“The U.S. Census” le Kei ~ Nicholas Pau

“The U.S. Census” le Kei ~ Nicholas Pau

U.S. in, tukum 2020 pen, Census kumin ong gel leuleu hi. U.S. ah, Census pen, kum(10) ah khatvei ta, abawl’ uh hi. Ong tung ding March 12th – March 20th kikal sungteng, Census Bureau pan ong kikhak laiip ii innciat ah ong tung ding aa, April 1st (April Fool) ni aa kipan ki “fill out” theiding ahi hi. Innkuan/Innkhat sungah mimal bangzah pha aa, numei bangzah, pasal bangzah, naupang bangzah cihdan nengneng dotna le dawnkikna ahi hi. Kum (10) sungah na tampi a kilamdang mah cih ding hi.

Minam sung, u sung nau sungah, tampi tak mahin ong nusia khin aa, khangthak tampi tak mahzong ong kibehlap hi. U.S. Census 2010 lai in, U.S. aa ka innkuan/Household ah, kei bekmah ka hihpah aa, tutung 2020 ah bel, (5) bang apha keeita ka himawk hi. Hih bangaa von nih thum ong tawisak Topa le ka pianna NulePate tung lungdamko’ ding simlo’ gending dang kanei kei hi.

U.S. pen, ka pianna Kawlgam le ka khawlngeina gamdangte tawh, kateh kaak ciang, kei aa dingin, ahoihlo’ na khatzong kamu nai kei hi. Tua ahih manin, U.S. aa dingin, kum (6) sung U.S. Army Uniform silhin kakipiakhia ngei hi. Ka hun om lai teng, innkuan aa ding, ka kipiaksawm ta hi. Hun neilai, Zomi sungah nau ten zong, U.S. Military sungah na serve nopleh, na H.S. man uh teh, sawmpah un. Khial lo ding nahi uh hi. Military sungah na ut khat specialty in manthei ding cin-aa, tua pen, mailam ah Civilian Career pikhat ongsuak ding hi. U.S. gam ah i minam Zomite tangthu hoih a atat zong ihi pah hi.

Census vai zom kik leng, abeisa hun in, a Form ong khakngiat uh hi. Tutung U.S. Census ah bel Online, By phone, le By mail panin ki “Fill out” thei ding hi ciuh hi. A (2) veina bang U.S. Census a tuakkha kahih hangin, theihlo’ ka hauh luat tak ciang, ka theihnop ong tamsim aa, ka kankhak sunsun, Zomi u le nau tung hong hawmsawn kahi bek hi.

U.S. Constitution in “We the People” tawh ong pat mah bangin, “The U.S. Census is about people, power, and money”ci uh hi. Eipau in, mite, thuneihna, le sum cih ding himai hi. Gam khat Democracy Cores tawh khuasak nading, a kitangsam bulpi tengin kamu hi.

U.S. Constitution Article 1, Section 2 na sungah, U.S. Census pen, bawllo’ phamawh thukhunpi khat aa a om ngiat ahi hi. Kum (10) ong cinsim aa, a bawl uh ahi hi. U.S. pen, a gam ii Constitution sung ah, Census bawl ding, a guangngiat gam masapen zong ahi hi. Census tungtawn aa akingah, milip mimal phazah tawh kituak aa, gamke khat in, Representatives bangzah ngah ding cihte, Electoral votes bangzah ngah ding cihte khensatna nei uh hi. Tua bek thamlo’ in, gamsung ii koimun ah pasal, numei, naupang, innkuan, uham, kua minam bangzah om cihte kumpiten Census tungtawn-in, theihkhiatna ong nei theipan hi.

Tua ahih manin, U.S kumpi in mipi aa ding a vaipuakte limtak aa asep theih nading, Census pen pelmawh kisam khat ong hi hi. Tua hang in, “The U.S. Census is about people, power, and money” aci uh hi. Hih a tung aa teng pen, mite le thuneihna ong hipah aa, mimal le thuneihnate U.S kumpi kilamzia sungah, a thupii’tnate imu thei hi. Hih mimal phazah te muhkhiatna tungtawn panin, sumvai Federal Funding bangcih hawmkhiat ding cihte khensatna ong nei theipan uh hi.

Koimun ah zato thak kisam aa, koimun ah lampi thak kisam aa, koimun ah sangthak lamding kisam aa, Medicaid kisamzah, Medicare kisamzah, Department of Health and Human Services aa ding sum kisamzah, Public Housing, etc. cih tuamtuam te ong theikhia-in, Federal Funding te ong hawmkhia theipan uh hi.

U.S. Census Bureau in bel, Census data pen, kimat kihenna in, kizang ngeilo ding hi ci uh hi.. Lau kei un ci-in, bem aa om te tungah hanthawn tawntung hi. Ahi zong in, U.S. tangthu leuleu ah, hunkhat lai-in, Census Bureau in, a confidential data teng ong zangkhial ngei uh hi.

1941, December 7th ni, Sunday zingsang 8:00 am madeuh in, Japan (Imperial Japanese Navy Air Service) ten, Honolulu, Hawaii aa om Peral Harbor, U.S. Naval Base ong kapvat na tungtawn-in, U.S. te heh lua mahmah in, U.S. aa khang nih khang thum bang a om khinsa Japanese te tungah zong muanmawhna le muhdahna ong lian mahmah hi. Tua huzap in, President Roosevelt in, 1942 February 19th ni in, “Executive Order 9066” ong bawl in, U.S. aa om Japanese-American khempeuh man-in, “Concentration Camps” ah ong koih uh hi. Hih hun lai in, U.S. Census Bureau in, Japanese-Americans te confidential neighborhood information teng U.S. kumpi tungah pholak khia in, U.S. Regional Military Commanders te huh hi cih tangthu omngei hi.

Japanese-Americans te pen nasep a hanciam mahmahte hi-in, hamsapi tak aa a thalawhsa, neih le lam khempeuh a summang uh hi. Politics siamte le Historians te genna ah, U.S. ( hih munsan ah bel mikang hizaw pian) ten pen, hih ma pek in, U.S. gam sung aa om, Japanese-Americans te amau hanciamna tawh ong khan’to’ uh ciangin, haza, kita, le minam ngiat aa muhdahna a ong nei toto khin hi ci uh hi. A gawt theih nading a thu a zongzong uh hi-in, “Pearl Harbor” attack ong om lian takciang, a minam bup aa, a gawtpah dan in gen uh hi.

Ahizong in, 1988 ciang, President Ronald Reagan in “Civil Liberties Act of 1988” tawh, Japanese-Americans te tungah, “khial mahmah ung” cih U.S. Kumpi tangin thuumna ong nei in, “Concentration Camps” pan a suakta aa a nungta lai Japanese-American te tung mimal khat ciang $ 20,000 ta thumna pia hi. Hih dinmun a tun’ nang un, Japanese-American khangno tampi tak in, a gam (U.S.) aa ding in, a nuntakna uh tampitak a piakhia ngei uh hi. Thong aa a khum a gammipih U.S. te zawhlo, a gal tampi zawhsak ngei uh hi.

Tua tampi lak pan in, 442nd Infantry Regiment in, U.S. Battalions tampi tak ii phutzawhlo’ German Defensive line, “Gothic Line” a lakzawh na uh U.S. Military tangthu ah minthang pen hi. 442nd Infantry Regiment (Nisei) pen, Japanese-American khang (2) nate tawh aki lam U.S. galkap te ahi hi. (Tuhun ah, U.S. Military sungah, minam, vun(color) tuntawn aa a kilam Regiment khentuam tuamtuam om nawnlo hi.)

U.S. Democracy pen, People Democracy hi-in, a mite ahoih zahzah hoihthei in, a mite asiat zahzah zong a siathei ana hi gige hi. Hih munsan ah bel, sia hi pha hi cihna lam hilo zaw in, U.S. Census tawh kisai, a piangngei , a omngei thute, ka kankhak tantan ong hawmsawn kahi bek hi. U.S. Census 2020 tawh kisai bel hih website, https://www.census.gov/ pan kicing zaw ding hi. Lai ong simsak na hih manin ka lungdam hi. Nicholas Pau