Sohu News te’n genkhia uhhi.
Pear Video’s Interview akibawlna ah asipa ii anu zong khasia mahmah in, ka tapa pen kum 30 bek aphapan hi ci’n kapkawmkawm in genkhia hi.
Hih Apartment innsung ah akizang Lift pen kisia pahpah himahleh thunei te’n puahsaklo, Maintenance Check ompakpaklo cihi. Tuahang in hihbang in atuahsia hiding kici hi.
Tuaban ah innkuan te Lift sungah a awkcip laitak in ahonkhiading Rescue Operation kician ompaklo ahih manin, Chinse Social Media tuamtuam te’n thunei te mawhsak mahmah uhhi.
Pawlkhat Lift nasepzia athei te’n agenna ah hih Lift tepen asiat ciangin sualtawh Level akitang in aom mateng asungpan in pusuahding hilo ci uhhi.
Kahlei ah khetawh kahtoh ngiatngiat sanginbel hih Lift tepen tawldawmzaw thamtham a, ahi zongin siatna aom cianginzong lauhuaithei mahmah hi. Nungdiak inzong Indonesia, Jakarta khuasung ah naupangno khat vannawnna Cargo Lift in gawizankha in sisuakpah cihi.
Spain gamsung ahzong tukhasung mahin Lift tuahsiatna thuthang kiza hi. Hospital sung aom Lift khat sungah nupi khat alut laitak in thakhatthu in atunglam ah kahtovatmawk ahih manin, Lift sungah alut nupinu pen apumpi ki tumtan ciliang hi.
Video: Man slides out of the elevator and falls to his death down the shaft
https://www.youtube.com/watch?v=s_5DCpdYdvg
Singapore Building & Construction Authority te’n azenzen in Lift sungah na awkcipleh hih anuai abang in gamta in cihi.
Lauthawnggawp, pataugawp kei inla, Alarm Button pen mekin. Hong huhding apualam panin mi hongpaiding ngak in. Lift kongkhak pen nangthu in honsawmgawp kei in, lemgawp kei in. Lift sungah akisuang Emergency Number te sam inla, Lift akisiatlam zasak in.
Related: Malaysia Mydin Shopping Mall ii Lift sungah nupa kopkhat nai 25 sung awkcip
Malaysia gamsung aom innlui pawlkhat (adiakdiak Zomi te innsaapna pawlkhat ahi Maluri, Setapak, etc…) te ah Lift tepen ahoihnawn hetlo tammahmah in, lauhuai mahmah hi. Pawlkhat te kiasuk theizel kici sawnsawn hi. Ki dopsiamding thupi mahmah dinghi. Sawltak #zomidaily
Comment piaknop aomleh...